Yohaanisa 16 - ጌሻ ማፃፋ

¹ “ታኒ ሄሳ ህንተ አማኖይ ዮና መላ ህንተዉ ኦዳስ።

² ኤንቲ ህንተና አይሁደ ዎሳ ኬታፐ ከስ የዳና። ሄሳዳካ፥ ህንተና ዎያ ኦንካ ፆሲ ኮያባ ኦያ ዳንያ ዎደይ ያና።

³ ኤንቲ ሄሳ ህንተ ቦላ ኦይ ታና ዎይኮ አዋ ኤሮና ግሾሳ።

⁴ ሽን ኤንቲ ሄሳ ህንተ ቦላ ኦያ ዎደይ ጋክያ ዎደ ታኒ ህንተዉ ኦድዳይሳ ህንተ አኬካና መላ ታኒ ህንተዉ ሀይሳ ኦዳስ። “ስንታዳ ታኒ ሀይሳ ህንተዉ ኦዶና ጋምእዳይ ታ ህንተራ ደእያ ግሾሳ።

⁵ ሽን ሀእ ታኒ ታና ኪትዳይሳኮ ባይስ፤ ህንተፈ ኦንካ፥ ‘አዉ ባይ?’ ግድ ታና ኦይቸይ ባዋ።

⁶ ሽን ታኒ ሄሳ ኦድዳ ግሾ፥ ህንተ ዎዛናን ዳሮ አዛኖይ ደኤስ።

⁷ ሽን ታኒ ህንተዉ ቱማ ኦዳይስ፤ ታኒ ቢኮ ህንተዉ ሎኦ። አይስ ጊኮ፥ ታኒ ቦና እፅኮ ምንይስ ህንተኮ ዬና። ሽን ታኒ ቢኮ እያ ህንተኮ የዳና።

⁸ ምንይስ ይድ፥ ናጋራባ፥ ፅሎተባነ ፕርዳባ ሀ አላምያ አሳ ኤርሳና።

⁹ ናጋራባይ፥ አሳይ ታና አማኖና ግሾሳ።

¹⁰ ፅሎተባይ፥ ታኒ አዋኮ ብያ ግሾነ ህንተ ታና ዛር በኦና ግሾሳ።

¹¹ ፕርዳባይ፥ ቃስ አላምያ ሃረይስ ፕርደትዳ ግሾሳ።

¹² “ታኒ ህንተዉ ኦድያባይ ዳሮባይ ደኤስ፥ ሽን ሀእ ህንተዉ ገለና።

¹³ ቱማ አያናይ ያ ዎደ ህንተና ቱማተ ኡባኮ ካለና። እ ስእዳባ ኦዴስፐ አትሽን፥ ባፐ አይብባካ ኦደና። ቃስ ስንፈ ያናባ ህንተዉ እ ኦዳና።

¹⁴ እ ታዉ ደኤይሳፈ ኤክድ ህንተዉ ኦድያ ግሾ እ ታና ቦንቻና።

¹⁵ አዋስ ደእያባ ኡባይ ታባ፤ ‘ምንይስ ታዉ ደኤይሳፈ ኤክድ ህንተዉ ኦዳና’ ታኒ ግዳይ ሄሳሳ።

ህንተ አዛኖይ ኡፋይሳን ላመታና

¹⁶ “ጉ ዎደፐ ጉየ ታና በኤከታ፤ ቃስ ጉ ዎደፐ ጉየ ህንተ ታና በአና” ያግስ።

¹⁷ እያ ታማረታፐ እሶት እሶት ባንታ ግዶን፥ “ጉ ዎደፐ ጉየ ህንተ ታና በኤከታ፤ ቃስ ጉ ዎደፐ ጉየ ህንተ ታና በአና፤ ቃስካ ታኒ አዋኮ ባይስ ጉሳይ ዎይ ጉሴ?” ያግዶሶና።

¹⁸ “ጉ ዎደፐ ጉየ ገይስ ዎይ ጉሴ? እ አይ ኦደትያኮ ኑስ ኤረተና” ያግዶሶና።

¹⁹ ኤንቲ ባና ኦይቻናዉ ኮየይሳ የሱሲ ኤርድ፥ “ታኒ፥ ‘ጉ ዎደፐ ጉየ ታና በኤከታ፤ ቃስ ጉ ዎደፐ ጉየ ህንተ ታና በአና’ ግዳይሳስ ህንተ እሶይ እሱዋ ኦይቼቲ?

²⁰ ታኒ ህንተዉ ቱማ ኦዳይስ፤ ህንተ ዬካናነ አፉፃና፥ ሽን ሀ አላመይ ኡፋይታና። ሀእ ህንተ አዛናና፥ ሽን ህንተ አዛኖይ ኡፋይሳን ላመታና።

²¹ እስ ማጫስያ ናአ የላና ሀንያ ዎደ ባ የሎ ዎደይ ጋክዳ ግሾ ህርጋዉሱ። ሽን ናአ የልዳፐ ጉየ ናእ ሀ አላምያን የለትዳ ኡፋይሳ ግሾ ባ ኡንኣ ዶጋዉሱ።

²² ሄሳዳካ፥ ህንተካ ህንተ ዎዛናን አዛኔታ፥ ሽን ታኒ ህንተና ዛራዳ በአና። ህንተ ዎዛናይ ዳሮ ኡፋይታና፤ ሄ ኡፋይሳ ኦንካ ህንተፈ ኤከና።

²³ “ሄ ጋላስ ህንተ ታና አይብባካ ዎሰከታ። ታኒ ህንተዉ ቱማ ኦዳይስ፤ ህንተ ታ ሱንን ዎስያባ ኡባ አዋይ ህንተዉ እማና።

²⁴ ሀእ ጋካናዉ ታ ሱንን አይብባካ ዎስበከታ። ህንተ ኡፋይሳይ ፖሎ ግዳና መላ ፆሳ ዎስተ፤ ህንተ ኤካና።

²⁵ “ታኒ ሀእ ጋካናዉ ህንተዉ ሌምሶን ኦዳስ፥ ህዛፐ ታኒ ሌምሶን ኦዶና ዎደይ ያና። ሽን አዋባ ታኒ ህንተዉ ቆንጨን ኦዳና።

²⁶ ሄ ጋላስ ህንተ ታ ሱንን አዋ ዎሳና፤ ህንተ ግሾ ታኒ አዋ ዎስከ።

²⁷ አይስ ጊኮ፥ አዋይ ባ ሁጰን ህንተና ዶሴስ። ህንተ ታና ዶስያ ግሾነ ታኒ አዋ ማታፐ ይዳይሳ አማንዳ ግሾ፥ እ ህንተና ዶሴስ።

²⁸ ታኒ አዋ ማታፐ ሀ አላምያ ያስ፤ ቃስ አላምያ አጋዳ አዋኮ ባና” ያግስ።

²⁹ እያ ታማረት ዛሪድ፥ “ሄኮ፥ ሀእ ኔኒ ቆንጨን ኦዳሳ፤ ሌምሶን አይኮካ ኦዳካ።

³⁰ ኔኒ ኡባባ ኤረይሳ ኑኒ ሀእ ኤሮስ፤ ቃስ ነና ኦንካ ኦይቻና መላ ኔኒ ኮያካ። ሄስ ኑና ኔኒ ፆሳፈ ኪተትዳይሳ አማንስ” ያግዶሶና።

³¹ ያትን፥ የሱሲ ዛሪድ ኤንታኮ፥ “ሀእ አማነቲ?

³² ሄኮ፥ ህንተ፥ ህንተ ሶ ህንተ ሶ ላለትያ ዎደይነ ታ ፃላላ የግ አግድ ባቃትያ ዎደይ ያና፤ ሀእካ ይክችስ። ሽን አዋይ ታራ ደእያ ግሾ ታኒ ታ ፃላላ ግድከ።

³³ ህንተ ታራ ደእሸ ሳሮይ ህንተዉ ዳና መላ ታኒ ሄሳ ኦዳስ። አላመን ደእሸ ህንተ ዋየታና። ሽን ምንተ፤ ታኒ አላምያ ፆናስ” ያግስ።