Yohaanisa 14 - ጌሻ ማፃፋ

የሱሲ አዋኮ ኤፍያ ኦገ

¹ የሱሲ ባ ታማረታኮ፥ “ህንተ ዎዛናይ ኡንኤቶፎ፥ ፆሳ አማንተ፥ ታናካ አማንተ።

² ታ አዋ ኬን ዳሮ በሲ ደኤስ። ታኒ ህንተዉ በሰ ጊግሳናዉ ባይስ። ሄሳ ግዶናኮ ታኒ ህንተዉ ኦድከሽን።

³ ታኒ ባዳ በሰ ጊግስዳፐ ጉየ፥ ታኒ ደእያሱዋን ህንተ ዳና መላ ስማ ያዳ ህንተና ታኮ ኤፋና።

⁴ ህንተ ታኒ ብያ በሳ ኤፍያ ኦግያ ኤሬታ” ያግስ።

⁵ ያትን፥ ቶማስ፥ “ጎዳዉ፥ ኔኒ ብያ በሳ ኑኒ ኤሮኮ፤ ኦግያ ዋትድ ኤራናዉ ዳንዳአኔ?” ያግስ።

⁶ የሱሲ ዛሪድ፥ “ኦገይ፥ ቱማይነ ደኦይ ታና። ታ ባጋራ ግዶና እፅኮ ኦንካ ታ አዋኮ ባናዉ ዳንዳኤና።

⁷ ህንተ ታና ኤርያባ ግድያኮ፥ ታ አዋካ ኤራና። ሽን ህዛፐ ዶምድ ህንተ እያ ኤሬታነ እያ በእደታ” ያግስ።

⁸ ፍልጶስ የሱሳኮ፥ “ጎዳዉ፥ አዋ ኑና በሳ፤ ሄስ ኑስ ግዳና” ያግስ።

⁹ የሱሲ ዛሪድ፥ “ታኒ ሀይሳ መላ ዎደ ህንተራ ደእንካ ታና ኤርኪ? ታና በእዳ ኡራይ አዋካ በእስ። ያትን፥ ኔኒ ዎይጋዳ፥ ‘አዋ ኑና በሳ’ ጋይ?

¹⁰ ታኒ አዋራ እስኖ ግደይሳነ አዋይካ ታራ እስኖ ግደይሳ ኔኒ አማንክዬ? ታኒ ህንተዉ ኦድያ ቃላ ታኒ ታፐ ኦድከ፥ ሽን ታናን ደእያ አዋይ ባ ኦሱዋ ኦስ።

¹¹ ታኒ አዋን ደኤይሳነ አዋይካ ታናን ደኤይሳ አማንተ። ሄሳ አማኖና እፅኮ ታ ኦያባታን ታና አማንተ።

¹² “ታኒ ህንተዉ ቱማ ኦዳይስ፤ ታና አማንያ ኡራይ ታኒ ኦያ ኦሱዋፐ አያ ኦሶ ኦና። ታኒ አዋኮ ብያ ግሾ ታና አማንያ ኦንካ ሀይሳፈ አያ ኦሶ ኦና።

¹³ አዋይ ናኣ ባጋራ ቦንቸታና መላ ታ ሱንን ህንተ ዎስያ ኡባ ታ ህንተዉ ኦና።

¹⁴ ታ ሱንን አይብባካ ህንተ ኦይችኮ ታ ህንተዉ ኦና።

የሱሲ ቃላ ገልዳ ጌሻ አያና

¹⁵ “ህንተ ታና ዶስኮ ታ ኪታ ናጋና።

¹⁶ ታኒ አዋ ዎሳና፤ ህንተራ መርናዉ ዳና መላ ምንይሳ ህንተዉ እማና።

¹⁷ ሄ አያናይ ፆሳ ቱማ ቆንጭሴስ። ሀ አላምያ አሳይ እያ በኦና ግሾነ ኤሮና ግሾ እያ ኤካናዉ ዳንዳኦኮና። ሽን እ ህንተራ ደእያ ግሾነ ህንተ ግዶን ዳና ግሾ ህንተ እያ ኤሬታ።

¹⁸ “ታኒ ህንተና አይያ አዉ ባይና ናአዳ ህንተ ፃላላ አግከ፤ ስማዳ ህንተኮ ያና።

¹⁹ ጉ ዎደፐ ጉየ አላመይ ታና ዛር በኤና፥ ሽን ህንተ በአና። ታኒ ደኦን ደእያ ግሾ ህንተካ ደኦን ደአና።

²⁰ ታኒ ታ አዋን፥ ህንተ ታናን፥ ቃስ ታኒ ህንተናን ደኤይሳ ህንተ ሄ ጋላስ ኤራና።

²¹ “ታ ኪታ ኤክድ ናገይ ታና ዶሴስ። ታና ዶሰይሳ ታ አዋይካ ዶሴስ፤ ታንካ እያ ዶሳይስ፤ ታኒ እያዉ ቆንጫና” ያግስ።

²² አስቆሮታ ይሁዳ ግዶና ይሁድ የሱሳኮ፥ “ጎዳዉ፥ ኔኒ ዋታዳ አላምያስ ግዶናሽን ኑስ ነና ቆንጭሳኔ?” ያግስ።

²³ የሱሲ ዛሪድ፥ “ታና ዶስያ ኦንካ ታ ቃላስ ኪተታና። ታ አዋይ እያ ዶሳና። ቃስ ታ አዋይነ ታኒ እያኮ ይድ እያራ ዳና።

²⁴ ታና ዶሶና ኦንካ ታ ቃላስ ኪተተና። ህንተ ስእያ ቃላይ ታና ኪትዳ አዋባፐ አትሽን፥ ታባ ግደና።

²⁵ “ታኒ ህንተራ ሀእ ደአሸ ሄሳ ህንተዉ ኦዳስ።

²⁶ ሽን አዋይ ታ ሱንን ኪታና ምንያ ጌሻ አያናይ፥ ህንተና ኡባባ ታማርሳና። ታኒ ህንተዉ ኦድዳ ኡባ እ ህንተና ሀሳይሳና።

²⁷ “ሳሮተ ህንተዉ እማና። ታኒ ታ ሳሮተ ህንተዉ እማና። ታ እምያ ሳሮተይ አላመይ እምያ ሳሮተ መላ ግደና። ሄሳ ግሾ፥ ኡንኤቶፍተ፥ ያዮፍተ።

²⁸ ‘ታኒ ባና፥ ሽን ስማዳ ህንተኮ ያና’ ግዳይሳ ስእደታ። ህንተ ታና ቱማ ዶስያባ ግድያኮ ታ አዋይ ታፐ አያ ግሾ ታኒ እያኮ በይሳን ህንተ ኡፋይታና።

²⁹ ሄስ ሀንያ ዎደ ህንተ አማናና መላ ሄስ ሀኖና ደእሽን ስንታዳ ታኒ ህንተዉ ኦዳስ።

³⁰ “ሀ አላምያ ሃረይስ ያ ግሾ ህዛፐ ጉየ ህንተራ ዳሮ ኦደትከ። ታና እ አይኮካ ኦናዉ ዳንዳኤና።

³¹ ሽን ታኒ አዋ ዶሰይሳ አላመይ ኤራና መላ ታ አዋይ ታና ኪትዳይሳ ኡባ ኦይስ። ደንድተ፤ ሀይሳፈ ቦስ።