Yohaanisa 13 - ጌሻ ማፃፋ

የሱሲ ባ ታማረታ ቶሆ ሜጭስ

¹ ፓስካ ቦንችያ ጋላሳይ ጋካናፐ ስንትድ ሀ አላምያ አግድ አዋኮ ብያ ዎደይ ጋክዳይሳ የሱሲ ኤርስ። ሀ አላምያን ደእያ ባ አሳ ኡባ ዎደ ዶስስ፤ ዉርሰ ጋካናዉካ ኤንታ ዶስስ።

² የሱሳራነ እያ ታማረታራ እስፈ ካሆ ሞሶና። ሄሳፈ ካሰ ፃላሄይ ስሞና ናኣ አስቆሮታ ይሁድ የሱሳ አድ እማናዳ እያ ዎዛናን ኢታ ቆፋ ዎስ።

³ የሱሲ አዋይ ኡባባ እያ ኩሸን ዎዳይሳ፥ እ ፆሳ ማታፐ ይዳይሳነ ስሚድ እያኮ ባናይሳ ኤርስ።

⁴ የሱሲ ጋይታ ቦላፈ ደንድድ ቦላ ባጋ ማኡዋ ቃር ዎድ፥ ፖፃ ኤክድ ባ ፄሳን ማርፃፍስ።

⁵ ሄሳፈ ጉየ፥ ሃ ሜቻ ሚሸን ትግድ፥ ባ ታማረታ ቶሁዋ ሜጭስ፤ ቃስ ባ ፄሳን ዳንጭዳ ፖፃን ቁችስ።

⁶ የሱሲ ስሞና ጰፅሮሳኮ ያ ዎደ ጰፅሮስ፥ “ጎዳዉ፥ ነ ታ ቶሁዋ ሜጫኔ?” ያግስ።

⁷ የሱሲ ዛሪድ እያኮ፥ “ታኒ ኦይሳ ነ ሀእ ኤራካ፥ ሽን ጉየፐ አኬካና” ያግስ።

⁸ ያትን፥ ጰፅሮስ፥ “ነ ታ ቶሁዋ ኡባራካ ሜጫካ” ያግስ። የሱሲ እያኮ፥ “ታኒ ነ ቶሁዋ ሜጮና እፅኮ ነዉነ ታዉነ እስፈተ ባዋ” ያግስ።

⁹ ጰፅሮስ የሱሳኮ፥ “ጎዳዉ፥ ያትኮ፥ ታ ቶሁዋ ፃላላ ግዶናሽን ታ ኩሽያነ ታ ሁጵያ ሜጫ” ያግስ።

¹⁰ የሱሲ ዛሪድ፥ “ቦላ ሜጨትዳ ኦንካ ቶሆፐ ሀራባ ሜጨታናዉ ኮሸና፤ እያዉ ኡባሶይ ጌሽ። ህንተ ጌሽ፥ ሽን ኡባይ ጌሽ ግደከታ” ያግስ።

¹¹ የሱሲ ባና አድ እማና ኡራይ ኦነኮ ኤርያ ግሾ፥ “ህንተ ኡባይ ጌሽ ግደከታ” ያግስ።

¹² ኤንታ ቶሁዋ ሜጭዳፐ ጉየ፥ የሱሲ ባ ማኡዋ ዛር ማእስ። ስም ጋይታ ቦላ ኡትድ ኤንታኮ፥ “ታኒ ህንተዉ ኦዳይሳ አኬከቲ?

¹³ ህንተ ታና አስታማረነ ጎዳ ጌታ፤ ታኒ ህንተ ገይሳ ግድያ ግሾ ሎኦ ግደታ።

¹⁴ ታኒ ህንተዉ ጎዳነ አስታማረ ግዳሸ ህንተ ቶሁዋ ሜጭኮ ህንተካ እሶይ እሱዋስ ሄሳዳ ኦናዉ በሴስ።

¹⁵ ህዛ፥ ታኒ ህንተዉ ኦዳይሳዳ ህንተካ ኦና መላ ህንተዉ ሌምሶ ግዳስ።

¹⁶ ታኒ ህንተዉ ቱማ ኦዳይስ፤ አይለይ ባ ጎዳፐ፥ ኪተትዳይስ ኪትዳይሳፈ አና።

¹⁷ ህንተ ሄሳ ኤርድ ኦያባ ግድኮ አንጀትዳይሳታ።

¹⁸ “ታኒ ህንተና ኡባ ጊከ፤ ታኒ ዶርዳይሳታ ኤራይስ። ሽን ጌሻ ማፃፋን፥ ‘ታ ባርስዳይስ ታ ኩሽያ ሳፅስ’ ጌተትዳይስ ቱማ ግዳናዉ በሴስ።

¹⁹ ‘ታኒ ታና ግደይሳ’ ህንተ አማናና መላ ሄስ ሀናናፐ ስንታዳ ህንተዉ ኦዳይስ።

²⁰ ታኒ ህንተዉ ቱማ ኦዳይስ፤ ታኒ ኪትዳ ኦናካ ሞክያ ኡራይ ታና ሞኬስ። ታና ሞክያ ኦንካ ታና ኪትዳይሳ ሞኬስ” ያግስ።

የሱሳ አድ እማና ኡራ

²¹ የሱሲ ሄሳ ኦድዳፐ ጉየ፥ ባ ዎዛናን ዳሮ ኡንኤትድ፥ “ታኒ ህንተዉ ቱማ ኦዳይስ፤ ታና ህንተፈ እሶይ አድ እማና” ግድ ቆንጭስድ ኦድስ።

²² እ ኦደባ ኦድያኮ እያ ታማረታስ ኤረቶና እፅን እሶይ እሱዋ ፄልዶሶና።

²³ እያ ታማረታፐ እሶይ፥ የሱሲ ዶሰይስ፥ የሱሳ ማታን ኡትስ።

²⁴ ሄሳ ግሾ፥ ስሞን ጰፅሮስ እያ ቃምኦትድ፥ “እ ኦና ግያኮ አነ ኦይቻ” ያግስ።

²⁵ ሄሳ ግሾ፥ ሄ ታማረይ የሱሳኮ ሺቅድ ሀይን፥ “ጎዳዉ፥ እ ኦኔ?” ያግስ።

²⁶ የሱሲ ዛሪድ፥ “ታኒ ኡይ ዎፀን ቱሻዳ ባርሰይሳ” ያግስ። ቃስ ኡይ መን ኤክድ፥ ዎፀን ቱሽድ፥ ስሞና ናኣ አስቆሮታ ይሁዳ ባርስስ።

²⁷ ይሁድ ኡይ ባርዳፐ ጉየ፥ ፃላሄይ ኤለስድ ይሁዳን ገልስ። የሱሲ እያኮ፥ “ኔኒ ኦናዉ ቆፕዳባ ኤለሳዳ ኦ” ያግስ።

²⁸ ሽን ጋይታ ቦላ ኡትዳይሳታፐ ኦንካ የሱሲ ሄሳ አይስ እያኮ ግዳኮ ኤርቤና።

²⁹ ይሁድ ሚሸ ኦይክያ ግሾ፥ እያ ታማረታፐ እሶት እሶት የሱሲ እያ፥ “ፓስካ ቦንችያ ጋላሳስ ባንታዉ ኮሽያባ ሻማ ዎይኮ ማንቆታስ ሙፃታ እማ ግስ” ያግድ ቆፕዶሶና።

³⁰ ይሁድ ኡይ ባርዳ መላ ኤለስድ ካረ ከይስ። ሄ ዎደ ሳእ ቃማ።

ጰፅሮስ የሱሳ ካዳናይስ ኦደትስ

³¹ ይሁድ ካረ ከይዳፐ ጉየ፥ የሱሲ፥ “ሀእ አሳ ናአይ ቦንቸትስ፤ ፆሳይካ እያ ባጋራ ቦንቸትስ።

³² ፆሳይ እያ ባጋራ ቦንቸትኮ እ ባ ሁጰን አሳ ናኣ ቦንቻና፤ ቃስ እ ሄሳ ኤለስድ ኦና።

³³ ታ ናይቶ፥ ታኒ ህንተራ ዳሮ ዎደ ጋምእከ። ህንተ ታና ኮያና፥ ሽን ታኒ አይሁደታስ ኦድዳይሳ መላ፥ ‘ህንተ ታኒ ብያ በሳ ባናዉ ዳንዳኤከታ።’

³⁴ ታኒ ህንተዉ እምያ ኦራ ኪታይ ሀይሳ፤ እሶይ እሱዋ ዶስተ። ታኒ ህንተና ዶስዳይሳዳ ህንተ እሶይ እሱዋ ዶሳናዉ በሴስ።

³⁵ ህንተ እሶይ እሱዋራ ዶሰትኮ ህንተ ታ ታማረ ግደይሳ አሳ ኡባይ ኤራና” ያግስ።

³⁶ ስሞን ጰፅሮስ የሱሳኮ፥ “ጎዳዉ፥ ኔኒ አዉ ባይ?” ያግስ። የሱሲ ዛሪድ፥ “ታኒ ብያ በሳ ኔኒ ሀእ ካላናዉ ዳንዳአካ፥ ሽን ጉየፐ ታና ካላና” ያግስ።

³⁷ ጰፅሮስ፥ “ጎዳዉ፥ ታኒ ነና ሀእ ካላናዉ አይስ ዳንዳእክና? ታኒ ነ ግሾ፥ ሀይቃናዉካ ጊጋ ኡታስ” ያግስ።

³⁸ የሱሲ ዛሪድ፥ “ታ ግሾ ሀይቃናዉ ቱማ ጊጋ ኡታዲ? ታኒ ነዉ ቱማ ኦዳይስ፤ ኩቶይ ዋሳናፐ ስን ኔኒ ታና ሄ ቶሆ ካዳና” ያግስ።