Yohaanisa 12 - ጌሻ ማፃፋ

የሱሳ ሽቶ ትይዳ ማጫስዉ

¹ ፓስካ ቦንችያ ጋላሳፐ ኡሱፑን ጋላስ ስንትድ፥ የሱሲ ሀይቆፐ ደንዳ አላዛር ደእያ ጉታ፥ ብታነ ብስ።

² ሄ በሳን ኤንቲ እያዉ ካሆ ጊግስዶሶና። አላዛር የሱሳራ እስፈ ጋይታ ቦላ ኡትዳሽን ማርት ኤንታና እማታዉሱ።

³ ማይራማ ናርዶሰ ጌተትያ ዳሮ አልኦ ጌሻ ሽቶ ኤሀዳ የሱሳ ቶሁዋ ትያሱ። ባ ብናናን እያ ቶሁዋ ቁቻሱ፤ ኬ ኡባይ ሽቶ ሳዎን ቶንኩ ግስ።

⁴ ሽን የሱሳ ታማረታፐ እሶይ፥ የሱሳ አድ እማናይስ፥ አስቆሮታ ይሁዳ፥

⁵ “አይስ ሀ ሽቶይ ሄ ፄቱ ድናረን ባይዘትድ፥ ሚሸይ ማንቆታስ እመተኔ?” ያግስ።

⁶ እ ካይሶ ግድዳ ግሾ ሄሳ ግስፐ አትሽን፥ ማንቆታስ ቃትድ ግቤና። እ ሚሸ ካርፂታ ኦይከይሳ ግድያ ግሾ ኡባ ዎደ እያፐ ባዉ ኤኬስ።

⁷ የሱሲ፥ “እያ ባዉ ደእያባ ታ ሞጎ ጋላሳስ ምንጅዳ ግሾ እዮ አጋግተ።

⁸ ማንቆት ኡባ ዎደ ህንተራ ዳና፥ ሽን ታኒ ኡባ ዎደ ህንተራ ደእከ” ያግስ።

⁹ ሄ ዎደ ዳሮ አሳይ የሱሲ ብታነን ደኤይሳ ስእድ ያ ብዶሶና። ኤንቲ የሱሳ ፃላላ ግዶናሽን፥ እ ሀይቆፐ ደንዳ አላዛራካ በአናዉ ብዶሶና።

¹⁰ ሄሳ ግሾ፥ ካህነ ሀላቃት አላዛራካ ቃስ ዎናዉ ማቀትዶሶና።

¹¹ አይስ ጊኮ፥ አላዛራ ጋሶን ዳሮ አይሁደት ኤንታና እፅድ የሱሳ አማኖሶና።

ግታ ቦንቾን የሩሳላመ ገሉዋ

¹² ዎንተ ጋላስ ፓስካ ቦንችያ በሳ ይዳ ዳሮ አሳይ የሱሲ የሩሳላመ በይሳ ስእድ፥

¹³ ዛምባ ሀይ ኤክድ እያ ሞካናዉ ከይዶሶና። ባንታ ቃላ ቁ ኦድ፥ “ሆሳና! ፆሳይ ጋላተቶ! ጎዳ ሱንን የይስ አንጀቶ! ፆሳይ እስራኤለ ካዋ አንጆ!” ያግዶሶና።

^14-15 ጌሻ ማፃፋን፥ “ፅዮነ ካታማዉ፥ ባቦፋ! ሄኮ፥ ነ ካዎይ ሀረ ማራ ቦላ ኡትድ ዬስ” ጌተትዳያዳ የሱሲ ሀረ ማር ደምድ እያ ቶግስ።

¹⁶ የሱሳ ታማረት ሄሳ ካሰ አኬክቦኮና። ሽን የሱሲ ቦንቸትዳፐ ጉየ ኤንቲ ሄሳ ኡባ አኬክዶሶና። ሄስ ኡባይ ጌሻ ማፃፋይ ግዳይሳዳ ሀንስ።

¹⁷ የሱሲ አላዛራ ዱፎፐ ፄግድ፥ ሀይቆፐ ደንዳ ዎደ እያራ ደእያ ዳሮ አሳይ የሱሳባ ማርካትዶሶና።

¹⁸ ዳሮ አሳይ እያ ሞካናዉ ከይዳይ፥ እ ሄ ማላታታ ኦዳይሳ ስእዳ ግሾሳ።

¹⁹ ሄሳ ግሾ፥ ፋርሳወት እሶይ እሱዋኮ፥ “ኑ አይኮካ ኦናዉ ዳንዳኦናይሳ በእተ፤ ደረ ኡባይ እያ ካሌስ” ያግዶሶና።

²⁰ ፓስካ ቦንችያ ጋላስ ጎይናናዉ የሩሳላመ ብዳይሳታ ግዶን እስ እስ ግርከ አሳት ደኦሶና።

²¹ ኤንቲ ጋልላ ቢታን ቤተሳይዳ ካታማፐ ይዳ ፍልጶሳኮ ብድ፥ “ጎዳዉ፥ ኑኒ የሱሳ በአናዉ ኮዮስ” ያግድ ዎስዶሶና።

²² ፍልጶስ ብድ እንድርያሳስ ኦድን ናምአይ ብድ፥ የሱሳስ ኦድዶሶና።

²³ የሱሲ ኤንታኮ፥ “አሳ ናአይ፥ ቦንቸትያ ዎደይ ጋክስ።

²⁴ ታኒ ህንተዉ ቱማ ኦዳይስ፤ እስ ግስተ አይፈይ ቢታን ዎድ ዎቆና እፅኮ ባርካ አቴስ። ሽን ሄ ግስተ አይፈይ ዎቅኮ ዳሮ አይፈ አይፌስ።

²⁵ ባ ሸምፑዋ ዶስያ ኦንካ ይሴስ፤ ባ ሸምፑዋ ሀ አላምያን እፅያ ኦንካ መርና ደኦስ አሼስ።

²⁶ ታኒ ደእያሱዋን ታራ ዳና መላ ታዉ ኦናዉ ኮይያ ኦንካ ታና ካላናዉ በሴስ። ታዉ ኦያ ኦናካ ታ አዋይ ቦንቻና።

²⁷ “ሀእ ታ ሸምፖይ ዳሮ ኡንኤትስ፤ ያትን ዎይጎ? ‘ታ አዋዉ፥ ታና ሀ ሳተፐ አሻርክ’ ያጎ? አካይ፥ ታኒ ይዳይ ዋየ ኤካናሳ።

²⁸ ታ አዋዉ፥ ነ ሱን ቦንቻ” ያግስ። ሄ ዎደ ሳሎፐ፥ “ታኒ ታ ሱን ቦንቻስ፤ ዛራዳካ ቦንቻና” ግያ ቃላይ ይስ።

²⁹ ሄ በሳን ኤቅዳ ዳሮ አሳይ ሄ ቃላ ስእድ፥ “ሄስ ዳዳ” ያግዶሶና። ሀራት ቃስ፥ “ኪታንቾይ እያዉ ኦድስ” ያግዶሶና።

³⁰ የሱሲ ዛሪድ ኤንታኮ፥ “ሀ ቃላይ ህንተ ግሾ ይስፐ አትሽን፥ ታ ግሾ ግደና።

³¹ ሀ አላመይ ፕርደትያ ዎደይ ሀእ፤ ሀ አላምያ ሃረይስ ሀእ ካረ ሆለታና።

³² ቃስ ታኒ ሳአፐ ቁ ኦሰትዳ ዎደ አሳ ኡባ ታኮ ኤሀና” ያግስ።

³³ እ ሄሳ ግዳይ አይ መላ ሀይቆ ሀይቃነኮ ኤንታዉ ቆንጭሳናሳ።

³⁴ ዳሮ አሳይ ዛሪድ፥ “ኑ ህገይ ክርስቶስ መርናዉ ደኤይሳ ኦዴስ። ያትን፥ ኔኒ ዎይጋዳ፥ ‘አሳ ናአይ ቁ ጋናዉ በሴስ’ ጋይ? ‘እ፥ አሳ ናአይ ኦኔ?’ ” ያግዶሶና።

³⁵ የሱሲ፥ “ፖኦይ ህንተራ ጉ ዎደ ጋምአና። ህንተዉ ሞና መላ ፖኦይ ደእሽን፥ ፖኡዋን ሄመትተ። ማን ሄመትያ አስ አዉ ብያኮ ኤረና።

³⁶ ፖኦ ናይታ ግዳና መላ ፖኦይ ደእሽን ፖኡዋ አማንተ” ያግስ። የሱሲ ሄሳ ኦደትዳፐ ጉየ ብድ ኤንታፈ ጌምስ።

³⁷ እ ሄሳ መላ ማላታታ ኤንታ ስንን ኦንካ አማንቦኮና።

³⁸ ናብያ እሳያስ፥ “ጎዳዉ፥ ኑ ማርካተ ኦን አማንዴ? ጎዳይ ባ ዎልቃ ኦደስ ቆንጭስዴ?” ግዳይስ ቱማ ግዳና መላ ኤንቲ እያ አማንቦኮና።

^39-40 ቃስካ እሳያስ፥ “ኤንታ አይፈይ ፄሎና መላ፥ ኤንታ ዎዛናይ አኬኮና መላ፥ ኤንቲ ፆሳኮ ስምን፥ እ ኤንታ ፓና መላ፥ ፆሳይ ኤንታ አይፍያ ቆቅስስ። ኤንታ ዎዛና ምንስ” ግዳ ግሾ ኤንቲ አማናናዉ ዳንዳእቦኮና።

⁴¹ እሳያስ ሄሳ ግዳይ፥ የሱሳ ቦንቹዋ በእዳ ግሾነ እያባ ኦድዳ ግሾሳ።

⁴² ግድኮካ፥ አይሁደታ ሀላቃታፐካ ዳሮት የሱሳ አማንዶሶና። ሽን ፋርሳወት ባንታና አይሁደታ ዎሳ ኬፈ ከሶሶና ግድ ያይዳ ግሾ አማንዳ ግድ ቆንጨን ማርካትቦኮና።

⁴³ ሄሳ ኤንቲ ኦዳይ፥ ፆሳን ኤረታናይሳፈ አድ አሳን ኤረታናይሳ ዶስዳ ግሾሳ።

⁴⁴ የሱሲ ባ ቃላ ቁ ኦድ፥ “ታና አማንያ ኦንካ ታና ኪትዳይሳካ አማኔስፐ አትሽን፥ ታ ፃላላ አማነና።

⁴⁵ ታና በእያ ኦንካ ታና ኪትዳይሳካ በኤስ።

⁴⁶ ታና አማንያ ኡባይ ማን ዶና መላ ታኒ ፖኦ ግዳዳ አላምያ ያስ።

⁴⁷ ታ ቃላ ስእድ ኪተቶና ኦናካ ታኒ ፕርድከ። አይስ ጊኮ፥ ታኒ አላምያ አሻናዉ ያስፐ አትሽን፥ ፕርዳናዉ ያቢከ።

⁴⁸ ታና እፀይሳነ ታ ቃላ ኤኮና ኦናካ ፕርደይስ ደኤስ። ታኒ ኦድዳ ቃላይ ዉርሰ ጋላስ ሄ ኡራ ፕርዳና።

⁴⁹ አይስ ጊኮ፥ ታኒ ሄሳ ታፐ ኦድከ፥ ሽን ታና ኪትዳ ታ አዋይ ታኒ ጋናይሳነ ኦዳናይሳ ኪትስ።

⁵⁰ ቃስ እያ ኪታይ መርና ደኦ ግደይሳ ታኒ ኤራይስ። ሄሳ ግሾ፥ ታኒ ኦደይስ ታ አዋይ ታና ኦዳ ግዳይሳ” ያግስ።