Yohaanisa 11 - ጌሻ ማፃፋ

አላዛራ ሀይቁዋ

¹ ብታነ ጉታን አላዛራ ጌተትያ እስ አደይ ሀርገትስ። ብታነይ ማይራማነ እ ምችያ ማርታ ደእያ ጉታ።

² ሄ ማይራማ ጎዳ ቶሁዋ ሽቶ ትያዳ ባ ብናናን እያ ቶሁዋ ቁችዳሮ። ሀርገትዳይ እ እሻ አላዛራ።

³ ሄሳ ግሾ፥ ምቸት፥ “ጎዳዉ፥ ነ ዶሰይስ ሀርገትስ” ግድ የሱሳኮ ኪትዶሶና።

⁴ የሱሲ ሄሳ ስእዳ ዎደ፥ “ሀ ሀርገይ፥ ፆሳይነ እያ ናአይ ቦንቸታና መላፐ አትሽን፥ ሀይቆስ ጋያ ሀርገ ግደና” ያግስ።

⁵ የሱሲ ማርታ፥ እ ምችዉነ አላዛራ ዶሴስ።

⁶ ሽን አላዛር ሀርግዳይሳ የሱሲ ስእድ ባ ደእያ በሳን ናምኡ ጋላስ ጋምእስ።

⁷ ሄሳፈ ጉየ፥ የሱሲ ባ ታማረታኮ፥ “ዛሪድ ይሁዳ ቢታ ቦስ” ያግስ።

⁸ እያ ታማረት ዛሪድ፥ “አስታማርያዉ፥ ጉ ዎደፐ ካሰ አይሁደት ነና ሹቻን ጫድድ ዎናዉ ኮይዶሶና፤ ሀእካ ያ ባኔ?” ያግዶሶና።

⁹ የሱሲ፥ “እስ ጋላሳን ታማነ ናምኡ ሳተይ ደኤስ ግደነዬ? ጋላስ ሄመትያ አስ ሀ አላምያ ፖኡዋ በእያ ግሾ በተና።

¹⁰ ሽን ቃማ ሄመትያ ኦንካ ፖኦይ ባይና ግሾ፥ በቴስ” ያግስ።

¹¹ የሱሲ ሄሳ ግዳፐ ጉየ ኤንታኮ፥ “ኑ ዶስያ አላዛር ስክስ፥ ሽን እያ ደንናዉ ታኒ ባና” ያግስ።

¹² እያ ታማረት ዛሪድ፥ “ጎዳዉ፥ እ ስክዳባ ግድኮ እያዉ ሎአና” ያግዶሶና።

¹³ የሱሲ አላዛር ሀይቅዳይሳ ኦድስ፥ ሽን ኤንታዉ ጮ ስኮ ዳንስ።

¹⁴ ሄሳ ግሾ፥ የሱሲ ጌሽድ ኤንታኮ፥ “አላዛር ሀይቅስ።

¹⁵ ህንተ አማናና መላ ታኒ ሄ በሳን ደኦናይሳስ ህንተ ግሾ ኡፋይታይስ። አነ የተ፤ እያኮ ቦስ” ያግስ።

¹⁶ ሄሳፈ ጉየ፥ ድድሞሳ ጌተትያ ቶማስ ባ ላገ ታማረታኮ፥ “አስታማርያራ ሀይቃናዉ ኑካ ቦስ” ያግስ።

የሱሲ ደንዶነ ደኦ

¹⁷ የሱሲ ጋክያ ዎደ አላዛር ሞገትን ኦይዱ ጋላስ ግድስ።

¹⁸ ብታነይ የሩሳላመፐ ሄ ክሎ ምትረ መላ ሃኬስ።

¹⁹ ዳሮ አይሁደት ማርታነ ማይራሞ ኤንታ እሻይ ሀይቅዳይሳስ ምንናዉ ይዶሶና።

²⁰ ማርታ የሱሲ ይዳይሳ ስአዳ እያ ሞካናዉ ከያሱ፥ ሽን ማይራማ ሶን አታሱ።

²¹ ማርታ የሱሳኮ፥ “ጎዳዉ፥ ኔኒ ሀይሳን ደእዳባ ግድያኮ ታ እሻይ ሀይቀናሽን።

²² ሽን ሀእ ግድኮካ ኔኒ ዎስያባ ፆሳይ ነዉ እማናይሳ ታኒ ኤራይስ” ያጋሱ።

²³ የሱሲ፥ “ነ እሻይ ሀይቆፐ ደንዳና” ያግስ።

²⁴ ማርታ እያኮ፥ “ዉርሰ ጋላስ እ ሀይቆፐ ደንዳናይሳ ኤራይስ” ያጋሱ።

²⁵ የሱሲ ኢኮ፥ “ታኒ ደንዶነ ደኦ፤ ታና አማንያ ኦንካ ሀይቅኮካ ደኦን ዳና።

²⁶ ቃስ ደኦን ደኤይነ ታና አማንያ ኦንካ ሀይቀና። ሄሳ ኔኒ አማናይ?” ያግስ።

²⁷ ማርታ ዛራዳ፥ “ጎዳዉ፥ ኤ ታኒ አማናይስ! ኔኒ ፆሳ ናኣ፥ አላምያ ያናዉ ደእያ ክርስቶሳ ግደይሳ ታኒ አማናይስ” ያጋሱ።

²⁸ ማርታ ሄሳ ግዳፐ ጉየ፥ ባዳ ባ ምችዉ ጌማን ፄጋዳ፥ “አስታማረይ ይድ ነና ኮዬስ” ያጋሱ።

²⁹ ማይራማ ሄሳ ስእዳ ዎደ ኤለሳ ደንዳ ኤቃዳ የሱሳኮ ባሱ።

³⁰ ሄ ሳተን የሱሲ ማርታራ ጋሄትዳ በሳን ደኤስ፤ ቡሮ ጉታ ጋክቤና።

³¹ ማይራሞ ምንሸ ኢራ ሶን ደእያ አይሁደት፥ እያ ደንዳ ኤቃዳ ኤለሳዳ ካረ ከይዳይሳ በእድ፥ ዱፎ ባዳ ዬካናዉ ሀንያ ዳንን እዮ ካልድ ከይዶሶና።

³² ማይራማ የሱሲ ደእያሱዋ ባዳ እያ በእዳ ዎደ እያ ቶሁዋ ቦላ ኩንዳዳ፥ “ጎዳዉ፥ ኔኒ ሀይሳን ደእዳባ ግድያኮ ታ እሻይ ሀይቀናሽን” ያጋሱ።

³³ የሱሲ ማይራማነ ኢራ ደእያ፥ አይሁደት ዬከይሳ በእድ፥ ባ ዎዛናን ዳሮ ሴለትድ፥

³⁴ “አዉን ሞግደቲ?” ያግድ ኦይችን፥ “ጎዳዉ፥ ያዳ በአ” ያግድ ዛርዶሶና።

³⁵ የሱሲ አፉፅስ።

³⁶ ሄሳ ግሾ፥ አይሁደት፥ “እ አላዛራ አይ መላ ዶስያኮ በእተ” ያግዶሶና።

³⁷ ሽን ኤንታፈ እሶት እሶት፥ “ሀይስ ቆቅያ ፄልስዳይስ ሀ አደይ ሀይቆና መላ ኦናዉ ዳንዳኤነሽን?” ያግዶሶና።

አላዛር ሀይቆፐ ደንዱዋ

³⁸ ቃስካ የሱሲ ሴለትድ፥ አላዛር ሞገትዳ ዱፉዋ ብስ። ሄ ዱፎይ ሹቻን ጎርደትዳ ጎንጎሎ።

³⁹ የሱሲ፥ “ሹቻ ደንተ” ያግድ ኪትስ። ማርታ፥ “ጎዳዉ፥ እ ሀይቆሳፐ ኦይዱ ጋላስ ግድዳ ግሾ፥ ሀእ ፅንቃና” ያጋሱ።

⁴⁰ የሱሲ ማርታኮ፥ “ነ አማንያባ ግድኮ ፆሳ ቦንቹዋ በአናይሳ ታኒ ነዉ ኦዳብክና?” ያግስ።

⁴¹ ኤንቲ ሹቻ ደንን የሱሲ ሳሎ ፑደ ፄልድ፥ “አዋዉ፥ ታና ነ ስእዳ ግሾ ነና ጋላታይስ።

⁴² ነ ኡባ ዎደ ታና ስኤይሳ ታኒ ኤራይስ። ሽን ሀይሳን ኤቅዳ አሳይ ኔኒ ታና ኪትዳይሳ አማናና መላ ታኒ ኤንታ ግሾ ሀይሳ ጋይስ” ያግስ።

⁴³ የሱሲ ሄሳ ግዳፐ ጉየ፥ ባ ቃላ ቁ ኦድ፥ “አላዛራ፥ ሃ ከያ!” ያግስ።

⁴⁴ ሀይቅዳ አደይ ዚትዳ መላ ኩሸይነ ቶሆይ ሻሎን ቃሸትድ ደእሽን እያ አይፈይ ካረይ ጎዘትዳ መላ ዱፉዋፐ ከይስ። የሱሲ ኤንታ፥ “ብርሽተ፥ ቦ ጊተ!” ያግስ።

ክርስቶሳ ቦላ ማቀትዶሶና

⁴⁵ ሄሳ ግሾ፥ ማይራምኮ ይዳ አይሁደታፐ ዳሮት የሱሲ ኦዳይሳ በእድ እያ አማንዶሶና።

⁴⁶ ሽን ኤንታፈ እሶት እሶት ፋርሳወታኮ ብድ የሱሲ ኦዳይሳ ኤንታዉ ኦድዶሶና።

⁴⁷ ሄሳፈ ጉየ፥ ካህነ ሀላቃትነ ፋርሳወት ሻንጉዋ ሺሽድ፥ “ሀ አደይ ዳሮ ማላታታ ኦያ ግሾ ኑ አይ ኦኖ?

⁴⁸ ኑኒ እያ ስእ ግድ አግኮ አሳ ኡባይ እያ አማናና። ቃስ ሮመ ቢታ አሳት ይድ ኑ ፆሳ ኬነ ኑ ደርያ ይሳና” ያግዶሶና።

⁴⁹ ኤንታፈ እሶይ ቃያፋ ገይስ፥ ሄ ላይ ካህነ ሀላቃ ግድዳይስ፥ “ህንተ አይኮካ ኤረከታ!

⁵⁰ አሳ ኡባይ የይሳፈ አሳ ኡባ ግሾ እስ አስ ሀይቀይስ ሎኦ ግደይሳ ኤረከቲ?” ያግስ።

⁵¹ እ ሄሳ ባፐ ግቤና። ሽን ሄ ላይ ካህነ ሀላቃ ግድያ ግሾ፥ የሱሲ አይሁደ አሳ ግሾ ሀይቃናዉ በሰይሳ ትንብተ ኦድስ።

⁵² ቃስ የሱሲ አይሁደ አሳ ፃላላስ ግዶናሽን ላለትድ ደእያ ፆሳ አሳ ኡባ እስፈ ሺሻናዉነ እስ አስ ኦናዉ ሀይቃና።

⁵³ ሄ ጋላሳፐ ዶምድ ኤንቲ እያ ዎናዉ ማቀትዶሶና።

⁵⁴ ሄሳ ግሾ፥ የሱሲ አይሁደታ ግዶን ቆንጨን ስመረትቤና። ሽን መላ ቢታ ማታን ደእያ ኤፍሬማ ጉታ ብስ። ባ ታማረታራ ሄ በሳን ጋምእስ።

⁵⁵ አይሁደት ቦንችያ ፓስካ ጋላሳይ ማትስ። ቃስ ዳሮ አሳይ ባንታና ጌሻናዉ ፓስካ ቦንችያ ጋላሳይ ጋካናፐ ስን ሄ ቢታፈ የሩሳላመ ብዶሶና።

⁵⁶ ኤንቲ ፆሳ ኬን ኤቅድ የሱሳ ዩሳ ናግያ ግሾ፥ “አይ ቆፔቲ? የሱሲ ባልያ ቦንቻናዉ ዬኔ?” ያግድ እሶይ እሱዋ ኦይችዶሶና።

⁵⁷ ካህነ ሀላቃትነ ፋርሳወት የሱሳ ኦይካናዉ፥ እ ደእያሱዋ ኤርያ ኦንካ ባንታዉ ኦዳና መላ ኪትዶሶና።