Yohaanisa 10 - ጌሻ ማፃፋ

የሱሲ ሎኦ ሄንንቾ

¹ የሱሲ፥ “ታኒ ህንተዉ ቱማ ኦዳይስ፤ ዶርሳ ግርበ ግዶ ፐንገራ ግዶና ሀራሶራ ገልያ ኦንካ ካይሶነ ፓንጋ።

² ሽን ፐንገራ ገለይስ ዶርሳታ ሄመይሳ።

³ ፐንግያ ናገይስ እያዉ ፐንግያ ዶዬስ፤ ዶርሳትካ እያ ቃላ ስኦሶና። እ ባ ዶርሳታ ኤንታ ሱንን ሱንን ፄጌስ፤ ኤንታ ካለድ ካረ ከሴስ።

⁴ እ ባ ዶርሳታ ካረ ከስዳፐ ጉየ ኤንታ ስንን ሄመቴስ። ኤንቲ እያ ቃላ ኤርያ ግሾ እያ ካሎሶና።

⁵ ሀራ ኡራ ቃላ ኤንቲ ኤሮና ግሾ እያፐ ባቃቶሶናፐ አትሽን፥ እያ ጌዶ ካሎኮና” ያግስ።

⁶ የሱሲ ኤንታዉ ሀ ሌምሱዋ ኦድስ፥ ሽን እ አይ ግዳኮ ኤንቲ አኬክቦኮና።

⁷ ዛሪድ የሱሲ ኤንታኮ፥ “ታኒ ህንተዉ ቱማ ኦዳይስ፤ ታኒ ዶርሳታስ ፐንገ።

⁸ ታፐ ስን ይዳ ኡባይ ካይሶነ ፓንጋ፥ ሽን ዶርሳት ኤንታ ስእቦኮና።

⁹ ፐንገይ ታና፤ ታ ባጋራ ገልያ ኦንካ አታና። እ ታ ባጋራ ገላናነ ከያና፤ ሎኦ ሄመትያ በሲ ደማና።

¹⁰ ካይሶይ ካይሶታናዉ፥ ሹካናዉነ ይሳናዉ ዬስፐ አትሽን፥ ሀራባስ ዬና። ታኒ ኤንታዉ ደኦይ ዳና መላነ ኩምድ ፓላሀና መላ ያስ።

¹¹ “ታኒ ሎኦ ሄንንቾ፤ ሎኦ ሄንንቾይ ባ ዶርሳታ ግሾ ባ ሸምፑዋ አድ እሜስ።

¹² ኡነ ሄምያ አስ ዶርሳታ ጎዳነ ሄንንቾ ግዶና ግሾ ሱመይ ያ ዎደ በእድ ዶርሳታ አግድ ቤስ። ሄሳ ግሾ፥ ሱመይ ዶርሳታ ኦይክድ ላሌስ።

¹³ ኡነ ሄመይስ ሚሸስ ሄምያ ግሾነ ዶርሳታባይ እያ ቆፍሶና ግሾ ዶርሳታ አግድ ባቃቴስ።

^14-15 “ታኒ ሎኦ ሄንንቾ። ታ አዋይ ታና ኤረይሳዳ ታንካ ታ አዋ ኤራይስ። ሄሳዳካ፥ ታኒ ታ ዶርሳታ ኤራይስ፤ ታ ዶርሳትካ ታና ኤሮሶና። ታኒ ታ ዶርሳታ ግሾ ታ ሸምፑዋ አ እማይስ።

¹⁶ ሀ ዉድያን ባይና ሀራ ዶርሳት ታዉ ደኦሶና። ታኒ ኤንታካ ኤሀናዉ በሴስ። ኤንቲ ታ ቃላ ስአና፤ ኤንቲ እስ ዉደ ግዳና፤ ሄንንቾይካ እሱዋ።

¹⁷ “ታኒ ታ ሸምፑዋ አ እማዳ ዛራ ኤክያ ግሾ ታ አዋይ ታና ዶሴስ።

¹⁸ ታ ዶሳዳ ታ ሸምፑዋ አ እማይስፐ አትሽን፥ ታፐ ኦንካ ኤከና። ታኒ ታ ሸምፑዋ አ እማናዉነ ዛራ ኤካናዉ ማት ታዉ ደኤስ። ታኒ ኦና መላ ታ አዋይ ታና ኪትዳይስ ሀይሳ” ያግስ።

¹⁹ ሄሳ እ ግዳ ግሾ፥ አይሁደታ ግዶን ቃስካ ሻከተ መትስ።

²⁰ ኤንታፈ ዳርያ ባጋይ፥ “እያን ቱና አያናይ ደኤስ! እ ጎዬስ! እ ግያባ አይስ ስኤቲ?” ያግዶሶና።

²¹ ሀራት ቃስ፥ “ፃላሄይ ኦይክዳ አስ ሀይሳዳ ኦደተና። ቱና አያን ቆቀ አይፈ ፄልሳናዉ ዳንዳእዬ?” ያግዶሶና።

የሱሲ አሳ ናአ

²² የሩሳላመን ፆሳ ኬ አንጅስዳ ጋላሳታ ቦንችያ ባለይ ጋክስ፤ ሄ ዎደ ሳእ ባልጎ።

²³ የሱሲ ፆሳ ኬን ሶሎሞነ ባራንዳን ስመረቴስ።

²⁴ አይሁደት የሱሳ ዩሾን ሺቅ ኤቅድ፥ “ኔኒ ኑና አዉደ ጋካናዉ ስራ ዎኔ? ኔኒ ክርስቶሳ ግድኮ አነ ኑስ ጌሻዳ ኦዳ” ያግዶሶና።

²⁵ የሱሲ ዛሪድ ኤንታኮ፥ “ታኒ ህንተዉ ኦዳስ፤ ሽን ታና አማነከታ። ታኒ ታ አዋይ ታዉ እምዳ ማታን ኦያ ኦሶይ ታባ ማርካቴስ።

²⁶ ሽን ታኒ ህንተዉ ኦድዳይሳዳ ህንተ ታ ዶርሰ ግዶና ግሾ አማነከታ።

²⁷ ታ ዶርሳት ታ ቃላ ስኦሶና። ታኒ ኤንታ ኤራይስ፤ ኤንትካ ታና ካሎሶና።

²⁸ ታኒ ኤንታዉ መርና ደኡዋ እማይስ፤ ኤንቲ ኡባራካ ዮኮና። ኦንካ ታ ኩሸፐ ኤንታ ቦንቅ ኤካናዉ ዳንዳኤና።

²⁹ ኤንታ ታዉ እምዳ ታ አዋይ ኡባፈ አስ ኦንካ ታ አዋ ኩሸፐ ኤንታ ቦንቅ ኤካናዉ ዳንዳኤና።

³⁰ ታነ ታ አዋይ እስኖ” ያግስ።

³¹ አይሁደት የሱሳ ጫዳናዉ ቃስካ ሹች ደንዶሶና።

³² የሱሲ ኤንታኮ፥ “ታኒ ኦና መላ ታ አዋይ ታዉ እምዳ ዳሮ ሎኦ ኦሶታ ህንተና ኦ በሳስ። ሄሳታፐ አዉሳ ግሾ ታና ሹቻን ጫዳናዉ ኮዬቲ?” ያግስ።

³³ አይሁደት ዛሪድ፥ “ኑኒ ነና ነ ሎኦ ኦሶ ግሾ ሹቻን ጫዳናዉ ኮዮኮ። ሽን ኔኒ ፆሳ ጫይያ ግሾነ አሰ ግዳሸ ኔኒ፥ ነና ፆሰ ግያ ግሾሳ” ያግዶሶና።

³⁴ የሱሲ ዛሪድ፥ “ጌሻ ማፃፋን ፆሳይ፥ ‘ህንተ ፆሳታ’ ግዳይስ ፃፈትቤኔ?

³⁵ ጌሻ ማፃፋይ መርናዉ ላመተና። ፆሳይ ባ ቃላ እምዳ አሳታ፥ ‘ፆሳታ’ ግድ ፄግኮ፥

³⁶ አዋይ ዶርድ ሀ አላምያ ኪትዳ ታና ፆሳ ናአ ዋትድ ‘ፆሳ ጫያሳ’ ያገቲ?

³⁷ ታኒ ታ አዋይ ኦይሳ ኦና እፅኮ ታና አማኖፕተ።

³⁸ ሽን ታኒ ኦያባ ግድኮ ህንተ ታና አማኖና እፅኮካ፥ ታ አዋይ ታናን ደኤይሳነ ታካ ታ አዋን ደኤይሳ ህንተ ኤራና መላ ታ ኦሱዋ አማንተ” ያግስ።

³⁹ ቃስካ ኤንቲ እያ ኦይካናዉ ኮይዶሶና፥ ሽን እ ኤንታፈ ከስ ኤክስ።

⁴⁰ ዮሃንስ ካሰ ፃማቅያ በሳ፥ ዮርዳኖሰ ሻፋፐ ሄፍን የሱሲ ፕንድ ያን ደእስ።

⁴¹ ዳሮ አሳይ የሱሳኮ ይድ፥ “ዮሃንስ ማላታ ኦቤና፥ ሽን እ ሀ አድያባ ኦድዳባይ ኡባይ ቱማ” ያግዶሶና።

⁴² ያን ዳሮ አሳይ የሱሳ አማንዶሶና።