Yohaanisa 1 - ጌሻ ማፃፋ

ደኦ ቃላ

¹ ቃላይ ኮይሮ ደኤስ። ቃላይካ ፆሳራ ደኤስ፤ ሄ ቃላይ ፆሳ።

² ኮይሮፐ ቃላይ ፆሳራ ደኤስ።

³ ፆሳይ ኡባባ ቃላ ባጋራ መስ። መትዳባፐ እሶይካ እያ ባጋራ መቶናባይ ባዋ።

⁴ እያን ደኦይ ደኤስ፤ ሄ ደኦይ አሳስ ፖኦ።

⁵ ፖኦይ ማን ፖኤስ፤ ማይ ፖኡዋ ፆንቤና።

⁶ ፆሳይ ኪትዳ፥ እስ ዮሃንሳ ጌተትያ አስ ደኤስ።

⁷ አሳ ኡባይ ፖኡዋን አማናና መላ እ ፖኦስ ማርካ ግድድ ይስ።

⁸ እ ፖኡዋባ ማርካታናዉ ይስፐ አትሽን፥ ባ ሁጰን ፖኦ ግደና።

⁹ አሳ ኡባስ ፖእስያ ቱማ ፖኦይ አላምያ ዬስ።

¹⁰ ቃላይ አላመን ደእስ። ፆሳይ ቃላን አላምያ መስ፥ ሽን አላመይ እያ ኤርቤና።

¹¹ እ ባ አሳኮ ይስ፥ ሽን እያ አሳይ እያ ኤክቦኮና።

¹² ሽን እ ባና ኤክዳይሳታስነ እያ ሱንን አማንዳይሳታስ ፆሳ ናይታ ግዳና መላ ማታ እሚስ።

¹³ ኤንቲ ፆሳፈ የለትዶሶናፐ አትሽን፥ አስ የለትያ ዎጋን ዎይኮ አደ ሸነን ዎይኮ አሳ አሞን የለትቦኮና። ፆሳይ እ ኤንታ አዋ።

¹⁴ ቃላይ አሰ ግድስ፤ አ ኬሀተነ ቱማ ኩምድ ኑ ግዶን ደእስ። እ አዋስ እስ ናኣ ግድድ ኤክዳ እያ ቦንቹዋ ኑኒ በእዳ።

¹⁵ ዮሃንስ እያባ ማርካትስ። ባ ቃላ ቁ ኦድ፥ “ታኒ፥ ‘ታፐ ጉየራ የይስ ታፐ ካሰ ደእያ ግሾ ታፐ አስ’ ጋዳ ማርካትዳይስ ሀይሳ” ያግስ።

¹⁶ ኑኒ ኡባይ እያ አ ኬሀተ ኩመፈ አንጆ ቦላ አንጆ ኤክዳ።

¹⁷ ፆሳይ ህግያ ሙሰ ባጋራ እሚስ፥ ሽን አ ኬሀተይነ ቱማተይ የሱስ ክርስቶሳ ባጋራ ይስ።

¹⁸ ፆሳ በእዳ አስ ኦንካ ባዋ፤ ባ አዋ ማታን ደእያ እስ ናኣ ፃላል ባዉ ፆሰ ግድዳይስ እያ ቆንጭስስ።

ፃማቅያ ዮሃንሳ ማርካተ

¹⁹ የሩሳላመን ደእያ አይሁደ ሀላቃት፥ ካህነታነ ሌወታ፥ “ኔኒ ኦኔ?” ግድ፥ ዮሃንሳ ኦይቻና መላ እያኮ ኪትን፥ ዮሃንስ ኤንታዉ ማርካትዳ ማርካተይ ሀይሳ።

²⁰ ዮሃንስ፥ “ታኒ ክርስቶሳ ግድከ” ያግድ፥ ጌሽድ ማርካትስፐ አትሽን፥ ካድቤና።

²¹ ኤንቲ፥ “ያትን፥ ኔኒ ኦኔ? ኔኒ ኤልያሰዬ?” ያግድ ኦይችዶሶና። ዮሃንስ፥ “አካይ፥ ግድከ” ያግስ። ቃስ ኤንቲ፥ “ኔኒ ያና ጌተትዳ ናብያዬ?” ያግድ ኦይችዶሶና። ዮሃንስ፥ “አካይ” ግድ ዛርስ።

²² ያትን፥ “ኔኒ ኦኔ? ኑኒ ኑና ኪትዳይሳታስ ኦዳና መላ ኔኒ ነና ኦና ጋይ?” ያግዶሶና።

²³ ዮሃንስ ዛሪድ፥ “ናብያ እሳያስ ግዳይሳዳ፥ “ ‘ጎዳ ኦግያ ሱርስተ!’ ግድ መላ ቢታን ዋስያ ኡራ ቃላይ ታና” ያግስ።

²⁴ ቃስ ፋርሳወት ኪትዳ አሳት

²⁵ ዮሃንሳኮ፥ “ኔኒ ክርስቶሳ ዎይኮ ኤልያሳ ዎይኮ ናበ ግዶና እፅኮ፥ ያትን አይስ ፃማቃይ?” ግድ ኦይችዶሶና።

²⁶ ዮሃንስ ዛሪድ፥ “ታኒ ሃን ፃማቃይስ፥ ሽን ህንተ ኤሮና አስ ህንተ ግዶን ኤቅስ።

²⁷ እ ታፐ ጉየራ ዬስ። ታኒ ሀር አቶሽን እያ ጫማ ዎዶሩዋ ብላናዉ በስከ” ያግስ።

²⁸ ሄስ ኡባይ ዮርዳኖሰ ሻፋፐ ሄፍንን፥ ብታነ ካታማን፥ ዮሃንስ ፃማቅያ በሳን ሀንስ።

የሱሲ ፆሳ ዶርሰ

²⁹ ዮሃንስ ዎንተ ጋላስ የሱሲ ባኮ ይሽን በእድ፥ “አላምያ ናጋራ ቁችያ ፆሳ ዶርሳይ ሀይሳ!

³⁰ ታኒ፥ ‘ታፐ ጉየራ እስ አስ ያና። እ ታፐ ካሰ ደእያ ግሾ ታፐ አስ’ ጋዳ ኦድዳይስ ሀይሳ።

³¹ እ ኦነኮ ታኒ ኤርከ። ሽን እስራኤለ አሳስ እያ ቆንጭሳናዉ ሃን ፃማቃሸ ያስ” ያግስ።

³² ዮሃንስ ሀይሳዳ ያግድ ማርካትስ፦ “ጌሻ አያናይ ሳሎፐ ሆለዳ ዎሽንነ እያራ ደእሽን በአስ።

³³ ሄስ ሀናናፐ ካሰ ታኒ እያ ኤርከ። ሽን ሃን ፃማቃናዉ ታና ኪትዳ ፆሳይ፥ ‘ጌሻ አያናይ ዎድ እያራ ደእሽን ኔኒ በአናይስነ ጌሻ አያናን ፃማቃናይስ እያ’ ያግድ ታዉ ኦድስ።

³⁴ ታኒ ሄስ ሀንሽን በአዳ፥ እ ፆሳ ናኣ ግድዳይሳ ማርካታይስ” ያግስ።

ኮይሮ የሱሳ ታማረታ

³⁵ ቃስ ዎንተ ጋላስ ዮሃንስ ባ ታማረታፐ ናምአታራ እስፈ ኤቅስ።

³⁶ የሱሲ አሽን፥ ዮሃንስ በእድ፥ “ፆሳ ዶርሳይ ሀይስሽ!” ያግስ።

³⁷ ዮሃንሳ ናምኡ ታማረት ዮሃንስ ገይሳ ስእድ የሱሳ ካልዶሶና።

³⁸ የሱሲ ባና ካለይሳታ ጉየ ስም በእድ፥ “አይ ኮዬቲ?” ያግድ ኦይችስ። ኤንቲ ዛሪድ፥ “አስታማርያዉ፥ ኔኒ አዉን ደአይ?” ያግዶሶና።

³⁹ የሱሲ ኤንታኮ፥ “ሃ ይድ በእተ” ያግስ። ኤንቲ ብድ እ ደእያሱዋ በእዶሶና። ሄ ጋላስ ሳእ ታሙ ሳተ ሄራ ግድያ ግሾ እያ ማታን ፔእዶሶና።

⁴⁰ ዮሃንስ ግዳይሳ ስእድ፥ የሱሳ ካልዳ ናምኡ ታማረታፐ እሶይ፥ ስሞን ጰፅሮሳ እሻ እንድርያሳ።

⁴¹ እንድርያስ ኮይሮ ባ እሻ ስሞናራ ጋሄትድ፥ “ኑኒ ክርስቶሳ ደምዳ” ያግስ።

⁴² እንድርያስ ስሞና የሱሳኮ ኤህስ። የሱሲ ስሞና በእድ፥ “ኔኒ ዮና ናኣ ስሞና፤ ነ ሱንይ ኬፋ ግድ ፄገታና” ያግስ።

ፍልጶሳነ ናትናኤላ ፄገተ

⁴³ ዎንተ ጋላስ የሱሲ ጋልላ ቢታ ባናዉ ቆፋ ቃችስ። እ ፍልጶሳራ ጋሄትድ፥ “ታና ካላ!” ያግስ።

⁴⁴ ፍልጶስ፥ እንድርያስነ ጰፅሮስ ደእዳ ቤተሳይዳ ካታማፐ ይዳ አሰ።

⁴⁵ ፍልጶስ ናትናኤላራ ጋሄትድ፥ “ሙሰይ ህገ ማፃፋን፥ ቃስ ናበትካ እያባ ፃፍዳ ዮሰፋ ናኣ ናዝረተ የሱሳ ኑኒ ደምዳ” ያግስ።

⁴⁶ ናትናኤል ዛሪድ፥ “ናዝረተ ካታማፐ ሎኦባይ ከያናዉ ዳንዳኢ?” ያግስ። ፍልጶስ፥ “ያዳ በአ” ያግስ።

⁴⁷ ናትናኤል ባኮ የይሳ የሱሲ በእድ፥ “ገነይ ባይና ቱማ እስራኤለ አስ ሀይሳ!” ያግስ።

⁴⁸ ናትናኤል የሱሳኮ፥ “ኔኒ ታና አዉን ኤራይ?” ያግስ። የሱሲ ዛሪድ፥ “ፍልጶስ ነና ፄጋናፐ ስን፥ ኔኒ ባላሰ ም ጋርሳን ደእሽን ታኒ ነና በአስ” ያግስ።

⁴⁹ ናትናኤል ዛሪድ፥ “አስታማርያዉ፥ ኔኒ ፆሳ ናኣ! ኔኒ እስራኤለ ካዎ!” ያግስ።

⁵⁰ የሱሲ እያኮ፥ “ታኒ ነና ባላሰ ም ጋርሳን በአስ ግዳ ግሾ አማናይ? ኔኒ ሀይሳፈ አያባ በአና!” ያግስ።

⁵¹ ቃስ የሱሲ፥ “ታኒ ህንተዉ ቱማ ኦዳይስ፤ ሳሎይ ዶየትን፥ ፆሳ ኪታንቾት አሳ ናኣ ቦላ ከይሽንነ ዎሽን ህንተ በአና” ያግስ።