Yihuda 1 - ጌሻ ማፃፋ

¹ ታኒ ይሁድ፥ የሱስ ክርስቶሳ አይለይ፥ ያይቆባ እሻይ፥ ፆሳይ ፄግዳይሳታስ፥ ፆሳ አዋይ ዶሰይሳታስነ የሱስ ክርስቶሳን ናገትዳይሳታስ ሀ ዳብዳብያ ፃፋይስ።

² ማሮተ፥ ሳሮተነ ሲቆይ ህንተዉ ኩሞ።

ዎርዶ አስታማረታ

³ ታ ሲቆ እሻቶ፥ ኑኒ እስፈ ሻከትያ አቶተባ ህንተዉ ፃፋናዉ ታኒ ዳሮ አሞታስ። ሽን አማንያ አሳስ እስቶሆነ ዉርሰ ጋካናዉ እመትዳ አማኑዋስ ኦለታና መላ ህንተና ዞራሸ ፃፋናይስ ታዉ ኮሽያባ ግድስ።

⁴ ኤንታ ፕርዳይ በንፐ ፃፈትድ ኡትዳ፥ እስ እስ አሳት ኦንካ ኤሮና ህንተ ግዶ ገልዶሶና። ኤንቲ ፆሳ ኤሮናይሳታ፥ ኑ ፆሳ አ ኬሀተ ላይማታናዉ ጎኤትያ ኦገ ኦድ ኤኮሶና። ባ ፃላላ ካዎ ግድዳ፥ ኑ ጎዳ የሱስ ክርስቶሳ ካዶሶና።

⁵ ሽን ህንተ ሀ ኡባ ኤርያባ ግድኮካ፥ ጎዳይ እስራኤለ አሳ ግብፀ ቢታፈ ዋት ከስዳኮ፥ ቃስ ጉየፐ አማኖናይሳታ ይስዳይሳ ታ ህንተና አኬክሳናዉ ኮያይስ።

⁶ ባንታ ደእያሱዋ አግድ፥ ባንታዉ እመትዳ ማታ ናግቦና ኪታንቾታ፥ ግታ ፕርዳ ጋላሳይ ጋካናዉ ፆሳይ ኤንታ ማፐ ጋርሳን መርና ሳንላታን ቃች ዎስ።

⁷ ሄሳዳ፥ ሶዶመነ ጋሞራ አሳይነ ኤንታ ማታን ደእያ ካታማታን ደእያ አሳይ ላይማትዶሶና፤ ላይማተራ ጋሄትያ ቱናተ ኦዶሶና። ኤንቲ መርና ታማን ፕርደታናይሳታስ ሌምሶ ግድዶሶና።

⁸ ሄሳዳካ፥ ሀ አሙሀንቾት ባንታ አሳተ ቱንሶሶና፤ ማታ አዋታ ካኦሶና፤ ሳሎ መተታ ጫዮሶና።

⁹ ሽን ኪታንቾታ ሀላቃይ ምካኤል ሙሰ አሃስ ፃላሄራ ፓላምዳ ዎደ፥ “ጎዳይ ነና ሴሮ” ያግስፐ አትሽን፥ እያ ቦላ ጫሻ ቃላ ኦድድ ሞታናዉ ኮይቤና።

¹⁰ ሽን ሀ አሳት ባንታዉ ኤሮናባ ኡባ ጫዮሶና፤ ቃስ ኤንቲ ዎዛን ባይና መሄዳ መን ኤርያ ኤራይ፥ እ ኤንታና ይሳና።

¹¹ ኤንታና አየ! ኤንቲ ቃየላ ኦግያን ብዶሶና። ሚሸ ኮይድ ባላማ ባላን ኩንድዶሶና። ቆረ ጌተትያ አደይ ፆሳ ቦላ ደንድዳይሳዳ ኤንቲ ፆሳ ቦላ ደንድድ ይዶሶና።

¹² ሀ አሳት፥ ህንተ ሲቆ ግብራ ምያ በሳን ህንተራ ኡትያ ዎደ ዬል ባይና ካዉሻታ። ኤንቲ ባንታና ፃላላ ሄመይሳታ። ኤንቲ ጫርኮይ ኤፍያ እር ባይና ሻራ መላ። ቃስ አይፈ ዎደን አይፈ አይፎና፥ ፃጶራ ሾደትድ፥ ናምኡ ቶሆ መልዳ ም መላ።

¹³ ኤንቲ ሀንቀትዳ አባ ዙልያ መላ ባንታ ፖኩዋ ጎፖንተይሳታ። ኤንቲ መርናዉ ሳካና ማይ ናግያ ቶይላትያ ፆልንቶታ።

¹⁴ አዳመፐ ዶምድ፥ ላፑን የለታ ግድዳ ሄኖከይ፥ ሀ አሳታባ ትንብተ ኦድሸ፥ “ሄኮ፥ ጎዳይ፥ ባ ዳሮ ሙኩሉ ጌሻታራ ያና።

¹⁵ አሳ ኡባ ፕርዳና፤ ጌላታ ኡባ ኤንቲ ኦዳ ኢታ ኦሶ ኡባ ግሾነ ማካላተን ኤንቲ ፆሳ ቦላ ኦደትዳ ኢታ ኦዳ ኡባ ግሾ ፕርዳና” ያግስ።

¹⁶ ሄ አሳት ኡባ ዎደ ዙዙመይሳታነ ኦዳ ኮየይሳታ። ቃስ ባንታ ኢታ አሙዋ ካሎሶና፤ ባንታናን ጬቆሶናነ ባንታና ጎእያባ ደማናዉ ሀራታ ሳቦሶና።

ዉርሰ ዞረ

¹⁷ ሽን ታ እሻቶ፥ ኑ ጎዳ የሱስ ክርስቶሳ ሀዋረት ካሰ ህንተዉ ኦድዳ ቃላ አኬክተ።

¹⁸ ኤንቲ፥ “ዉርሰ ዎድያን፥ ባንታ አሙዋ ካልድ ቶቸይሳት ያና” ያግዶሶና።

¹⁹ ሄ አሳት አሳ ግዶን ሻሄተ መይሳታ፥ ባንታ አሾ አሙዋስ ሃረተይሳታነ ጌሻ አያናይ ባይናይሳታ።

²⁰ ሽን ታ እሻቶ፥ ጌሽ ግድዳ ህንተ አማኑዋን ህንተና ድቻናዉ ምንተ፤ ቃስ ጌሻ አያና ዎልቃን ዎስተ።

²¹ ህንተና መርና ደኡዋኮ ጋያ ኑ ጎዳ የሱስ ክርስቶሳ ማሮተ ናግሸ ህንተና ፆሳ ሲቁዋን ናግተ።

²² ስይ ደእያ አሳስ ቃትተ።

²³ እስ እስ አሳታ ታማፐ ከስ ኤክተ። ቃስ ኢታ አሞን ቱንዳ ኤንታ ማኡዋ እፅሸ ሀራታስ ያሻን ቃትተ።

ጋላታ ዎሳ

²⁴ ህንተ ኩንዶና መላ ናጋናዉ ቦረይ ባይናይሳታነ ግታ ኡፋይሳን ኩምዳይሳታ ኦድ ባ ቦንቹዋ ስንን ህንተና ሺሻናዉ ዳንዳእያ፥

²⁵ ኑና አሽያ እስ ፆሳስ፥ ኑ ጎዳ የሱስ ክርስቶሳ ባጋራ ቦንቾይ፥ ግታተ፥ ዎልቅነ ማት፥ ካሰካ፥ ሀእካ፥ መርናዉካ እያዉ ግዶ። አምንእ።