Tito 2 - ጌሻ ማፃፋ

ዱማ ዱማ ኪታ

¹ ሽን ኔኒ ሱረ ትምርትያ ጳልቆና ትምርተ ታማርሳናዉ በሴስ።

² ጭማ አደት ባንታና ሃረይሳታ፥ ዎፑ ግዳይሳታ፥ ቦንቸትዳይሳታ፥ አማኖን፥ ሲቆንነ ዳንዳአን፥ ምኖ ግዳና መላ ዞራ።

³ ሄሳዳካ፥ ጭማ ማጫሳይ ባንታ ዱሳን ጌሻታ፥ ዝግሮናይሳታ፥ ዎይነ ኡሻን ሃረቶናይሳታነ ሎኦባ ታማርሰይሳታ ግዳና መላ ታማርሳ።

⁴ ኤንቲ ሄሳዳ ሀንኮ ያላጋ ማጫሳይ ባንታ አዝናታነ ባንታ ናይታ ሲቃና መላ ታማርሳናዉ ዳንዳኦሶና።

⁵ ፆሳ ቃላይ ቦረቶና መላ ባንታና ሃረይሳታ፥ ጌሻታ፥ ባንታ ሶን ኦይሳታ፥ ኬሀታነ ባንታ አዝናታስ ኪተተይሳታ ግዳና መላ ያላጋ ማጫሳ ታማርሶና።

⁶ ሄሳዳካ፥ ዶን አደት ባንታና ሃራና መላ ዞራ።

⁷ ኔኒ ነ ሁጰን ሎኦ ኦሶ ኡባን ኤንታዉ ሌምሶ ግዳ። ኔኒ ነ ትምርትያን ኤቅዳይሳነ አማነትዳይሳ ግዳ።

⁸ ኑ ሞርከት ኑና ዝግራናዉ ጋሶያባይ ኤንታዉ ይን ኤንቲ ዬላታና መላ ኔኒ ቦረቶና ሎኦ ኦዳ ኦዴታ።

⁹ አይለት ኡባባን ባንታ ጎዳታስ ኪተታና መላ ኤንታ ኡፋይሳና መላነ ኤንታራ ፓላሞና መላ ዞራ።

¹⁰ ኤንቲ ባንታ ጎዳታፐ ካይሶቶፖ። ሄስካ፥ ኑና አሽያ ፆሳ ትምርተይ፥ ኡባ ኦገን ዶሰትዳይሳ ግዳና መላ ባንታ ኦያ ኦሱዋን አማነተይሳታ ግደይሳ በሳና መላ ኤንታ ዞራ።

¹¹ አሰ አሽያ ፆሳ አ ኬሀተይ አሳ ኡባስ ቆንጭስ።

¹² ሄ አ ኬሀተይ፥ ኑ ናጋራነ ሀ አላምያ አሙዋ አግድ፥ ሀ ዎድያን ኑና ሃርድ፥ ቱማ አያና ደኡዋንነ ፅሎተን ዳና መላ ኑና ታማርሴስ።

¹³ ኑኒ አንጀትዳ ኡፋይሳ ግድዳ ግታ ፆሳነ ኑና አሽያ የሱስ ክርስቶሳ ቦንቾ ቆንጨ ናጎስ።

¹⁴ ኢታ ኦሶ ኡባፈ ኑና ዎዛናዉነ ሎኦባ ኦናዉ አሞትያ ባ ጌሻ አስ ከሳናዉ ኑ ግሾ ባና አድ እሚስ።

¹⁵ ኔኒ ሀይሳ ታማርሳ፤ ኩመ ማታን ዞራ፥ ሴራ፤ ኦንካ ነና ካፖ።