Tito 1 - ጌሻ ማፃፋ

¹ የሱስ ክርስቶሳ ሀዋረይነ ፆሳ አይለይ፥ ጳዉሎስ፥ ፃፍዳ ዳብዳብያ። ፆሳይ ዶርዳ አሳ አማኑዋ ድቻናዳነ ቱማ አያና ደኡዋ ዋንድ ዳነኮ በሲያ ቱማ ኤራኮ ኤንታ ካለናዉ ታኒ ኪተታስ።

² ሄ አማኖይነ ኤራተይ መርና ደኡዋ ኡፋይሳ ቦላ ዘምፕስ። ሄሳ ዳሮ ዎደፐ ስን ዎርዶቶና ፆሳይ ኑስ እማና ግድ ቃላ ገልስ።

³ ኑና አሽያ ፆሳይ ባ ዎደን ሀ ኪታ ኦዳና መላ ታዉ ሀዳራ እሚስ።

⁴ ኑ ኮ አማኑዋን ታ ቱማ ናኣ ግድዳ ትቶ፥ ፆሳ አዋፐነ ኑና አሽያ የሱስ ክርስቶሳፐ አ ኬሀተይ፥ ማሮተይነ ሳሮተይ ነዉ ግዶ።

ትቶይ ቃርፄሳን

⁵ ታኒ ነና ቃርፄሳን አጋዳ ይዳይ፥ ኔኒ አትዳባ ጊግሳናዳነ ታኒ ኪትዳይሳዳ ካታማ ኡባን ዎሳ ኬ ጭማታ ዶራና መላሳ።

⁶ ጭም ቦረቶናይሳ፥ እስ ማቸ አዝና፥ ማራ ዮን ዎይኮ ኪተተ እፆን አስ ቦሮና አማንያ ናይት ደእያ አስ ግዳናዉ በሴስ።

⁷ ዎሳ ኬ ጭም ፆሳ ኦሱዋ ሀዳራ ኤክዳ ግሾ፥ ቦረቶናይሳ፥ ኦቶርቶናይሳ፥ ኤለ ይሎቶናይሳ፥ ማቶናይሳ፥ ኦዳ መናይሳነ በሶና ጎአስ ዳፈቶናይሳ ግዳናዉ በሴስ።

⁸ ሽን እማ ሞከይሳ፥ ሎኦባ ኡባ ዶሰይሳ፥ አኬካንቾ፥ ፅሎ፥ ጌሽነ ባና ሃረይሳ ግዳናዉ በሴስ።

⁹ ሀራታ ሱረ ትምርትያን ምንናዉነ ሄ ትምርትያ እፀይሳታ ዛራናዉ ባ ታማርዳ ቱማ ቃላን ምንድ ኤቃናዉ በሴስ።

¹⁰ ኪተቶናይሳት፥ ፓና ኦዳ ኦደተይሳት፥ ጭመይሳት ኡባካ ቃፃረተ ዎጋ ናግያ ዳሮ አሳት ደኦሶና።

¹¹ ኤንቲ በሶና ኦገን ሚሸ ደማናዉ ኮይድ፥ ታማርሳናዉ በሶናባ ታማርስሸ ኬ አሳ ኡባ ኢስያ ግሾ ኤንታ ትምርትያ ተቃናዉ በሴስ።

¹² ኤንታ ናበታፐ እሶይ፥ “ቃርፄሳ አሳይ ኡባ ዎደ ዎርዶ ኦደቶሶና፤ ኢታ ዶአታነ አዛላ ያራምባታ” ያግስ።

¹³ ሀ ማርካተይ ቱማ ማርካተ። ሄሳ ግሾ፥ ኤንታዉ ቱማ አማኖይ ዳና መላ ኤንታ ሀንቀታ።

¹⁴ ቱማ እፅያ አሳ ትምርትያነ አይሁደታ ፓና ቶስያ ስኦና መላ ኤንታ ሴራ።

¹⁵ ባንታዉ ጌሽ ግድዳይሳታስ ኡባይ ጌሽ፥ ሽን ቱናታስነ አማኖናይሳታስ ኤንታ ቆፋይነ ካሀይ ቱንዳ ግሾ፥ ኤንታዉ አይብካ ጌሽ ግደና።

¹⁶ ኤንቲ ኑ ፆሳ ኤሮስ ጎሶና፥ ሽን ባንታ ኦሱዋን እያ ካዶሶና። ኤንቲ ፆሳን እፀትዳይሳታ፥ ኪተቶናይሳታነ ሎኦ ኦሶ ኡባስ ግዶናይሳታ።