Taybo 28 - ጌሻ ማፃፋ

ጋላሳ ያርሹዋ

¹ ጎዳይ ሙሰኮ፥

² “እስራኤለ አሳ ሀይሳዳ ያጋዳ ኪታ፤ ፁገትያ ሳውያ ካ ያርሾ ዎደን ዎደን ታዉ ያርሽተ።

³ ጎዳስ ታማን ፁገትድ ያርሸትያ ያርሾይ ሀይሳ፤ ኩመ ቦላራ ደእያ እስ ላይ ኩምዳ ናምኡ ማራዘታ ዎንታ ዎንታ ፁሳ ያርሾ ኦድ ያርሽተ።

⁴ ማራዘታፐ እሱዋ ዎንታ እሱዋ ቃስ ኦማርስ ያርሽተ።

⁵ ቃስ ሄ ማራዝያራ እስ ልትሮ ሻማሆ ዛይተን ሙኑቀትዳ እስ ክሎ ግራመ ሎኦ ግስተ ለ ካ ያርሾ ያርሽተ።

⁶ ሀይስ ጎዳ ኡፋይስያ ፁሳ ያርሾ። እካ ሲና ዙማ ቦላ ያርሸትዳ ኮይሮ ፁሳ ያርሾ።

⁷ ኮይሮ ማራዝያራ እስ ልትሮ ጫላ ዎይነ ኡሻ ያርሾ ኦድ ያርሾ በሳን ጎዳስ ጉስተ።

⁸ ኦማርስ ናምአን ማራዝያ ያርሽያ ዎደ ኮይሮይሳ መላ ካ ያርሹዋነ ኡሻ ያርሹዋ ጉጅድ ያርሽተ። እካ ጎዳ ኡፋይስያ ሳዎ ያርሾ ግዳና።”

ሳምባታ ያርሾ

⁹ “ሳምባታ ጋላስ ቦረይ ባይና እስ ላይ ኩምዳ ናምኡ ማራዘታ ዛይተን ሙኑቀትዳ ናምኡ ክሎ ግራመ ሎኦ ግስተ ለ ኤክድ ካ ያርሾነ ኡሻ ያርሾ ኦድ ያርሽተ።

¹⁰ ጋላስ ጋላስ ያርሸትያ ፁሳ ያርሹዋ ቦላ ሳምባታን ሳምባታን ህንተ ያርሻና ፁሳ ያርሾይነ ኡሻ ያርሾይ ሀይሳ።”

አጌና ፄሮ ያርሾ

¹¹ “አጌን ፄርያ ኮይሮ ጋላስ ናምኡ ዎፋኖታ፥ እስ ማራዘነ እስ ላይ ኩምዳ ቦረይ ባይና ላፑን ዶርሳ ኡርገታ ፁሳ ያርሾ ኦድ ጎዳስ ያርሽተ።

¹² እስ እስ ዎፋኑዋራ ሻማሆ ዛይተን ሙኑቀትዳ ሄ ክሎ ግራመ ግድያ ሎኦ ግስተ ለራ ካ ያርሾ ኦድ ያርሽተ። ቃስ ሻማሆ ዛይተን ሙኑቀትዳ ናምኡ ክሎ ግራመ ግድያ ሎኦ ግስተ ልያ ማራዝያራ ዎላ ያርሻ።

¹³ ላፑን ማራዘታፐ እስ እስ ማራዘ ሻማሆ ዛይተን ሙኑቀትዳ እስ ክሎ ግራመ ሎኦ ግስተ ለራ ፁገትያ ሳውያ ካ ያርሾ ኦዳ ጎዳስ ያርሻ።

¹⁴ ቃስ ኡሻ ያርሹዋ እስ እስ ዎፋኑዋስ ናምኡ ልትሮ ዎይነ፥ እስ ማራዝያስ እስ ልትሮነ ባጋ ዎይነ ኡሻነ እስ እስ ዶርሳ ኡርግያስ እስ ልትሮ ግድያ ዎይነ ኡሽ ሺሽተ። ሀይስ ላይ ግዶን አጌን ፄርያ ኮይሮ ጋላሳን ኦሰትያ ፁሳ ያርሾ።

¹⁵ ጋላስ ጋላስ ያርሸትያ ፁሳ ያርሹዋ ቦላነ ኡሻ ያርሹዋ ቦላ እስ ኮለ ናጋራ ያርሾ ኦድ ጎዳስ ያርሽተ።”

ፓስካ ያርሾ

¹⁶ “ኮይሮ አጌናን ታማነ ኦይዳን ጋላሳይ ጎዳ ፓስካ ቦንችያ ጋላስ ግዶ።

¹⁷ ቃስ ሄ አጌናን ታማነ እቻሻን ጋላሳን ኡይ ባለይ ቦንቸቴስ፤ ሄ ጋላሳፐ ዶምድ ላፑን ጋላስ ጋካናዉ እርሾይ ገልቦና ኡይ ሚተ።

¹⁸ ሄ ጋላሳታፐ ኮይሮ ጋላሳን ጎይናናዉ ሺቅተ፤ ሄ ጋላሳን አይ ኦሶካ ኦፍተ።

¹⁹ ቦረይ ባይና ናምኡ ዎፋኖታ፥ እስ ማራዘነ እስ ላይ ኩምዳ ላፑን ዶርሳ ኡርገታ ፁሳ ያርሾ ኦድ ጎዳስ ያርሽተ።

²⁰ እስ ዎፋኑዋራ ሻማሆ ዛይተን ሙኑቀትዳ ሄ ክሎ ግራመ ሎኦ ግስተ ለ፥ እስ ማራዝያራ ናምኡ ክሎ ግራመ ለነ

²¹ ላፑን ዶርሳ ኡርገታፐ እስ እስ ዶርሳራ እስ ክሎ ግራመ ለ ያርሽተ።

²² ቃስ እስ ዴሽ ደርያ ናጋራስ አቶተ ግዳና መላ ናጋራ ያርሾ ኦድ ያርሽተ።

²³ ሄሳ ኡባ ዎደ ጋላስ ጋላስ ያርሸትያ ያርሹዋ ቦላ ጉጅድ ያርሽተ።

²⁴ ኡባ ዎደ ኦሰትያ ፁሳ ያርሹዋ ቦላነ ኡሻ ያርሹዋ ቦላ ጉጅድ ላፑን ጋላስ ጎዳስ ሳውያ ካ ያርሾ ኦድ ያርሽተ።

²⁵ ላፑን ጋላሳን ጎይኖስ ሺቅተ፤ ሄ ጋላስ አይ ኦሶካ ኦፍተ።”

ካ ሺሾ ባኣለ

²⁶ “ካ ሺሾ ባኣለ ሳምንታን ኮይሮ ጋላስ ጎይኖስ ሺቅያ ዎደ ህንተ ኦራ ካፈ ያርሾ ያርሽተ፤ ሄ ዎደ አይ ኦሶካ ኦፍተ።

²⁷ ናምኡ ዎፋኖታ፥ እስ ማራዝያነ እስ ላይ ኩምዳ ላፑን ዶርሳ ኡርገታ ጎዳስ ሳውያ ፁሳ ያርሾ ኦድ ያርሽተ።

²⁸ እስ እስ ዎፋኑዋራ ሻማሆ ዛይተን ሙኑቀትዳ ሄ ክሎ ግራመ ሎኦ ግስተ ለ፥ እስ ዶርሳ ኡርግያራ ናምኡ ክሎ ግራመ ለነ

²⁹ ላፑን ዶርሳ ኡርገታፐ እስ እስ ኡርግያራ እስ ክሎ ግራመ ግስተ ለ ኤክድ ያርሽተ።

³⁰ እያ ቦላ ጉጅድ እስ ኮለ ናጋራ አቶ ያርሾ ኦድ ያርሽተ።

³¹ ጋላስ ጋላስ ያርሸትያ ያርሹዋ ቦላነ ኡሻ ያርሹዋ ቦላ ካ ያርሾ ያርሽተ። ህንተ ያርሽያ መሄት ቦረይ ባይናባ ግዶ።”