Taybo 20 - ጌሻ ማፃፋ

ዛላፈ ፑልትዳ ሃ

¹ ኮይሮ አጌናን እስራኤለ አሳ ኡባይ ሲና መላ ቢታ ጋክድ፥ ቃደሳ ጌተትያ በሳን ዱንካንዶሶና። ማይራማ ያን ሀይቃዳ ሞገታሱ።

² ሄ በሳን አሳስ ሃ ይን፥ አሳይ ሙሰ ቦላነ አሮና ቦላ ደንድዶሶና።

³ ኤንቲ፥ “ኑ እሻት ጎዳ ስንን ሀይቅዳ ዎደ ኑካ ሀይቅዳ ግዶርኮሽን።

⁴ ኑነ ኑ መሄይ ሀ መላ ቢታን ሀይቃና መላ ጎዳ ማባራ ሀ በሳ አይስ ኤህደቲ?

⁵ ግብፀፈ ከስድ ሀ ኢታ በሳ ኑና አይስ ኤህደቲ? ሀይሳን ካ ዎይኮ ባላሰይ ዎይኮ ዎይነይ ዎይኮ ኦሮማነይ ባዋ፤ ሀር አቶሽን ኡየትያ ሃካ ሀይሳን ባዋ” ያግድ ሙሰራ ካጨትዶሶና።

⁶ ያትን ሙሰይነ አሮን አሳ ማታፐ ጌሻ ዱንካንያ ፐንገ ብድ ሳአን ጉፋንዶሶና፤ ጎዳ ቦንቾይካ ኤንታዉ ቆንጭስ።

⁷ ጎዳይ ሙሰኮ፥

⁸ “ነ ፃምአ ኤካ፤ ኔራነ ነ እሻ አሮናራ ማባራ ሺሽተ። ኤንታ ስንን ዛላይ ሃ ከሳና መላ ኦዳ። ህንተ ዛላፈ ሃ ከስድ፥ ኤንታነ ኤንታ መህያ ኡሻና” ያግስ።

⁹ ጎዳይ ኪትዳይሳዳ ሙሰይ ጎዳ ስንፈ ፃምኣ ኤክስ።

¹⁰ ሙሰይነ አሮን ማባራ ዛላ ስንን ሺቃና መላ ኦድ፥ አሳኮ፥ “ህንተኖ ጌላቶ፥ ስእተ፤ ሀ ዛላፈ ህንተዉ ኑኒ ቱማ ሃ ከሳኔ?” ያግስ።

¹¹ ሙሰይ ባ ፃምአ ደንድ ዛላ ናምኡ ቶሆ ሾጭስ፤ ሃ ቅድ ከይን ኤንትነ ኤንታ መሄት ኡይዶሶና።

¹² ሽን ጎዳይ ሙሰኮነ አሮናኮ፥ “እስራኤለ አሳ ስንን ህንተ ታ ጌሻተ በሳናዉ አማነትቦና ግሾ ታ ኤንታዉ እምያ ቢታ ሀ አሳ ካለድ ህንተ ገለከታ” ያግስ።

¹³ እስራኤለ አሳይ ጎዳራ ካጨትዳ ግሾነ ጎዳይ ባ ጌሻተ ኤንታ ግዶን ቆንጭስዳ ግሾ ሄ በሳይ ማርባ ሃ ጌተትስ።

እስራኤለት ኤዶመራ አ ድገትዶሶና

¹⁴ ኤዶመ ካዋኮ ሙሰይ ቃደሳፐ ሀይሳዳ ያግድ ኪታ የድስ። “ነ እሻይ እስራኤለይ ሀይሳዳ ያጌስ፤ ኑና ጋክዳ መቶ ኡባ ነ ስአዳሳ።

¹⁵ ኑ ማይዛት ዱገ ግብፀ ዎዶሶና፤ ያን ኑኒ ዳሮ ላይ ደእዳ። ግብፀት ኑናነ ኑ አዋታ ኡንኤዶሶና።

¹⁶ ኑኒ ጎዳኮ ዋስን፥ እ ኑ ዋሱዋ ስእድ፥ ባ ኪታንቹዋ ኪትድ ኑና ግብፀፈ ከስስ። ሀእ ኑኒ ነ ቢታ ጋፃን ደእያ ቃደሳ ካታማን ደኦስ።

¹⁷ ሀያና፥ ኑኒ ነ ቢታራ ካንድ አና መላ ኦርክ፤ ኑኒ ኦገፐ ጋፃ ከዮኮ፤ ነ ጎሻ ዎይኮ ዎይነ ጋደ ግዶ ገሎኮ፤ ኑኒ ሃ ኦላፈ ሃ ኡዮኮ። ኑኒ ካዎ ኦገ ኦይክድ ባና፤ ኑኒ ነ ቢታራ ካንድ አና ጋካናዉ ሀድርስ ዎይኮ ኡሻች ጎኮ” ያግስ።

¹⁸ ሽን ኤዶመ አሳይ፥ “ኑ ቢታራ ካንሶኮ፤ ህንተ ሀይሳራ ካንናዉ ቆፕኮ፥ ኑኒ ደንድድ ህንተና ኦላና” ያግዶሶና።

¹⁹ ያትን እስራኤለ አሳይ፥ “ኑኒ ካዎ ኦግያራ ባና፤ ኑኒ ዎይኮ ኑ መሄይ ህንተ ሃፈ ኡይኮ፥ ኑኒ ሄሳስ ጋተ ጭጋና፤ ኑኒ ቶሆራ አ ፃላላ ኮዮስ፤ ሀራባ አይኮካ ኮዮኮ” ያግዶሶና።

²⁰ ኤዶመ አሳይ ዛሪድ፥ “ህንተ ሀይሳራ አናዉ ዳንዳኤከታ” ያግስ። ካልድ፥ ዳሮነ ዎልቃማ ኦላንቾታ ኤክድ እስራኤለ አሳ ኦላናዉ ከይስ።

²¹ ኤዶመ አሳይ ባንታ ቢታራ እስራኤለ አሳ አና እፅን፥ እስራኤለ አሳይ ስሚድ ሀራ ኦገራ ብዶሶና።

²² እስራኤለ አሳ ኡባይ ቃደሳፐ ደንድድ ሆራ ዙማኮ ብዶሶና።

²³ ኤዶመ ዛዋን ደእያ ሆራ ዙማን፥ ጎዳይ ሙሰኮነ አሮናኮ፥

²⁴ “አሮን ባ ማይዛታን ጋሄትያ ዎደይ ጋክስ። ህንተ ናምአይ ማርባ ሃ ማታን ታ ኪታ ቦላ ጌላትዳ ግሾ እስራኤለ አሳስ ታ እምያ ቢታ እ ገለና።

²⁵ አሮናነ እያ ናኣ አላዛራ ኤካዳ ሆራ ዙማ ቦላ ከያ።

²⁶ አሮና ካህነተ ማኡዋ ቃራዳ፥ እያ ናኣ አላዛራ ማይዛ። አሮን ያን ሀይቃና” ያግስ።

²⁷ ጎዳይ ኪትዳይሳዳ ሙሰይ ኦስ፤ እስራኤለ አሳ ኡባይ በእሽን፥ ኤንቲ ሆራ ዙማ ቦላ ከይዶሶና።

²⁸ ሙሰይ አሮና ካህነተ ማኡዋ ቃርድ እያ ናኣ አላዛራ ማይዝስ። አሮን ሄ ዙማ ሁጰን ሀይቅስ። ሙሰይነ አላዛር ዙማፐ ዎዶሶና።

²⁹ አሮን ሀይቅዳይሳ እስራኤለ አሳይ ኤርዳ ዎደ እስራኤለ አሳይ አሮናስ ሀስታሙ ጋላስ ዬክዶሶና።