Taybo 14 - ጌሻ ማፃፋ

አሳ ዙዙን

¹ ሄ ዎደ ቃማ ማባራ ኡባይ ባንታ ቃላ ቁ ኦድ ዬክዶሶና።

² እስራኤለ አሳይ ሙሰ ቦላነ አሮና ቦላ ዙዙምዶሶና። ኩመ ማባራይ፥ “ኑኒ ግብፀ ቢታን ደእሸ ዎይኮ ሀ መላ ቢታን ሀይቅዳ ግዶርኮ።

³ ኑኒ ማሻን ዉራና መላ ጎዳይ ሀ ቢታ ኑና አይስ ኤሂ? ኑ ማቸትነ ኑ ናይት ድኤታና፤ ሄሳ ሀናናፐ ጉየ ግብፀ ስሞይ ኑስ ኬሄኔ?” ያግዶሶና።

⁴ ኤንቲ እሶይ እሱዋኮ፥ “ኑና ካለያ አስ ዶርድ ጉየ ግብፀ ስሞስ” ያግዶሶና።

⁵ ያትን፥ ሙሰይነ አሮን ሄ በሳን ሺቅዳ እስራኤለ ማባራ ስንን ሶምኦራ ሳአን ጉፋንዶሶና።

⁶ ቢታ ዎቻናዉ ብዳ አሳ ግዶፈ ናወ ናኣ እያሱይነ ዮፎና ናኣ ካለብ ባንታ ማኡዋ ፔዶሶና።

⁷ እስራኤለ ማባራኮ፥ “ኑኒ ካን ከይድ ዎችዳ ቢታይ ዳሮ ሎኦ።

⁸ ጎዳይ ኑናን ኡፋይትያባ ግድኮ ማነ ኤስ ጎግያ ቢታ ኑና ገልሳና፤ ሄ ቢታ ኑስ እማና።

⁹ ሄሳ ግሾ፥ ጎዳ ቦላ ማካሎፍተ። ሄ ቢታ አሳስ ያዮፍተ፤ ኤንቲ ኑስ ኦይካ ግዶኮና። ኤንታዉ ኤሾይ ባዋ፤ ጎዳይ ኑራ ደኤስ፤ ህንተ ኤንታዉ ያዮፍተ” ያግዶሶና።

¹⁰ ያትን እስራኤለ ማባራይ ኤንታ ሹቻን ጫዳናዉ ደንድስ። ሄ ዎደ ጎዳ ቦንቾይ ፆሳ ዱንካንያን እስራኤለ አሳ ኡባስ ቆንጭስ።

¹¹ ጎዳይ ሙሰኮ፥ “ሀ አሳይ ታና ካይ አዉደ ጋካናሴ? ታኒ ኤንታ ግዶን ኦዳ ማላታታ በእሸ፥ አዉደ ጋካናዉ ታናን አማኖና እፃኔ?

¹² ታኒ ኤንታ ጋዶን ሾጫዳ ይሳና፥ ሽን ነና ኤንታፈ ዳርያነ ምንያ ካዎተስ አዋ ኦና” ያግስ።

¹³ ሙሰይ ዛሪድ ጎዳኮ፥ “ኔኒ ነ ዎልቃን ሀ አሳ ግብፀፈ ከስዳይሳ ኤርያ ግብፀት ሄሳ ስእኮ ዎይጋኔ?

¹⁴ ኤንቲ ሄ ቢታን ደእያ አሳስ ሄሳ ኦዳና። አቤት ጎዳዉ፥ ኔኒ ሀ አሳራ ደኤይሳ ኤንቲ ስእዶሶና። አቤት ጎዳዉ፥ ኑኒ ነና በእዳይሳ፥ ነ ሻራይ ኑ ቦላ ኩያትዳይሳነ ጋላስ ሻራ ቱሳን፥ ቃማ ታማ ቱሳን ኔኒ ኑና ካለዳይሳ ኤንቲ በእዶሶና።

¹⁵ ያትን፥ ሀእ ኔኒ ሀ አሳ ኡባ እስ ቶሆ ዎ ይስያባ ግድኮ ነ ካሰ ኦዳይሳ ስእዳ ካዎተት፥

¹⁶ ‘ጎዳይ፥ ሀ አሳስ እማና ግድ ጫቅዳ ቢታ ኤንታ ገልሳናዉ ዳንዳእቦና ግሾ መላ ቢታን ዎ ይስስ ያግድ’ ኦዳና።

¹⁷ “ሄሳ ግሾ፥ ጎዳዉ፥ ነ ዎልቃ ኑና በሳ፤ ነ ኑስ ገልዳ ቃላ ቆፓ።

¹⁸ ‘ጎዳይ ኤለ ሀንቀተና፤ ማሮትነ ሲቆይ ኩምዳይሳ ናጋራነ ጌላተ አቶ ገይሳ፤ ሽን ባልዳ ኡራ ሴሮና አገና። የልዳይሳታ ናጋራ ግሾ ሄንነ ኦይዳን የለተ ጋካናዉ ናይታ ሴራና’ ያጋዳሳ።

¹⁹ ሀ አሳይ ግብፀፈ ከዮሶፐ ዶማዳ ሀች ጋካናዉ ኤንታ ማርዳይሳዳ ነ መርና ሲቁዋን ሀ አሳ ናጋራ አቶ ጋርክ” ያግስ።

²⁰ ጎዳይ ዛሪድ፥ “ነ ኦይችዳይሳዳ ታ ኤንታ ማራና።

²¹ ሽን ታ ደኦ ግደይሳዳነ ታ ቦንቾይ ሳአ ኡባ ኩምዳይሳዳ፥

²² ሀ አሳፐ እስ አስካ ሄ ቢታ በኤና። ግብፀ ቢታንነ መላ ቢታን ኦዳ ማላታታ ሀ አሳት በእዶሶና፤ ሽን ኤንቲ ታሙ ቶሆ ታና ፓጭድ ታዉ ኪተቶና እፅዶሶና።

²³ ሄሳ ግሾ፥ ታ ኤንታ ማይዛታስ እማና ጋዳ ጫቅዳ ቢታ ታና ካዳይሳታፐ እሶይካ ገለና።

²⁴ ሽን ታ አይለይ ካለብ ኤንታፈ ዱማትያ ግሾነ ታና ፖሎ ዎዛናፐ ካልዳ ግሾ፥ እ ካሰ ዎችዳ ቢታ እያዉ እማና፤ እያ ዘረይካ ሄ ቢታ ላታና።

²⁵ ሽን ሀእ አማለቃትነ ካናነት ዛንጋራን ደእያ ግሾ፥ ዎንቶ ዞኦ አባኮ ኤፍያ ኦግያ ኦይክድ መላ ቢታ ጉየ ስምተ” ያግስ።

ዙዙምዳ አሳ ሴረተ

²⁶ ጎዳይ ሙሰኮነ አሮናኮ፥

²⁷ “ሀ ኢታ አሳይ ታ ቦላ አዉደ ጋካናዉ ዙዙማኔ? ታኒ እስራኤለ አሳ ዙዙን ስአስ።

²⁸ ሄሳ ግሾ፥ ኔኒ ኤንታዉ ሀይሳዳ ጋዳ ኦዳ፤ ‘ታኒ ታ ደኡዋን ጫቃይስ፤ ህንተ ግዳይሳዳ ታ ህንተዉ ኦና።’ ታኒ፥ ጎዳይ ሀይሳ ኦዳይስ።

²⁹ አሳይ ታይበትያ ዎደ ላይ ላታማነ እያፐ ቦላ ግድዳ አስ ኡባይ ታ ቦላ ዙዙምዳ ግሾ፥ ህንተ አሀይ ሀ መላ ቢታን ኩንዳና።

³⁰ ዮፎና ናአ ካለባፐነ ናወ ናአ እያሱፐ አትሽን፥ ህንተፈ ኦንካ ታ ህንተና ላትሳናዉ ጫቅዳ ሄ ቢታ ገለና።

³¹ ህንተ፥ ‘ኑ ናይት ድኤት አታና’ ግዳ ህንተ ናይታ፥ ሄ ህንተ ካዳ ቢታ ገልሳና፤ ሄ ቢታይ ኤንታዉ ላታ ግዳና።

³² ሽን ህንተ አሀይ ሀ መላ ቢታን ኩንድድ አታና።

³³ ህንተ አማነትቦና ግሾ፥ ህንተፈ ዉርሰ አሀይ ሀ መላ ቢታን ኩንዳና ጋካናዉ፥ ህንተ ናይት ሀ መላ ቢታን ዋየትሸ ኦይታሙ ላይ ዶርሰ ሄማና።

³⁴ ህንተ ቢታ ዎችዳ ኦይታሙ ጋላሳ ታይቦን፥ እስ ጋላሳስ እስ ላይ፥ ኦይታሙ ላይ ህንተ ናጋራ ግሾ ዋየታና፤ ሄ ዎደ ታ ህንተ ቦላ አይ መላ ሀንቀትዳኮ ህንተ ኤራና።

³⁵ እስፈ ታ ቦላ ደንድዳ ሀ ኢታ ማባራ ቦላ ታ ሀይሳዳ ኦና፤ ኤንቲ ሀ መላ ቢታን ኩንድ አታና ሀይሳን ኤንቲ ሀይቃና፤ ታ ጎዳይ ሀይሳ ኦዳይስ” ያግስ።

³⁶ ሄ ቢታ ዎቻና መላ ሙሰይ ኪትዳ አሳት ስሚድ፥ ሄ ቢታባ ኢታ ኦዳ ኦድድ፥ ሙሰ ቦላ አሳይ ዙዙማና መላ ኦዳይሳት፥

³⁷ ጎዳ ስንን ቦሻን ሀይቅዶሶና።

³⁸ ሄ ቢታ ዎቻናዉ ብዳ አሳፐ ዮፎና ናአይ ካለብነ ናወ ናአይ እያሱ ፃላል አትዶሶና።

³⁹ ሙሰይ ሄሳ እስራኤለ አሳስ ኦድዳ ዎደ አሳይ ዳሮ ዬክስ።

⁴⁰ ዎንተ ጋላስ ዎንታ ጉራ ደንድድ፥ ገዘ ቢታ ከይድ፥ “ኑኒ ናጋራ ኦዳ፥ ሽን ሀእ ጎዳይ ኑስ እማና ግዳ በሳ ፑደ ከያና” ያግዶሶና።

⁴¹ ሽን ሙሰይ ኤንታኮ፥ “ጎዳ ኪታ ህንተ አይስ መንቲ? ህንተዉ ሀነና።

⁴² ጎዳይ ህንተራ ዶና ግሾ፥ ቦፕተ፤ ህንተ ሞርከት ህንተና ፆናና።

⁴³ አማለቃ አሳራነ ካናነ አሳራ ህንተ ኦለትድ ማሻን ሀይቃና። ጎዳስ ህንተ ኪተቶና እፅዳ ግሾ፥ ጎዳይ ህንተራ ዴና” ያግስ።

⁴⁴ ሽን ኤንቲ ጎዳ ጫቆ ታቦተይነ ሙሰይ ጉታፐ ደንዶና ደእሽን፥ ደረይ ዳርያ ቢታ ባናዉ ምንድ ደንድዶሶና።

⁴⁵ ያንን ደረይ ዳርያ ቢታን ደእያ አማለቃ አሳይነ ካናነ አሳይ ኤንታ ኦላን ፆንድ፥ ሆርማ ጋካናዉ ኤንታ የደዶሶና።