Solomone 5 - ጌሻ ማፃፋ

ፓን

¹ ታ ምቸ፥ ታ ሙሹራተ፥ ታኒ ታ አታክልትያ ግዶ ገላስ። ታ ካርብያነ ታ ሽቶ ጪሻ ቆራስ፤ ታኒ ኤሳ ኡይ ማስ፤ ታ ዎይንያነ ታ ማ ኡያስ። እያ ላገቶ፥ ሚተ ኡይተ፤ ሲቆ አላና ጋካናዉ ኡይተ።

የሩሳላመ ጌላኦታ ጌላእዉ

² ታኒ ስካስ፤ ሽን ታ ዎዛናይ ባርክስ፤ ታ ሲቆይ ሀይሳዳ ያግድ ፐንግያ ቆንክሽን ስአስ። “ታ ምቸ፥ ታ ሲቀ፥ ታ የገልሰ፤ ቦረይ ባይና ታ ሆለ፥ ታዉ ፐንግያ ዶያ። ታ ሁጰይ አካን ላክስ፤ ታ ብናናይ ቃማ ፑሰን እርፅስ።”

³ ታ ማኡዋ ቃራስ፥ ዛራዳ ማኦዬ? ታ ቶሁዋ ሜጨታስ፥ ዛራዳ ቅታዮዬ?

⁴ ታ ሲቆይ እብ ፆኤራ ባ ኩሽያ ሶ የድስ፤ ታ ዎዛናይ እያ ግሾ ሴሌስ።

⁵ ታ ሲቁዋስ ዶያናዉ ደንዳስ፤ ፐንግያ ዶያናዉ ኮብያ ኦይክያ ዎደ፥ ታ ኩሽያፐ ካርበይ፥ ታ ብራያፈ ሽቶይ ፆኬስ።

⁶ ታ ሲቁዋስ ካርያ ዶያስ፥ ሽን እ ዴና፤ እያ ቃላ ስአናዉ ዳሮ አሞታስ። ምንዳ ኮያስ፥ ሽን እያ ደማብከ፤ ፄጋስ፥ ሽን ታዉ ኮይቤና።

⁷ ካታማ ናገይሳት ታና ደምድ፥ ዋዶሶና፤ ማዱንፅስዶሶና። ካታማ ድርሳ ናገይሳት፥ ታ ላፃና ቃር ኤክዶሶና።

⁸ ህንተኖ፥ የሩሳላመ ጌላኦቶ፥ ታ ሲቁዋ ደምኮ፥ ታኒ እያ ሲቁዋን ሀርግዳይሳ፥ ሀዳራ እያዉ ኦድተ።

የሩሳላመ ጌላኦታ

⁹ ነኖ፥ ማጫሳ ኡባፈ ሎእያራ፥ ነ ላገይ ሀራታፐ ዋንድ ዱማቲ? ኔኒ ኑና ሀዳራ ገይ፥ እ ሀራታፐ አይብን ዱማቲ?

ጌላእዉ

¹⁰ ታ ሲቆይ ማላ ሎኦነ አያንታ፤ ታሙ ሙኩሉ አደታ ግዶን እያ መል ባዋ።

¹¹ እያ ሁጰይ አልኦ ዎርቃ ዳኔስ፤ እያ ብናናይ ሎኦነ ቁሮ መላ ካሬ።

¹² እያ አይፈይ ሻፋ ማታን ኤቅዳ፥ ማን ሜጨትዳ ሆለታ ዳኔስ።

¹³ እያ ሻካላይ ሳውያ ቅማመይ ቶከትዳ ማዳበዳ ሎኤስ፤ እያ መተርሻይ ካርበ ሽቶይ ፆክያ ዎራ ጪሻዳ ሎኤስ።

¹⁴ እያ ቀሰይ አልኦ ሹቻን አሌቀትዳ ዎርቃ ፃምአዳ ሎኤስ፤ እያ አሳተይ ሳንፓረ አልኦ ሹቻን አሌቀትዳ ዳንጋርሳ ዛለ መላ።

¹⁵ እያ ቶሆት ዎርቃ ባሶን ኤቅዳ ሳሎ ሹቻ ቱስ ዳኖሶና፤ እያ ማላይ ዝጋን አሌቀትዳ ልባኖሰ ዙማ መላ።

¹⁶ እያ ዶናይ ኤሳዳ ማልኤስ፤ እያ ኩመ አሳተይ ሎኤስ። ህንተኖ የሩሳላመ ጌላኦቶ፥ ታ ሲቆይነ ታ ላገይ ሀይሳ ዳነስ።