Solomone 4 - ጌሻ ማፃፋ

ፓን

¹ ታ ሲቀ፥ ኔኒ ዋና ሎአይ! ኔኒ ዋንዳ የገልሰ! ነ አይፈት ጉሉን ግዶራ በእያ ዎደ፥ ሆለዳ ሎኦሶና። ነ ብናናይ ጋላዳ ዙማፐ ዎያ ዴሻ ዉደ ዳኔስ።

² ነ አቻይ ሜደትድ ሃን ሜጨትዳ፥ ኡባይ መንተ የልያ፥ ኤንታ ግዶን አዉጫየይ ባይና ዶርሳ ዉደ መላ።

³ ነ መተርሻይ ዞኦ ቃጭና ዳኔስ፤ ነ ሃሳያ ዎደ ዳሮ ኡፋይሶሶና። ነ ናምኡ ሻካላይ ጉሉን ግዶራ ፄልያ ዎደ፥ ናምአ ከስድ ጳልቅዳ ኦሮማነ ዳኖሶና።

⁴ ነ ቆይ ሎይ ኦዳ፥ እያ ቦላ ኦላንቾታ ጎንዳለይ ደእያ፥ ሙኩሉ ምኖ ኦላንቾታ ጎንዳለይ ካቀትዳ፥ ዳዊታ አዱሳ ግምብያ ዳኔስ።

⁵ ነ ናምኡ ንት መንተ የለትዳ፥ ሎኦ ጪሻታ ግዶን ምያ ዎሽኤ ማራታ ዳኖሶና።

⁶ ሳእ ጌያናፐ ስን፥ ማይ ክቻናፐ ስን፥ ካርበ ደርያነ እፃነ ዙማ ባዳ ሸምፓና።

⁷ ታ ሲቀ፥ ነ አሳተይ ኩመ ሎኦ፤ ነናን ቦረትያባይ ባዋ።

⁸ ታ ሙሹራተ፥ ልባኖሰፐ ሃያ፤ ጋሞይ ፔእያ፥ ማሄይ አቅያ፥ አማና ዙማፐ፥ ሳንራ ሊጰፐ አርሞና ሁጵያፐ ዎ።

⁹ ታ ሲቀ፥ ምቾ ግድዳ ታ ሙሹራተ፤ ነ አይፍያ ፄሎይነ ነ ቆያ አሌቆይ፥ ታ ዎዛና ኡፋይሳን ጎሽስ።

¹⁰ ታ ሲቆ ምቾ ግድዳ ታ ሙሹራተ! ነ ሲቆይ ታና ዋን ኡፋይስ! ነ ሲቆይ ዎይነ ኡሻፈ አድ ኡፋይሴስ፤ ነ ሽቶይ ኡባፈ አድ ሳዌስ።

¹¹ ታ ሙሹራተ፥ ነ መተርሻፈ እልሎ ኤስ ፆኬስ፤ ነ ዶናፐ ኤስነ ማ ፑልቴስ፤ ነ ማኦይ ልባኖሰ ሽቶዳ ሳዌስ።

¹² ታ ሲቆ ምቾ ግድዳ ታ ሙሹራተ፥ ነ ዩሾይ ድረትድ ናገትያ አታክልተ በሳ መላ፤ ነ ሀራታስ ጎርደትዳ፥ ታዉ ዶየትዳ ፑልቶ መላ።

¹³ ኔኒ አታክልተ ግዶን፥ ኦሮማነይ፥ ዶረትዳ አታክልተ አይፈት፥ ናርዶሰ ጌተትያ አይፈት ደእያ በሳ መላ።

¹⁴ ናርዶሰይ፥ ላደይ፥ ሳውያ ማት፥ ቃራፍን፥ እፃናዳ ሳውያባት ደኦሶና። ካርበይ፥ ጎዳረ ኡ ጪሽነ ዱማ ዱማ ቅማመ አታክልተት ዶሎሶና።

¹⁵ ኔኒ አታክልተ በሳ ኡሽያ ፑልቶ መላ፤ ደኦ ሃ በንትያ ኦላ መላ፤ ልባኖሰ ዙማፐ ጎግያ ሻፋ መላ።

ጌላእዉ

¹⁶ ፑደሀ ባጋ ጫርኩዋዉ፥ ደንዳ! ዱገሀ ባጋ ጫርኩዋዉ፥ ሃያ! ታ አታክልትያ ቦላ ጫርካ! እያ ሳዎይ ቶንኩ ጎ። ታ ሲቆይ ባ አታክልትያ ግዶ ዮ፤ ዳሮ ማልእያ አይፈታ ሞ።