Solomone 2 - ጌሻ ማፃፋ

ጌላእዉ

¹ ታኒ ሳሮናን ዶልያ ጪሻነ ዛንጋራን ዶልያ ሱፈ ጪሻ መላ።

ፓን

² ታ ሲቅያ ማጫሳ ግዶን በእያ ዎደ፥ አጉን ግዶን በንትያ ሱፈ ጪሻ መላ።

ጌላእዉ

³ ታ ሲቆይ ሀራ ፓንታ ግዶን ፄልያ ዎደ ዎራን ደእያ አፕለ ም መላ። ታና ዳሮ ኡፋይስን፥ እያ ኩያ ግዶን ኡታስ፤ እያ አይፈይ ምን ታና ማልኤስ።

⁴ እ ታና ግብራ ምያ ኬ ገልስስ፤ ባ ሲቁዋ ባንድራዳ ታ ቦላ ቁ ቁ ኦስ።

⁵ ታኒ እያ ሲቁዋን ኦይከታዳ ሀርግዳ ግሾ፥ ዛብበ አይፈ ሙዝድ ታና ጋሽትስተ፤ አፕለ ሙዝድ ታ ዎልቃ ምንተ።

⁶ ባ ሀድርሳ ኩሽያ ታና ቦርኮትስስ፤ ባ ኡሻቻ ኩሽያን ታና ቆምስ።

⁷ ህንተኖ፥ የሩሳላመ ያላጋ ማጫሳዉ፥ ሲቆይ ባዉ ዶስድ ደንዳና ጋካናዉ፥ እያ ህንተ ባርከና መላ፥ ታ ህንተና ገንኤንነ ዎራ ዎሽኤን አማታይስ።

⁸ ታ ሲቁዋ ግርሳይ ደርያ ቦላራ ጉፕሸነ፥ ዙማ ቦላራ ፆንገትሸ የይስ ስኤቴስ።

⁹ ታ ሲቆይ ዎሽኤ ዎይኮ ገንኤ ማር ዳኔስ፤ ሄኮ፥ ኑ ኬ ማታን ኤቅስ፤ ማስኮተራ ሶ ፄሌስ፤ ማጋራጁዋ ግዶራ ፄሌስ።

¹⁰ ታ ሲቆይ፥ ሀይሳዳ ያጌስ፤ “ታ ሲቀ፥ ደንዳ! ታ የገልሰ፥ ሃያ፥ እስፈ አነ ቦስ።

¹¹ ሄኮ፥ ባልጎይ አስ፤ እራይካ ኤቅስ።

¹² ቢታን ጪሽ ጪይስ፤ የ የፅያ አጌናይ ጋክስ፤ ሆለ የ ኑ ቢታን ስኤትስ።

¹³ ባላሰ ምይ አይፈ ዶምስ፤ ዎይነይ ጪይስ፤ ጪሻ ሳዎይ ቢታን ቶንኩ ጌስ። ታ ሲቀ፥ ደንዳ፤ ታ የገልሰ፥ ሃያ፤ አነ እስፈ ቦስ።”

ፓን

¹⁴ አፎ ዶናን ዛላ ቆጶን፥ ቆሰትዳ ሆለ ዳንያረ፤ አነ እስ ቶሆ ታና ነ ሶምኡዋ በሳ፤ ነ ግርሳ ስሳ። ነ ቃላይ ታና ማልኤስ፤ ነ ሶምኦይ ዳሮ ሎኤስ።

የሩሳላመ ጌላኦታ

¹⁵ ኑ ዎይነይ ጪይስ፤ ኑ ዎይነ ጋድያ ኢስያ ዎርካናታ፥ ሄ ጉ ቡታለታ ፅሄን ኦይክተ።

ጌላእዉ

¹⁶ ታ ሲቆይ ታባ፤ ታንካ እያባ፤ ጪሻታ ግዶን እ ባ ዉድያ ሄሜስ።

¹⁷ ሳእ ጌያና ጋካናዉ፥ ኩያይ ያና ጋካናዉ፥ ታ ሲቁዋዉ፥ ገንኤዳ ዎይኮ ዎሽኤ ማራዳ፥ አፎትያ ደርያራ ዎፃሸ ሃ ስማ።