Sofonaasa 3 - ጌሻ ማፃፋ

የሩሳላመ ዎዘተ

¹ ማካላንቹዋስ፥ ቱንዳይሳስነ ባ ደርያ ኡንኤዳ የሩሳላመ ካታማ አየ!

² እ ኦናካ ኪተተና፤ ሴርን ስመና፤ ጎዳን አማነተና፤ ባ ፆሳኮ ሺቀና።

³ እያ ሀላቃት ጉድያ ጋሞ መላ፤ እያ ዳይናት ደምዳባ ዎንቶስ አሾና ኡባ ምድ ኦንግያ ኦማርሳ ሱመ መላ።

⁴ እያ ናበት ኦቶራንቾነ ገናንቾ፤ እያ ካህነት ጌሻ ቱንሰይሳታ፤ ኤንቲ ጎዳ ህግያ ምርቆሶና።

⁵ ሽን እያ ግዶን ደእያ ጎዳይ ፅሎ፤ እ ባላ ኦና። ዎንታ ዎንታ እ ፅሎ ፕርዴስ፤ ጋላስ ጋላስ ሄሳ አገና። ግዶሽን፥ ያን ደእያ ጌላይ ዬላ ኤረና።

⁶ “ታኒ ካዎተታ ይሳስ፤ ኤንታ ግምበታ ላላስ። ኤንታ ካታማታ እስ ዶና ባይሳ ቢታ ኦስ፤ ኤንታ ኦገታ አስ ካንና ባዞ ኦስ።

⁷ ታኒ ሀይሳ ኡባ ኦዳ፥ ‘ታ አሳይ ታና ቦንቻና፤ ታ ሴራ ኤካና፤ ታ ኪትዳባ ዶገና’ ያጋስ። ሽን ኤንቲ ካሰፐ አድ ኢትዶሶና፤ ባንታ ኦሱዋን ቱንዶሶና” ያጌስ ጎዳይ።

⁸ “አነ ታኒ ፕርድያ ጋላሳይ ጋካናዉ ጉ ናግተ። ታኒ ደረታነ ካዎተታ ሺሻናዉ ቆፋ ቃቻስ፤ ታ ሀንቁዋ ሱላ ኤንታ ቦላ ጉሳና፤ ቢታይ ኩመ ታ ሀንቁዋ ታማን ፁገታና።

⁹ “ሄ ዎደ አሳ ኡባይ ጌሻ ኦዳ ኦደታና መላ ኦና። ኤንቲ ኡባይ ጎዳ ሱን ፄጋና፤ እስፈ እያዉ ጎይናና።

¹⁰ ላለትዳ አሳይ፥ ታና ቱማ ጎይነይሳት፥ ቶጰ ሻፋታፐ ሄፍንን ደኤይሳት ታዉ እሞታ ኤሀና።

¹¹ ኦቶረይሳታነ ጬቀተይሳታ ታ ህንተ ግዶፈ ይስያ ግሾ፥ ሄ ዎደ ህንተ ታ ቦላ ኦዳ ኦሱዋ ጋሶን ዬላተከታ። ህዛፐ ጉየ ህንተ ታ ጌሻ ዙማ ቦላ ኦቶርተከታ።

¹² ታኒ ህንተ ግዶፈ ባንታና ካዉሸይሳታነ አዳታ አሻና፤ ኤንቲ ጎዳ ሱንን አማነታና።

¹³ እስራኤለ አሳፐ አትዳይሳት ኢታባ ኦኮና፤ ዎርዶ ኦደቶኮና፤ ኤንታ እንፃርሳን ጭሞይ በንተና። ሄሳ ግሾ፥ ኤንቲ ምድ ካልድ ሳሮን ዳና፤ ኤንታ ያሽስያባይ ባዋ” ያጌስ።

¹⁴ ፅዮነ ናኤ፥ ማዝሙርያ የፃ! እስራኤለ አሳዉ፥ እልልተ! የሩሳላመ ናኤ፥ ነ ፖሎ ዎዛናፐ ኡፋይታ፤ ሀሹ ጋ!

¹⁵ ጎዳይ ህንተ ቦላ ፕርድዳ ፕርዳ አግስ፤ ህንተ ሞርከታ ድግስ። ጎዳይ፥ እስራኤለ ካዎይ ህንተ ግዶን ደኤስ፤ ህዛፐ ጉየ ህንተና ያሽስያባይ ባዋ።

¹⁶ ሄ ጋላስ ኤንቲ የሩሳላመ ሀይሳዳ ያጋና፦ “ፅዮነ፥ ያዮፋ! ነ ኩሸይ አርጋጮፖ።

¹⁷ ጎዳይ፥ ነ ፆሳይ ነ ግዶን ደኤስ፤ እ ነዉ ፆኖ እምያ ኦላንቹዋ። እ ነናን ኡፋይታና፤ ባ ሲቁዋን ነና ኦራና። አሳይ ባኣለ ጋላስ ማዝሙረ የፀይሳዳ፥ እ ነናን ኡፋይተይሳ ማዝሙረ የፅድ በሳና” ያጋና።

¹⁸ ጎዳይ ሀይሳዳ ያጌስ፦ “ህዛፐ ጉየ ነ ቦላ ዮይ ጋኮናዳ ኦና፤ ነ ዬላ ድጋና።

¹⁹ ሄ ዎደ ታኒ ነና ኡንኤዳይሳታ ኡባ ሴራና፤ ዎበታ አሻና፤ ላለትዳይሳታ ሺሻና። ኤንቲ ዬላትዳ በሳን ዛራዳ ቦንቻና፤ ኤንታ ዬላ ቦንቾንነ ሳባን ላማና።

²⁰ ሄ ዎደ ታኒ ህንተና ሺሻና፤ ህንተና እስፈ ዛራዳ ሺሻና። ታኒ ህንተና ናንስያ ዎደ፥ ህንተ ሀ ሳአን ደእያ አሳ ኡባ ማታን፥ ቦንቸትዳይሳታነ ኤረትዳይሳታ ግዳና” ያጌስ ጎዳይ።