Sofonaasa 1 - ጌሻ ማፃፋ

ጎዳ ፕርዳ ጋላሳ

¹ አሞነ ናአይ እዮስያስ ይሁዳን ካዎትዳ ዎደ ሶፎንያሳኮ ይዳ ጎዳ ቃላይ ሀይሳ። ሶፎንያስ ኩሻ ናኣ፤ ኩሽ ጋዳላ ናአ፤ ጋዳል አማረ ናአ፤ አማረይ ህዝቅያሳ ናኣ።

² “ታኒ ቢታ ቦላ ደእያባ ኡባ ይሳና።

³ አሰነ መሄ፥ ሳሎ ካፎታነ አባ ሞሎታ ይሳና። ኢታ አሳታ ሽራ የጋና፤ አሳ ዛረ ቢታ ቦላፈ ይሳና” ያጌስ ጎዳይ።

ይሁዳ ቦላ ያና ፕርዳ

⁴ “ይሁዳንነ የሩሳላመን ደእያ ኡባ ሴራናዉ ታ ኩሽያ ደንና። ባኣለ ኤቃ ጎይነይሳታነ እያ ሀጋዝያ ካህነታ ሄ በሳፈ ይሳና።

⁵ ኬ ቦላ ከይድ አዋስ፥ አጌናስነ ፆልንቶታስ ጎይነይሳታ ታኒ ይሳና። ጎዳ ጎይንሸነ እያ ሱንን ጫቅሸ ሞሎካ ጌተትያ ኤቃ ሱንን ጫቀይሳታ ታኒ ይሳና።

⁶ ታና ካሎ አግድ ጉየ ስምዳይሳታ፥ ታና ኮይቦናይሳታነ ታና ኦይችቦናይሳታ ታኒ ይሳና” ያጌስ ጎዳይ።

⁷ ጎዳ ጋላሳይ ማትዳ ግሾ፥ ኡባ ሃርያ ጎዳ ስንን ስእ ጊተ! ጎዳይ ያርሹዋ ጊግስስ፤ ቃስ ባ ፄግዳ እማታ ጌሽስ።

⁸ “ጎዳ ያርሹዋ ጋላስ ሀላቃታ፥ ካዋ ናይታነ አላጋ ቢታ ማኦ ማእዳ ኡባ ታኒ ሴራና።

⁹ ሄ ጋላስ አላጋ ቢታ አሳታዳ፥ ኤቃ ጎይነይሳታነ ባንታ ጎዳ ኬ ጌላተንነ ጭሞን ኩንይሳታ ታኒ ሴራና” ያጌስ ጎዳይ።

¹⁰ “ሄ ጋላስ ሞሎ ፐንግያ ባጋራ ዋሶይ፥ ካታማስ ናምአን ሻሁዋን ዬሆነ ዙማታ ቦላ ግታ ዶምኤ ግርስ ስኤታና።

¹¹ ህንተኖ፥ ካታማስ ጋርሳ ባጋን ደኤይሳቶ፥ ዬክተ። ያን ዛልእያ ኡባይ ይዶሶና፤ ብራ ኦይክዳይሳት ሀይቅ ዉርዶሶና።

¹² ሄ ጋላስ ታኒ ፆምፐ ኦይዳ የሩሳላመ ግዱዋ ኮያና። ህርግ ባይና ዎ ኡትድ ባንታ ዎዛናን፥ ‘ጎዳይ ሎኦካ ኢታካ’ ገይሳታ ታኒ ሴራና።

¹³ ኤንታ ሻሎይ ቦንቀታና፤ ኤንታ ኬይ ላለታና። ኤንቲ ኬ ኬፃና፥ ሽን ሄ ኬን ዶኮና፤ ዎይነ ቶካና፥ ሽን ሄ ዎይንያ ኡዮኮና” ያጌስ ጎዳይ።

ጎዳ ግታ ጋላሳ

¹⁴ “ጎዳ ግታ ጋላሳይ ማትስ፤ ኤለስድ ጋክስ። ጎዳ ጋላሳይ ጫሞ ጋላስ፤ ሄ ጋላስ ምኖ ኦላንቾትካ ዋሶ ጎቻና።

¹⁵ ሄ ጋላሳይ ሀንቆ ጋላስ፥ ሄ ጋላሳይ መቶነ ኡንአ ጋላስ፥ ዮነ ላለተ ጋላስ፥ ማነ ጫጋና ጋላስ፥ ሻራነ ሳካና ማ ጋላስ ግዳና።

¹⁶ ሄ ጋላሳይ ድረትዳ ካታማታ ቦላ፥ አዱሳ ግምበታ ቦላ ኦላ ሞይዘይ ፑነታና፤ ጊገታ ግያ ዋሶይ ስኤታና።

¹⁷ ኤንቲ ታና ቆህዳ ግሾ፥ ቆቀዳ ታታፋና ጋካናዉ፥ ኤንታ ቦላ መቶ ኤሀና። ኤንታ ሱይ ድኦዳ ጎጋና፤ ኤንታ አሀይ ፕቶዳ የገታና።

¹⁸ ጎዳ ሀንቆ ጋላስ ኤንታ ብራይነ ኤንታ ዎርቃይ ኤንታ አሸና። እ ሳአን ደእያ ኡባ ቆፖና ይሳና፤ ቢታ ኡባይ እያ ሀንቁዋ ታማን ሜተታና” ያጌስ ጎዳይ።