Roome 7 - ጌሻ ማፃፋ

ኤኮ ገሎ ሌምሶ

¹ ታ እሻቶ፥ ታኒ ኦደይ ህገ ኤርያ አሳታሳ። ህገይ እስ አስ ፓፃ ደእያ ዎደ ኡባን እያ ሃሬስ።

² ሌምሶስ፥ አዝና ገልዳ ማጫስያ እ አዝናይ ፓፃ ደእያ ዎደ ህገን እያራ ቃሸታሱ። ሽን እ አዝናይ ሀይቅኮ እያራ እያ ጫቅዳ ጫቆይ እዮ ሃረና።

³ ሄሳ ግሾ፥ እያ ባ አዝናይ ፓፃ ደእሽን፥ ሀራ አደ ገልኮ፥ እያ ላምዳሮ ጌተታዉሱ። ሽን እ አዝናይ ሀይቅኮ፥ ጫቆይ እዮ ሃሮና ግሾ እያ ሀራ አዝና ገልኮ፥ እያ ላምዳሮ ጌተቱኩ።

⁴ ሄሳ ግሾ፥ ታ እሻቶ፥ ህንተ ክርስቶሳ አሳተ ባጋራ ህገ ዎልቃስ ሀይቅድ፥ ፆሳስ አይፈ አይፋናዉ ሀይቆፐ ደንድዳ ክርስቶሳስ ግድደታ።

⁵ ኑ አሾ አሞይ ኑና ሃርን፥ ኑ ደእያ ዎደ ህገይ ጉጅ ናጋራ ኦና መላ ኑና ደንስ። ኑ አሳተ ግዶን ኢታ አሞተ ደእያ ግሾ ኑኒ ሀይቆ አይፈ አይፋና መላ ኦስ።

⁶ ሽን ሀእ ኑኒ ኑና ቃችዳ ህግያስ ሀይቅዳ ግሾ ኑኒ ህገ ቃሾፐ ብለትዳ። ሄሳ ግሾ፥ ጌሻ አያና ኦገን ፆሳስ ኪተቶስፐ አትሽን፥ ፃፈትዳ ጭማ ህግያስ ኪተቶኮ።

ህገነ ናጋራ

⁷ ያትን፥ ኑኒ ዎይጋኔ? ህገይ ባ ሁጰን ናጋሬ? ግደና! ሽን ህገይ ናጋር አይበኮ ታና ኤርስስ። ህገይ፥ “አሞቶፋ” ጎናኮ፥ አሞተ አይበኮ ታኒ ኤርከ።

⁸ ሽን ታ ኡባባ አሞታና መላ ናጋር ህገ ባጋራ ታናን ኦገ ደምስ። ህገይ ባይነኮ ናጋር ሀይቅዳይሳ።

⁹ ካሰ ህገይ ባይና ዎደ ታ ፓፃ፥ ሽን ህገይ እመትዳ ዎደ ናጋር ፓፅን ታ ቃስ ሀይቃስ።

¹⁰ ታኒ ደኦን ዳና መላ ፆሳይ እምዳ ህገይ ታዉ ሀይቆ ኤህስ።

¹¹ ናጋር ህገ ባጋራ ታና ጭምያ ኦግያ ደምድ፥ ዎስ።

¹² ሄሳ ግሾ፥ ህገይ ጌሽ፤ እያን ፃፈትዳ ኪታይካ ጌሽ፥ ፅሎነ ሎኦ።

¹³ ያትን፥ ሎኦ ግድዳባይ ታ ቦላ ሀይቆ ኤህደዬ? ግደና! ሽን ናጋር ናጋራ ግደይስ ቆንጫና መላ ሎኦባን ማደትድ ታዉ ሀይቆ ኤህስ። ሄሳ ግሾ፥ ናጋራ ናጋራተይ ህገ ባጋራ አድ ኤረትስ።

¹⁴ ኑኒ ህገይ አያናባ ግደይሳ ኤሮስ። ሽን ታኒ ናጋራስ ባይዘትዳ አሾ አስ።

¹⁵ ታኒ ኦያባ አኬክከ፤ ታኒ ዶስያባ ኦናይሳ አጋዳ ታ እፅያባ ኦይስ።

¹⁶ ታኒ እፅያባ ኦያ ግድኮ፥ ህገይ ሎኦ ግደይሳ ታ ማአይስ።

¹⁷ ሄሳ ግድኮ፥ ሄ ኦሱዋ ታናን ደእያ ናጋራይ ኦይስፐ አትሽን፥ ታ ኦከ።

¹⁸ ታናን፥ ሄስካ ታ አሹዋን ሎኦባይ ባይናይሳ ኤራይስ። ሎኦባ ኦያ አሞተ ታናን ደኤስ፥ ሽን ሎኦባ ኦናዉ ዳንዳእከ።

¹⁹ ታኒ እፅያ ኢታባ ኦይስፐ አትሽን፥ ታ ዶስያ ሎኦባ ኦከ።

²⁰ ታኒ እፅያባ ኦያ ግድኮ፥ ሄሳ ታናን ደእያ ናጋራይ ኦስፐ አትሽን፥ ኦይ ታና ግድከ።

²¹ ህዛ፥ ታ ሎኦባ ኦናዉ ዶስሽን፥ ኢታባ ኦሶይ ዎጋ ግደይሳ ደማስ።

²² ታኒ ታ ዎዛናን ፆሳ ህግያን ኡፋይታይስ።

²³ ሽን ታ አሳተ ግዶን ደእያ ታ ቆፋ ህግያራ ኦለትያ ዱማ ህገ በአይስ። ሄ ህገይ ታ አሳተ ግዶን ኦያ ናጋራ ህግያስ ታና አይለ ኦድ እሚስ።

²⁴ ታኒ ዋንዳ ይባታ አሴ? ሀይቆስ ኤፍያ ሀ አሳተፈ ታና አሻናይ ኦኔ?

²⁵ ኑ ጎዳ የሱስ ክርስቶሳ ባጋራ ታና አሽያ ፆሳስ ጋላታይ ግዶ። ህዛ፥ ታኒ ታ ቆፋን ፆሳ ህግያስ ሃረታይስ፤ ሽን ታ አሳተን ታና ናጋራ ኦስስያ ህግያስ ሃረታይስ።