Roome 4 - ጌሻ ማፃፋ

አብራሃመይ አማኖን ፅልስ

¹ ያትን፥ ኑ ማይዛይ አብራሃመይ አይ ደምዴ?

² አብራሃመይ ኦሶን ፅልዳባ ግድያኮ፥ እ ጬቀትያባይ ደኤስ፥ ግዶሽን፥ ፆሳ ስንን ጬቀታናዉ ዳንዳኤና።

³ ጌሻ ማፃፋይ፥ “አብራሃመይ ፆሳ አማንስ፤ ፆሳይ ሄሳ እያዉ ፅሎተ ኦድ ኤክስ” ያጌስ።

⁴ ኦያ ኡራይ ኤክያ ዳሞዘይ፥ እያ ኦሶ ዎልቃስ ጭገትያ ጋተፐ አትሽን፥ እያዉ እሞታ ግደና።

⁵ ሽን ኦሶ ኦና ኦንካ ናጋራንቹዋ ፅልስያ ፆሳ አማንኮ፥ እያ አማኖይ እያዉ ፅሎተ ግድድ ታይበቴስ።

⁶ ጌሻ ማፃፋን ዳዊቲ፥ ኦሶይ ባይና ፆሳይ ፅልስያ አሳት አይ መላ አንጀትዳኮ ሀይሳዳ ያግድ ቆንጭሴስ፦

⁷ “ኤንታ ባላይ አቶ ጌተትዳይሳትነ ኤንታ ናጋራይ ካመትዳይሳት አንጀትዳይሳታ።

⁸ ጎዳይ እያ ናጋራ ታይቦና አስ አንጀትዳይሳ” ያጌስ።

⁹ ያትን፥ ዳዊቲ ኦድዳ አንጆይ ቃፃረትዳ አሳ ፃላላሰዬ? ዎይኮ ቃፃረትቦና አሳሴ? ኑኒ፥ “ጌሻ ማፃፋይ፥ ‘አብራሃመይ ፆሳ አማንስ፤ ፆሳይ ሄሳ እያዉ ፅሎተ ኦድ ኤክስ’ ያጌስ” ግዳ።

¹⁰ ያትን፥ ሄስ አዉደ ሀንዴ? አብራሃመይ ቃፃረትነዬ? ዎይኮ ቃፃረቶና ደእሽኔ? ቃፃረታናፐ ስን ሀንስፐ አትሽን፥ ጉየ ግደና።

¹¹ አብራሃመይ ቃፃረታናፐ ስን እያ አማኖይ እያዉ ፅሎተ ግድድ ታይበትዳይሳ ኤርሳናዉ፥ እያ ቃፃሮይ ማላታ ግድስ። ሄሳ ግሾ፥ አብራሃመይ ቃፃረቶና አማነይሳታስነ አማኖን ፅለይሳታ ኡባስ አዋ ግድስ።

¹² እ ቃፃረትዳይሳታስካ አዋ። አብራሃመይ ኤንታዉ አዋ ግድዳይ ኤንቲ ቃፃረትዳ ግሾ፥ ፃላላስ ግዶናሽን፥ እ ቃፃረታናፐ ስን አማንዳ አማኑዋ ኤንቲ ካልዳ ግሾሳ።

¹³ አብራሃመስነ እያ ሼሻስ፥ “አላምያ ታ ህንተዉ እማና” ያግዳ ኡፋይሳይ፥ አብራሃመይ አማኖን ፅልዳ ግሾሳፈ አትሽን፥ ህገ ናግድ ፖልዳ ግሾ ግደና።

¹⁴ ህገስ ኪተትዳይሳት ፆሳይ እማና ግዳ ኡፋይሳ ላተይሳታ ግድኮ፥ አሳ አማኖይ ማደና፤ ፆሳ ኡፋይሳይ ሀዳ ግድስ።

¹⁵ ህገ መንይ ፆሳ ሀንቆ ኤሄስ፥ ሽን ህገይ ባይናሶን ህገ መንይ ባዋ።

¹⁶ ሄሳ ግሾ፥ ፆሳይ እምዳ ኡፋይሳይ አማኖን ኤከቴስ። ሀ ኡፋይሳይ አብራሃመ ሼሻ ኡባስ ፆሳ አ ኬሀተ ባጋራ እመትዳይሳ ቆንጭሴስ። ሄስካ ህገ ናገይሳታ ፃላላስ ግዶናሽን፥ አብራሃመዳ አማንዳ ኡባሳ። አብራሃመይ ኑ ኡባስ አዋ።

¹⁷ ጌሻ ማፃፋን፥ “ታ ነና ዳሮ ካዎተታስ አዋ ኦስ” ጌተትድ አብራሃመ ግሾ፥ ፃፈትስ። ሀ ኡፋይሳይ አብራሃመስ እመትዳይ ሀይቅዳይሳታስ ደኦ እመይስነ ኦራባ ኦያ ፆሳይ እያ ግደይሳ እ አማንዳ ግሾሳ።

¹⁸ ፆሳይ አብራሃመስ ዳሮ ኮቸ እማናይሳ ጫቅስ። ኡፋይስ ኦናዉ አይኮካ ዳንዳኤቶና ዎደ አብራሃመይ ፆሳን አማንዳ ግሾነ ኡፋይስ ኦዳ ግሾ፥ ዳሮ ካዎተታስ አዋ ግድስ።

¹⁹ አብራሃመስ ፄቱ ላይ ኩማና ሀንኮካ፥ ባ ዳቡርዳ አሳተነ ሳራ ናአ የላናዉ ዳንዳኦናይሳ ኤርሸ ባ አማኑዋን ዳቡርቤና።

²⁰ ግዶሽን፥ እ ባ አማኑዋን ምንድ ፆሳስ ቦንቾ እሚስፐ አትሽን፥ ፆሳይ እምዳ ኡፋይሳ አማኖና እፅድ፥ ስቤና።

²¹ አብራሃመይ፥ ፆሳይ ጫቅዳ ጫቁዋ ፖላናይሳ ባ ኩመ ዎዛናን አማንስ።

²² ሄሳ ግሾ፥ ፆሳይ እያ አማኑዋ ፅሎተን ታይብስ።

²³ ሽን፥ “እያዉ ፅሎተን ታይብስ” ግያ ቃላይ አብራሃመ ፃላላስ ፃፈትቤና።

²⁴ ሄ ቃላይ ኑ ጎዳ የሱሳ ሀይቆፐ ደንዳ ፆሳ አማንያ ኑስካ ኑ አማኖይ ፅሎተን ታይበታና መላ ፃፈትስ።

²⁵ ፆሳይ እያ ኑ ናጋራ ግሾ፥ ሀይቆስ አድ እሚስ፤ እ ኑና ፅልሳናዉ ሀይቆፐ ደንድስ።