ዮሃኒሳ ቆንጬ 9 - ጌሻ ማፃፋ

¹ ሄሳፈ ጉየ፥ እቻሻን ኪታንቾይ ባ ሞይዝያ ፑንን ሳሎፐ ዱገ ሳአ ኩንድዳ ፆልንቶ በአስ። ሄ ፆልንቱዋስ ዎልቃማ ኦላ ቁልፐይ እመትስ።

² ፆልንቶይ ኦላ ዶይዳ ዎደ ዳልጋ ጮጨፐ ከይያ ጩያ መላ ጩያይ ሄ ኦላፈ ከይስ። ሄ ኦላፈ ከይዳ ጩያን አውነ ሳሎይ ምዶሶና።

³ ሄ ጩያፐ ቦለይ ከይድ ሳአን ዎስ። ሳአን ደእያ ኮርነታስ ደእያ ዎልቃ መላ ዎልቃይ ቦለታስ እመትስ።

⁴ ፆሳ ማታመይ ሶምኦን ባይና አሳ ፃላላፐ አትሽን፥ ሳአን ደእያ ማታ ዎይኮ ም ዎይኮ አይ ጭልኦባ ግድን ቆሆና መላ ቦለታስ ኦደትስ።

⁵ ቦለት አሳ እቻሹ አጌና ጋካናዉ ፓፃ ካአና መላ ማት እመትስፐ አትሽን፥ አሳ ዎና መላ ግደና። ኮርነይ አሰ ዱክን ዛመይሳ መላ ቦለይ ዱክድ ዛምሴስ።

⁶ ሄ ጋላሳታን አሳይ ሀይቆ ኮያና፥ ሽን ደመና። ኤንቲ ሀይቃናዉ አሞታና፥ ሽን ሀይቆይ ኤንታፈ ሃካና።

⁷ ቦለይ ኦላስ ጊግድ ኡትዳ ፓራ ዳኔስ። ቦልያ ሁጰን ዎርቃ ካላች ደኤስ፤ ኤንታ ሶምኦይካ አሳ ሶምኦ ዳኔስ።

⁸ እያ ብናናይ ማጫሳ ብናና መላ አዱሰ። ኤንታ አቻይካ ጋሞ አች ዳኔስ።

⁹ ኤንታዉ ትራ ቦላ ዎያ ብራታ ፁሩረይ ደኤስ፤ ኤንታ ቀፍያ ግርሳይ ኦለታናዉ ጋላብያ ፓራነ ፓራ ጋርያ ግርሳ መላ።

¹⁰ ኤንታዉ ኮርነ ጎይና ዳንያ ጎይንነ ዱክያ ዪሽ ደኤስ። ሄ ጎይናን እቻሹ አጌና አሳ ቆሀና መላ ማት እመትስ።

¹¹ ኤንታና ሃርያ ካዎይ ደኤስ፤ ሄ ካዎይ ኦላ ኪታንቹዋ። እያ ሱንይ እብራወ ዶናን አብዶና፤ ቃስ ግርከ ዶናን አጶልዮና ጌተቴስ። እያ ሱን ብርሸይ “ይሰይሳ” ጉሱ።

¹² ኮይሮ አየይ አስ፤ ሄኮ፥ ቡሮ ሀራ ናምኡ አየት ኤሶን ሀናና።

¹³ ኡሱፑን ኪታንቾይ ባ ሞይዝያ ፑንስ። ፆሳ ስንን ኤቅዳ፥ ዎርቃ ያርሾ በሳን ደእያ ኦይዱ ካጨታፐ እስ ግርስ ስአስ።

¹⁴ ሄ ግርሳይ ሞይዘ ኦይክዳ ኡሱፑን ኪታንቹዋኮ፥ “ኤፍራፂሳ ጌተትያ ግታ ሻፋን ቃሸትዳ ኦይዱ ኪታንቾታ ብርሻ” ያግስ።

¹⁵ ቢታ ቦላ ደእያ አሳፐ ስኩዋ ዎና መላ ሄ ሳትያስ፥ ሄ ጋላሳስ፥ ሄ አጌናስነ ሄ ላይስ ጊግድ ኡትዳ ኦይዱ ኪታንቾት ብርሸትዶሶና።

¹⁶ ኦላ ፓራ ቶግያ ኦላንቾታ ፓይዶይ ዳሮ ፄቱ ምሎነ ግደይሳ ስአስ።

¹⁷ ቃስ ታ ቆንጨን ፓራታነ ሄ ፓራታ ቶግዳ አሳ በአስ። ሄ አሳይ ትራን ዎያ ብራታ ፁሩረይ ታማ ቦንቆ መላ ዞኦ፥ ያክንተ መላ፥ ካሬ ካሎሰ መላነ ዲነ መላ ጭሊሎ። ፓራታ ሁጰይ ጋሞ ሁጰ መላ፤ ኤንታ ዶናፐ ታም፥ ጩይነ ዲነይ ከይስ።

¹⁸ ፓራታ ዶናፐ ከይዳ ታማን፥ ጩያንነ ዲንያን ሄ ሄ ጋዶታን ሳአን ደእያ አሳፐ ስኮይ ሀይቅስ።

¹⁹ ሄ ፓራታ ዎልቃይ ኤንታ ዶና ግዶንነ ጎይናን ደኤስ። ኤንታ ጎይናይካ ሾሻ ሁጰ መላ፤ ኤንቲ እያራ አሳ ቆሆሶና።

²⁰ ሀ ጋዶታፐ አትዳይሳት ባንታ ኩሸ ኦሱዋፐ ስምቦኮና። ኤንቲ ቱና አያናን ዎርቃፈ፥ ብራፐ፥ ናሰ ብራታፐነ ሹቻፈ ኦሰትዳ ኤቃስ ጎይኖሶና። ፄላናዉ፥ ስአናዉ፥ ሄመታናዉ ዳንዳኦና ኤቃታስ ጎይነይሳ አግቦኮና።

²¹ አሳይ ዎይሳ፥ ብተይሳ፥ ላይማተይሳነ ካይሰይሳ አግድ ማሮታ ኦይችቦኮና።