ዮሃኒሳ ቆንጬ 8 - ጌሻ ማፃፋ

ላፑን ማታመይ ዶየትስ

¹ ዶርሳይ ላፑን ማታምያ ዶይዳ ዎደ ባጋ ሳተ ግደይሳ መላ ሳሎይ ስእ ግስ።

² ሄሳፈ ጉየ፥ ታኒ ላፑን ሞይዘት እመትዳ ላፑን ኪታንቾታ ፆሳ ስንን ኤቅዳይሳታ በአስ።

³ እፃነ ጩይስያ ዎርቃ ሻተ ኦይክዳ ሀራ ኪታንቾይ ይድ፥ ያርሾ በሳ ማታን ኤቅስ። እ አራታ ስንን ደእያ ዎርቃ ያርሾ በሳ ቦላ ጌሻታ ኡባ ዎሳራ ጉጅድ ያርሻና መላ እያዉ ዳሮ እፃነይ እመትስ።

⁴ እፃንያ ጩያይ ጌሻታ ዎሳራ እስፈ ኪታንቹዋ ኩሸፐ ፑደ ፆሳኮ ከይስ።

⁵ ሄሳፈ ጉየ፥ ኪታንቾይ እፃነ ጩይስያ ሻትያ ኤክድ፥ እያን ያርሾ በሳፈ ቦንቆ ታማ ኩንድ ሳአ ዱገ ሆልስ። ያትን ደሾይ፥ ዎልአን፥ ግርስነ ቢታ ቃፆይ ሀንስ።

ላፑን ሞይዘታ

⁶ ሄሳፈ ጉየ፥ ላፑን ኪታንቾት ባንታ ሞይዝያ ፑናናዉ ጊገትዶሶና።

⁷ ኮይሮ ኪታንቾይ ባ ሞይዝያ ፑንያ ዎደ ሻችነ ሱራ ዋላከትዳ ታም ሳሎፐ ቡክስ። ሳኣፐ ስኮይ ፁገትስ፤ ምፈ ስኮይ ፁገትስ፤ ጭልኦ ማታ ኡባይ ፁገትስ።

⁸ ናምአን ኪታንቾይ ባ ሞይዝያ ፑንዳ ዎደ ዎልቃማ ዙማ ዳንያባይ ታማን ኤፅሸ አባን የገትስ። ያትን፥ አባፈ ስኮይ ሱ ግድስ።

⁹ አባን ደኦን ደእያ መተፈ ስኮይ ሀይቅስ፤ ማርካበታፐ ስኮይ ይስ።

¹⁰ ሄን ኪታንቾይ ባ ሞይዝያ ፑንዳ ዎደ ፆምፐዳ ኤፅያ ዎልቃማ ፆልንቶይ ሻፋፐ ስኩዋ ቦላነ ፑልቶታ ቦላ ሳሎፐ ዎስ።

¹¹ ሄ ፆልንቱዋ ሱንይ ጫሞ ጌተቴስ። ሃፈ ስኩዋ ጫምስስ፤ ሃይ ጫምዳ ግሾ፥ ዳሮ አሳይ ሄ ሃ ኡይድ ሀይቅዶሶና።

¹² ኦይዳን ኪታንቾይ ባ ሞይዝያ ፑንስ። አዋፐ፥ አጌናፐነ ፆልንቶታፐ ስኩዋ ደችስ፤ ኤንታ ፖኡዋፐ ስኮይ ምስ። ጋላሳፐ ስኮይ፥ ቃማፈካ ስኮይ ምስ።

¹³ እስ አርጋን ሳሎ ቁ ግድ፥ ፕራሽን በአስ። ሄ አርጋንይ ባ ቃላ ቁ ኦድ፥ “አትዳ ሄ ኪታንቾት ባንታ ሞይዝያ ፑናናዉ ደእያ ግሾ፥ ሳአን ደእያ አሳ አየ! አየ! አየ!” ያግሽን ስአስ።