ዮሃኒሳ ቆንጬ 7 - ጌሻ ማፃፋ

144,000 አሳት ማለትዶሶና

¹ ሄሳፈ ጉየ፥ ኦይዱ ኪታንቾት ኦይዱ ሳኣ ጋፃን ኤቅዳይሳታ በአስ። ሄ ኪታንቾት ሳአ ቦላ ዎይኮ አባ ቦላ ዎይኮ አይ ም ቦላ ጫርኮይ ኦይዱ ሳኣ ጋፃፐ ጫርኮና መላ ተቅዶሶና።

² ቃስ ደኦ ፆሳ ማታምያ ኦይክዳ ሀራ ኪታንቾይ ዶሎሀ ባጋፈ ከየይሳ በአስ። ሄ ኪታንቾይ ባ ቃላ ቁ ኦድ፥ ሳኣነ አባ ቆሀናዉ ዎልቅ እመትዳ ኦይዱ ኪታንቾታ፥

³ ፄግድ፥ “ኑኒ ፆሳ አይለታ ሶምኦን ማታምያ ዎና ጋካናዉ ቢታ ዎይኮ አባ ዎይኮ ም ቆሆፕተ” ያግስ።

⁴ ያትን፥ ታኒ ፆሳ ማታመይ ሶምኦን ዎሰትዳይሳታ ፓይዱዋ ስአስ። እስራኤለ ማይዛታ ኡባፈ 144,000 አሳስ ሶምኦን ማታመ ዎስ።

⁵ ይሁዳ ኮቻፈ ታማነ ናምኡ ሙኩሉ፥ ሮቤላ ኮቻፈ ታማነ ናምኡ ሙኩሉ፥ ጋደ ኮቻፈ ታማነ ናምኡ ሙኩሉ፥

⁶ አሴራ ኮቻፈ ታማነ ናምኡ ሙኩሉ፥ ንፍታለመ ኮቻፈ ታማነ ናምኡ ሙኩሉ፥ ምናሰ ኮቻፈ ታማነ ናምኡ ሙኩሉ፥

⁷ ስሞና ኮቻፈ ታማነ ናምኡ ሙኩሉ፤ ሌወ ኮቻፈ ታማነ ናምኡ ሙኩሉ፥ ይሳኮራ ኮቻፈ ታማነ ናምኡ ሙኩሉ፥

⁸ ዛብሎና ኮቻፈ ታማነ ናምኡ ሙኩሉ፥ ዮሰፋ ኮቻፈ ታማነ ናምኡ ሙኩሉ፥ ብንያመ ኮቻፈ ታማነ ናምኡ ሙኩሉ፥ አሳ ሶምኦን ማታመ ዎስ።

ቦ ማኦ ማእዳ አሳታ

⁹ ሄሳፈ ጉየ፥ ኮቸ ኡባፈ፥ ካዎተ ኡባፈ፥ ያራ ኡባፈነ ዱማ ዱማ ዶናፐ ዛው ባይና ዳሮ አሳ በአስ። ሄ አሳይ ቦ ማኦ ማእድ፥ ዛምባ ሀይ ባንታ ኩሸን ኦይክድ፥ አራታ ስንንነ ዶርሳ ስንን ኤቅዶሶና።

¹⁰ ኤንቲ ባንታ ቃላ ቁ ኦድ፥ “አቶተይ አራታን ኡትዳ ኑ ፆሳፈነ ዶርሳፈ ዬስ” ያግዶሶና።

¹¹ ኪታንቾት ኡባይ አራታ፥ ጭማታነ ኦይዱ መተታ ዩሹዋን ኤቅዶሶና። ኤንቲ አራታ ስንን ጉፋንድ ፆሳ ጎይንዶሶና።

¹² “አምንእ! አንጆይ፥ ቦንቾይ፥ ጭንጫተ፥ ጋላት፥ ሳብ ዎልቅ፥ ምኖተ መር መርናዉ ኑ ፆሳስ ግዶ። አምንእ!” ያግዶሶና።

¹³ ጭማታፐ እሶይ ታኮ፥ “ሀ ቦ ማኡዋ ማእዳ አሳት ኦናንቴ? ኤንቲ አዉፐ ይዶና?” ያግድ ኦይችስ።

¹⁴ ታኒ ዛራዳ፥ “ጎዳዉ፥ ነ ኤራሳ” ያጋስ። እካ ታኮ፥ “ሀይሳቲ ዳሮ ዋየ ዋይድ አዳይሳታ። ኤንቲ ባንታ ማኡዋ ዶርሳ ሱን ሜጭድ ጌሽዶሶና።

¹⁵ ሄሳ ግሾ፥ ኤንቲ ፆሳ አራታ ስንን ግድድ ቃማነ ጋላስ እያ ኬን ኦሶና፤ አራታ ቦላ ኡትዳይስ ኤንታዉ ኩያ ግዳና።

¹⁶ ህዛፐ ጉየ፥ ኤንቲ ኮሻቶኮና፥ ሳሞቶኮና። አው ዎይኮ ምሽ ኤንታ ሜና።

¹⁷ አራታ ግዶን ኡትዳ ዶርሳይ ኤንታ ሄማና። ደኦ ፑልቶ ሃኮ ኤንታ ካለና። ፆሳይ ኤንታ አይፈፐ አፉ ኡባ ቁቻና” ያግስ።