ዮሃኒሳ ቆንጬ 3 - ጌሻ ማፃፋ

ሳርዴሳ ዎሳ ኬ

¹ “ሳርዴሳ ዎሳ ኬ ኪታንቹዋስ ሀይሳዳ ያጋዳ ፃፋ። ላፑን ፆሳ አያናታነ ላፑን ፆልንቶታ ኦይክዳይስ ሀይሳዳ ያጌስ፦ ታኒ ነ ኦሱዋ ኤራይስ፤ አስ ነና ፓፃ ደኤስ ጊኮካ፥ ነ ሀይቃዳሳ።

² ባርካ፤ አትዳ ጉባነ ሀይቃናዉ ማትዳባ ምን። ነ ኦሶይ ፆሳ ስንን ፖሎ ግዶናይሳ ደማስ።

³ ህዛ፥ ነ ኤክዳባነ ስእዳባ አኬካ፤ ናጋ፤ ነ ናጋራፐ ስማ። ኔኒ ባርኮና እፅኮ ታ ካይሶዳ ያና፤ ታ አይ ዎደ ያነኮ ነ ኤራካ።

⁴ ሽን ባንታ ማኡዋ ቅታዮና ጉ አሳት ሳርዴሳን ደኦሶና። ኤንታዉ በሲያባ ግድያ ግሾ ቦ ማኦ ማእድ ኤንቲ ታራ ሄመታና።

⁵ ፆንያ ኦንካ ኤንታይሳዳ ቦ ማኦ ማአና። ታኒ እያ ሱን ደኦ ማፃፋፐ ቁችከ። ታኒ ታ አዋ ስንንነ እያ ኪታንቾታ ስንን እ ታባ ግደይሳ ማርካታና።

⁶ ጌሻ አያናይ ዎሳ ኬታስ ግያባ ስእያ ሀይ ደእያ ኦንካ ስኦ።

ፍላደልፍያ ዎሳ ኬ

⁷ “ፍላደልፍያ ዎሳ ኬ ኪታንቹዋስ ሀይሳዳ ያጋዳ ፃፋ። ጌሻይነ ቱማንቾይ፥ ዳዊታ ቁልፕያ ባ ኩሸን ኦይክዳይስ፥ ሀይሳዳ ያጌስ፦ እ ጎርድን ኦንካ ዶያናዉ ዳንዳኤና፤ ቃስ እ ዶይን ኦንካ ጎርዳናዉ ዳንዳኤና።

⁸ ታኒ ነ ኦሱዋ ኤራስ፤ ሄኮ ታ ነ ስንን ኦንካ ጎርዳናዉ ዳንዳኦና ዶያ ፐንገ ዎስ። ነ ዎልቃይ ጉ ግድኮካ፥ ታ ቃላ ናጋዳሳ፤ ታና ካዳባካ።

⁹ አይሁደ ግዶናሽን፥ ባንታና አይሁደ ግያ ዎርዶታነ ፃላሄ ባጋታ ኔኮ ኤሀናነ ነ ስንን ጉልባትሳና። ታ ነና ዶሰይሳ ኤንታና ኤርሳና።

¹⁰ ኔኒ፥ ‘ገንጫ’ ጋዳ ታ ኪትዳ ኪታ ናግዳ ግሾ፥ ኩመ አላምያ ፓጫናዉ ያ ዋየ ዎድያፐ ታኒ ነና ናጋና።

¹¹ ታኒ ኤለሳዳ ያና፤ ኦንካ ነ ካላቻ ኤኮና መላ ነዉ ደእያባ ምንዳ ኦይካ።

¹² ፆንዳይሳ ታ ፆሳ ኬን ቱሱ ኦና፤ እ ያን መርናዉ ዳና። ታኒ ታ ፆሳ ሱንነ ታ ፆሳ ካታማ ሱን እያ ቦላ ፃፋና፤ እያካ ታ ፆሳ ማታፐ ዎያ ኦራ የሩሳላመ። ቃስ ታኒ ታ ኦራ ሱንካ እ ቦላ ፃፋና።

¹³ ጌሻ አያናይ ዎሳ ኬታስ ግያባ ስእያ ሀይ ደእያ ኦንካ ስኦ።

ሎዶቀ ዎሳ ኬ

¹⁴ “ሎዶቀ ዎሳ ኬ ኪታንቹዋስ ሀይሳዳ ያጋዳ ፃፋ። አምንእ ግድዳ አማነትዳ ቱማ ማርካይ፥ ፆሳ መተ ሃረይስ ሀይሳዳ ያጌስ፦

¹⁵ ታኒ ነ ኦሱዋ ኡባ ኤራይስ፤ ኔኒ እርፃ ዎይኮ ምሻ ግዳካ፤ ኔኒ ናምኣፈ እሱዋ ግድኮ ሎኦ!

¹⁶ ኔኒ እርፃ ዎይኮ ምሻ ግዶናሽን፥ ቦልኦ ግድያ ግሾ ታ ነና ታ ዶናፐ ጩታና ሀናይስ።

¹⁷ ህዛ፥ ኔኒ፥ ‘ታኒ ዱረ፥ ሻሎራ ደአይስ፥ ታዉ አይብባይካ ፓጭቤና’ ያጋሳ። ሽን ኔኒ መቶታንቾ፥ ማንቆ፥ ቆቀነ ካሎትዳ አስ ግደይሳ ኤራካ።

¹⁸ ሄሳ ግሾ፥ ነ ዱረታናዉ ታማን ጌይዳ ዎርቃ፥ ነ ዬላ ካሉዋ ካማናዉ ቦ ማኦነ ሎይ ፄላናዉ ዳንዳእስያ አይፈ ለ ታፐ ሻማና መላ ነና ታ ዞራይስ።

¹⁹ ታ ዶሰይሳ ሴራይስነ ሀንቃይስ፤ ህዛ ምና፤ ነ ናጋራፐ ስማ።

²⁰ ሄኮ፥ ታ ካረን ኤቃዳ ፄጋይስ። ኦንካ ታ ፄሳ ስእድ፥ ዉላ ዶይኮ፥ እያኮ ገላና፤ እያራ እስፈ ካ ማና፤ እካ ታራ እስፈ ማና።

²¹ ታ ፆናዳ ታ አዋራ እያ አራታን ኡትዳይሳዳ ፆንዳይ ታራ ታ አራታን ኡታና መላ ማታ እማና።

²² ጌሻ አያናይ ዎሳ ኬታስ ግያባ ስእያ ሀይ ደኤይ ኦንካ ስኦ” ያግስ።