ዮሃኒሳ ቆንጬ 19 - ጌሻ ማፃፋ

¹ ያትን፥ ሳሎን ዳሮ አሳይ፥ “ፆሳይ ጋላተቶ! አቶተይ፥ ቦንቾይነ ዎልቃይ ኑ ፆሳስ ግዶ።

² እያ ፕርዳይ ቱማነ ፅሎ። ሳኣ ቱንስዳ ኢታ ላይምዉ ፆሳይ ፕርድስ። ፆሳይ ባ አይለታ ሱ ኢፐ አችስ” ያግሽን ስአስ።

³ ሄ አሳይ ዛሪድ ባንታ ቃላ ቁ ኦድ፥ “ፆሳ ጋላት ጋኮ። ሄ ካታምያ መርናዉ ጩያሸ ዳና” ያግዶሶና።

⁴ ላታማነ ኦይዱ ጭማትነ ደኦን ደእያ ኦይዱ መተት አራታን ኡትዳ ፆሳስ ጉፋንድ፥ “አምንእ! ፆሳ ጋላት ጋኮ” ያግድ ጎይንዶሶና።

⁵ ያትን፥ “ፆሳ አይለት፥ ፆሰ ያይያ ጉነ ግት ኡባይ፥ ኑ ፆሳ ጋላትተ” ግያ ቃላይ አራታፐ ከይስ።

⁶ ያትን፥ ዳሮ አሳዳ ዎጫምያ፥ ዎልቃማ ሻፋዳ ጉምያ፥ ዳዳዳ ደችያ ግርሳይ፥ “ፆሳ ጋላት ጋኮ፤ ኑ ጎዳይ፥ ኡባፈ ዎልቃማ ፆሳይ ካዎትስ።

⁷ ዶርሳ ያጋኖይ ጋክዳ ግሾነ እያ ገልያራ ጊግዳ ግሾ፥ ኑ ኡፋይቶስ፥ ጋላቶስነ ዶርሳ ቦንቾስ።

⁸ ገሎስ ጊግዳራ ጶልያነ ጌሽ ግድዳ ሊኖ ማአና መላ እዉ እመትስ” ያግሽን ታ ስአስ። (ሊኖ ማኦይ ጌሻታ ፅሎ ኦሶ ሌምሶ።)

⁹ ሄሳፈ ጉየ፥ ኪታንቾይ ታኮ፥ “ዶርሳ ያጋኖ ፄገትዳይሳት አንጀትዳይሳታ” ጋዳ ፃፋ። ሄ ኪታንቾይ ጉጅድ፥ “ሀይስ ፆሳ ቱማ ቃላ” ያግስ።

¹⁰ ሄ ዎደ ታ እያ ጎይናናዉ እያ ቶሁዋ ቦላ ኩንዳስ። ሽን እ፥ “ሄሳ ኦፋ! ታኒ የሱሳባ ማርካትያ ነ መላነ ነ እሻታ መላ። ነ ፆሳ ጎይና” ያግስ። ህዛ፥ የሱሳባ ማርካትዳይሳታስ ናበተ አያን ደኤስ።

ቦ ፓራ ቶግዳይሳ

¹¹ ያትን፥ ሳሎይ ዶየትን፥ ያን ቦ ፓር ደኤይሳ በአስ። ሄ ፓራ ቶግዳይስ አማነትዳይሳነ ቱማንቾ ጌተቴስ። እ ፅሎተን ፕርደስነ ኦለቴስ።

¹² እያ አይፈይ ታማ ላጮ ዳኔስ፤ እያ ሁጰን ዳሮ ካላች ደኤስ። እያ ቦላ እ አትሽን፥ ሀር ኦንካ ኤሮና ፃፈትዳ ሱን ደኤስ።

¹³ እ ሱን ሙከትዳ ማኦ ማእስ፤ እያ ሱንይካ ፆሳ ቃላ።

¹⁴ ጶልያነ ጌሽ ግድዳ ሊኖ ማእዳ ሳሎ ኦላንቾት ቦ ፓራታ ቶግድ እያ ጌዶ ካሎሶና።

¹⁵ ካዎተታ ቃንፅያ ቃራ ማሻይ እያ ዶናፐ ከዬስ። እ ብራታ ፃምአን አሳ ሃራና። ኡባፈ ዎልቃማ ፆሳ ሀንቆ ዎይነ ኡሻ ጉምእያ በሳ እ የና።

¹⁶ እያ ማኡዋ ቦላነ እያ ዎድርያ ቦላ፥ “ካዎታ ካዋነ ጎዳታ ጎዳ” ግያ ሱንይ ፃፈትስ።

¹⁷ ሄሳፈ ጉየ፥ እስ ኪታንቾይ አዋ ቦላ ኤቅዳይሳ በአስ። ሄ ኪታንቾይ ሳሎራ ፕራያ ካፎ ኡባስ ባ ቃላ ቁ ኦድ፥ “ሃ ዪተ! ፆሳ ግብራ ማናዉ እስ በሲ ሺቅተ።

¹⁸ ይድ ካዎታ አሹዋ፥ ሻላቃታ አሹዋ፥ ዎታዳረታ አሹዋ፥ ፓራታ አሹዋ፥ ፓራታ ቶገይሳታ አሹዋ፥ አሳ ኡባ አሹዋ፥ አይለታ አሹዋ፥ ዎማኖታ አሹዋ፥ ግታታነ ጉታ አሹዋ ሚተ” ያግስ።

¹⁹ ዶአይ፥ ፓራ ቶግዳይሳራነ እያ ኦላንቾታራ ኦለታናዉ ሳአ ካዎትነ ኤንታ ኦላንቾት እስ በሲ ሺቅዳሽን በአስ።

²⁰ ሽን ሄ ዶአይነ እያ ሱንን ማላታታ ኦዳ ዎርዶ ናበይ እያራ እስፈ ኦይከትስ። ሄ ማላታታን ዶኣ ማላይ ደኤይሳታነ እያ ምስልያ ጎይነይሳታ እ ባለስ። ዶአይነ ዎርዶ ናበይ ናምአይካ ዲነን ኤፅያ ታማ አባን ፓፃ የገትዶሶና።

²¹ አትዳይሳት ፓራ ቶግዳይሳ ዶናፐ ከይያ ማሻን ሀይቅዶሶና። ካፎት ኡባይ ኤንታ አሹዋ ምድ ካልዶሶና።