ዮሃኒሳ ቆንጬ 18 - ጌሻ ማፃፋ

ባብሎነ ኩንደ

¹ ያትድ፥ ግታ ማት ደእያ ሀራ ኪታንቾይ ሳሎፐ ዎሽን ታ በአስ። ሄ ኪታንቹዋ ቦንቾይ ሳአ ፖእስስ።

² ሄ ኪታንቾይ ባ ቃላ ቁ ኦድ፥ “እያ ኩንዳሱ! ግታ ባብሎነይ ኩንዳሱ! ባብሎነይ ቱና አያናት አቅያ በሲ ግዳሱ። ዱማ ዱማ ኢታባታስ ኬ ግዳሱ፤ ቱና ካፎትነ ዶአት ሸምፕያ በሲ ግዳሱ።

³ አሳ ኮቸ ኡባ ባ ላይማተ ዎይንያ ኡሻሱ። ሳኣ ካዎት ኢራ ላይማትዶሶና። እ ሚኮተፈ ደንዶይሳን ቢታን ደእያ ዛልአንቾት ዱረትዶሶና” ያግስ።

⁴ ሄሳፈ ጉየ፥ ታ ሳሎፐ ሀይሳዳ ግያ ሀራ ቃላ ስአስ። “እ ናጋራ ኢራ ኮፆና መላነ፥ እያ ኤካናዉ ደእያ ሴራ ህንተ ኤኮና መላ፥ ታ ደርያዉ ኢፐ ከይተ።

⁵ ህዛ፥ እ ናጋራይ ሳሎ ጋካናዉ ዶረትስ። ፆሳይ እ ናቁዋ አኬክስ።

⁶ እያ እምዳይሳ መላ ዛሪድ እዉ እምተ። እያ ኦዳ ኦሱዋስ ናምኡ ኩሸ እዉ ዛርተ። እያ ጊግስዳ ኡሻ ቦላ ህንተ ናምኡ ኩሸ ማይያ ኡሻ እ ፁአን ኩንተ።

⁷ እያ ባዉ ቦንቸትዳይሳዳነ እዉ እንጀትዳይሳ መላ፥ እዮ መቶተነ ካዮይተ። እያ ባ ዎዛናን፥ ‘ታኒ ካዌዳ ኡታስ፤ ታ አዝን ባይና ማጫስ ግድከ፤ ታኒ ኡባካ ካዮትከ’ ያጋሱ።

⁸ ሄሳ ግሾ፥ ቦሻ ኡባይ፥ ሀርገይ፥ ካዮይነ ኮሽ እዮ እስ ጋላስ ኦይካና። ቃስ እያ ታማን ፁገታና፤ አይስ ጊኮ፥ እ ቦላ ፕርድያ ፆሳይ ዎልቃማ” ያግስ።

⁹ “ኢራ ላይማትዳይሳትነ እ ሚኮተን ደእዳ፥ አላምያ ካዎት ሄ ካታምያ ፁገትን ከይያ ጩያ በእዳ ዎደ እዉ ዋስድ ዬካና።

¹⁰ ኤንቲ ሄ ካታመ ዋይያ በእድ ያይዳ ግሾ፥ ሃክ ኤቅድ፥ “ ‘ሀ ግታ ካታመ! ዎልቃማ ካታመ! ባብሎነ፥ ነና አየ! ኔኒ እስ ሳተ ግዶን ነ ፕርዳ ኤካዳሳ’ ያጋና።

¹¹ “ኤንታ ማርካብያ ጫና ህዛፐ ሻምያ አስ ባይና ግሾ፥ ሳአን ደእያ ዛልአንቾት ሄ ካታማስ ዋሳናነ ካዮታና።

¹² ኤንታ ዎርቃ፥ ብራ፥ ቦንቾ ሹቹ፥ አልኦ ሹቻ፥ ካሎሰ ማኦ፥ ሊኖ ማኦ፥ ሃረ ማኦ፥ ዞኦ ማኦ፥ ዱማ ዱማ ሳዎ ም፥ ዳንጋርሳ ዛለ፥ አልኦ ም፥ ናሰ ብራታ፥ ጎለ ሹቹ፥

¹³ ቃራፋ፥ ቅማመ፥ እፃነ፥ ካርበ፥ ሽቶ፥ ዎይነ፥ ዛይተ፥ ሎኦ ለ፥ ግስተ፥ መሄ፥ ዶርሰ፥ ፓራ፥ ፓራ ጋረ፥ አይለታነ ሀራ አሳታ ሻምያ ኦንካ ባዋ።

¹⁴ “ዛልአንቾት ማጫሴኮ፥ ‘ኔኒ አሞትዳ ሎኦባ ኡባይ ኔፐ ይስ። ነ አቆይነ አሌቀትዳባ ኡባይ ኔፐ ሃክስ። ኔኒ ዛራዳ ኤንታ ኡባ ደማካ’ ያግዶሶና።

¹⁵ ሄ ካታማን ዛልእድ ዱረትዳ ዛልአንቾት እ መቱዋ ባብድ ኢፐ ሃክድ ኤቃና። ኤንቲ ዬካናነ ካዮታና።

¹⁶ ቃስ፥ “ ‘ሊኖ፥ ካሎሰ ማኦነ ዞኦ ማኦ ማአዳ፥ ዎርቃን፥ ቦንቾ ሹቻንነ እንቆ ጌተትያ አልኦ ሹቻን አሌቀትዳ፥ ሄ ግታ ካታሜስ አየ!

¹⁷ ሀይሳ መላ ግታ ሻሎ ኡባይ እስ ሳተ ግዶን ይስ’ ያግዶሶና። “ማርካብያ ላግያ ኡባይ፥ ማርካብያን ብያ ኡባይ፥ ማርካብያ ቦላ ኦያ ኡባይነ አባን ዛልእያ ኡባይ ሃክ ኤቅዶሶና።

¹⁸ ሄ ካታምያ ፁገትን ከይያ ጩያ በእዳ ዎደ፥ ‘ሀ ግታ ካታምዉ ዳንያ ሀራ ካታም ደእሻ?’ ያግዶሶና።

¹⁹ ኤንቲ ባንታ ሁጰን ባና ቆልድ፥ ዋስዶሶናነ ካዮትዶሶና። “ ‘አባ ቦላ ማርካበት ደእያ ኡባይ፥ እ ሻሉዋን ዱረትዳ ኡባይ፥ ሄ ካታምያ እስ ሳተን ይዳ ግሾ፥ አየ! አየ!

²⁰ ሳሉዋዉ፥ እ ዩዋን ኡፋይታ! ጌሻቶ፥ ሀዋረቶ፥ ናበቶ፥ ፆሳይ ህንተ ግሾ እ ቦላ ፕርድዳ ግሾ ኡፋይትተ’ ያግዶሶና።”

²¹ ያትን፥ ምኖ ኪታንቾይ ዎፃ ዳንያ ግታ ሹቹ ደንድ አባን ሆልሸ፥ “ግታ ካታምያ ባብሎነይ ዎልቃን ሆለታዳ ሀይሳዳ ኩንዳና፤ እያ ሀችፈ ጉየ ኡባካ በንቱኩ።

²² ዲ ዲፀይሳትነ የፀይሳት፥ ሱሱልኤነ ሞይዘ ፑነይሳት፥ ህዛፐ ጉየ ነ ግዶን ኡባካ ስኤቶኮና። አይ ኮቻ ዛልኤ ዛልእያ አስካ ነ ግዶን በንተና። ዎፃ ግርስ ህዛፐ ጉየ ነ ግዶን ስኤተና።

²³ ፆምፐ ፖኦይ ዛሪድ ነ ግዶን ፖኤና። ማቾ ኤከይስነ አዝና ገልያር ቃል ህዛፐ ጉየ ነ ግዶን ስኤተና። ነ ዛልአንቾት ቢታ ኡባን ኤረትዳ ዎልቃማታ። ነ ብታን ካዎተታ ኡባ ጭማዳሳ” ያግስ።

²⁴ ናበታ ሱይ፥ ጌሻታ ሱይነ ቢታ ቦላ ሀይቅዳ አሳ ኡባ ሱይ እ ግዶን በንትዳ ግሾ ባብሎነይ ፕርደታሱ።