ዮሃኒሳ ቆንጬ 17 - ጌሻ ማፃፋ

ግታ ላይማ ማጫስዉ

¹ ላፑን ፁአታ ኦይክዳ ላፑን ኪታንቾታፐ እሶይ ታኮ ይድ፥ “ሃያ፤ ዳሮ ሃታ ቦላ ኡትዳ ግታ ላይማትያ ማጫሰ ቦላ ያናዉ ደእያ ፕርዳ ታ ነና በሳና።

² አላምያ ካዎት ኢራ ላይማትዶሶና፤ አላመን ደእያ አሳይካ እ ላይማተ ዎይንያ ኡይድ ማትዶሶና” ያግስ።

³ ሄ ኪታንቾይ ታና ጌሻ አያናን መላ ቢታ ኤፍስ። ያን እስ ማጫስያ ጫሻ ሱንይ እ ቦላ ኡባን ፃፈትድ ኡትዳ፥ ዞኦ ዶኣ ቶግዳሮ በአስ፤ ሄ ዶኣስ ላፑን ሁጰይነ ታሙ ካጨይ ደኤስ።

⁴ ሄ ማጫስያ ካሎሰ ማኦነ ዞኦ ማኦ ማአሱ፤ እያ ዎርቃን፥ ቦንቾ ሹቻንነ እንቆ ጌተትያ አልኦ ሹቻን አሌቀታሱ። እያ ባ ኩሸን ቦርስያባነ ላይማተ ቱናተን ኩምዳ ዎርቃ ፁአ ኦይካሱ።

⁵ እ ሶምኦን ፁራ ኦሶ ብርሸይ ደእያ ሱንይ፥ “ግታ ባብሎነይ፥ ላይማተስነ ሳአን ደእያ ቱናባ ኡባስ አዮ” ግያ ፁፈይ ፃፈትድ ኡትስ።

⁶ ቃስ ሄ ማጫስያ ጌሻታ ሱነ የሱሳስ ማርካትሸ ሀይቅዳይሳታ ሱ ኡያዳ ማትዳሮ ታ በአዳ ማላለታስ።

⁷ ኪታንቾይ ታኮ፥ “ኔኒ አይስ ማላለታይ? ታኒ ነዉ ማጫሰ ፁራ ኦዳነ እያ ቶክዳ ላፑን ሁጰይነ ታሙ ካጨይ ደእያ ዶኣ ፁራ ኦዳ ኦዳና።

⁸ ኔኒ በእዳ ዶአይ ኮይሮ ደኤስ፥ ሽን ሀእ ባዋ። ሄ ዶአይ ጪሞ ኦላፈ ከይድ ዮስ ባና። ሳእ መቶሳፐ ዶምድ፥ ደኦ ማፃፋን ኤንታ ሱንይ ፃፈትቦና ሳአን ደእያ አሳይ፥ ዶኣ በእድ ማላለታና። ህዛ፥ እ ካሰ ደኤስ፤ ሀእ ባዋ፥ ሽን ስንፈ ያና።

⁹ “ሀይስ ጭንጫተነ አኬካ ኮዬስ። ላፑን ሁጰት ማጫስያ ኡትያ ላፑን ደረታ፤ ሄሳት ቃስ ላፑን ካዎታ።

¹⁰ ኤንታፈ እቻሹ ካዎት ኩንድዶሶና። እሶይ ሀእ ጋካናዉ ሃሬስ፤ ሀንኮ ካዎይ ይቤና። እ ይድ ጉ ዎደ ታካናዉ በሴስ።

¹¹ ስን ደእዳ ዶአይ፥ ሀእ ባይናይስ፥ እ ባ ሁጰን ሆስፑን ዶኣ። እ ላፑን ዶአታፐ እሱዋ፤ እ ያናዉ ቤስ።

¹² “ኔኒ በእዳ ታሙ ካጨት ሃሮ ዶምቦና ታሙ ካዎታ። ሽን ኤንቲ ዶኣራ እስፈ እስ ሳተ ካዎትድ ሃራናዉ ኤንታዉ ማት እመታና።

¹³ ኤንታ ኡባስ እስ ቆፋይ ደኤስ፤ ኤንቲ ባንታ ዎልቃነ ባንታ ማታ ዶኣስ እማና።

¹⁴ ኤንቲ ዶርሳራ ኦለታና፥ ሽን ዶርሳይ ጎዳታ ጎዳነ ካዎታ ካዎ ግድያ ግሾ፥ እ ፄግዳይሳት፥ ዶርዳይሳትነ አማነትዳይሳት ሄ ካዎታ ፆናና” ያግስ።

¹⁵ ኪታንቾይ ቃስካ ታኮ፥ “ላይማትያራ ኡትዳ ሄ ኔኒ በእዳ ሃት ያራታ፥ ካዎተታ፥ ዘረታነ ዱማ ዱማ ዶናን ኦደተይሳታ።

¹⁶ ቃስ ኔኒ በእዳ ታሙ ካጨይነ ዶአይ ላይማትያሮ እፃና። ኤንቲ እዉ ደእያ ኡባባ ኤካና። ቃስ እዮ ካሎ አሻናነ እ አሹዋ ምድጋና፤ ያትድ ኤንቲ እዮ ታማን ፁጋና።

¹⁷ ህዛ፥ ፆሳ ቃላይ ፖለታና ጋካናዉ ኤንታ ቆፋይ እስኖ ግዳና መላ ኤንቲ ባንታ አይስያ ዎልቃ ዶኣስ እማናዳነ ፆሳይ ቆፕዳይሳ ኤንቲ ኦናዳ ኤንታ ዎዛናን ፆሳይ አሞ ዎስ።

¹⁸ ሄ ኔኒ በእዳ ማጫስያ ሳአ ካዎታ ሃርያ ግታ ካታምዉ” ያግስ።