ዮሃኒሳ ቆንጬ 16 - ጌሻ ማፃፋፆሳ ሀንቆይ ኩምዳ ፁአታ 1 ሄሳፈ ጉየ፥ ፆሳ ኬፈ ላፑን ኪታንቾታኮ፥ “ብድ ፆሳ ሀንቁዋ ላፑን ፁአታፐ ሳአን ጉስተ” ያግድ፥ ኦድያ ዎልቃማ ቃላ ስአስ። 2 ኮይሮ ኪታንቾይ ብድ፥ ባ ፁአን ደኤይሳ ሳአን ጉስን፥ ዶኣ ማላይ ደኤይሳታ ቦላነ እያ ምስልያ ጎይንዳይሳታ ቦላ ኢታነ ዛምያ ማዱን ከይስ። 3 ናምአን ኪታንቾይ ባ ፁአን ደኤይሳ አባን ጉስን፥ አባይ ሀይቅዳ አሳ ሱ ዳንስ። ቃስ አባን ደእያ መተ ኡባይ ሀይቅስ። 4 ሄን ኪታንቾይ ባ ፁአን ደኤይሳ ሻፋታንነ ፑልቶ ሃታን ጉስን፥ ሃት ሱ ግድዶሶና። 5 ሄሳፈ ጉየ፥ ሃ ቦላ ማት ደእያ ኪታንቾይ ሀይሳዳ ያግሽን ስአስ። “ሀእካ በንካ ደእያ ጌሻዉ፥ ሀይሳዳ ነ ፕርድዳ ግሾ ኔኒ ፅሎ። 6 ኤንቲ ጌሻታ ሱነ ናበታ ሱ ጉስዳ ግሾ፥ ኤንቲ ሱ ኡያና መላ ኦዳሳ። ኤንቲ ባንታዉ በሲያባ ኤክዶሶና” ያግስ። 7 ያርሾ በሳፈ፥ “ጎዳዉ፥ ኡባፈ ዎልቃማ ፆሳዉ፥ ነ ፕርዳይ ቱማነ ፅሎ” ግያ ቃላ ስአስ። 8 ኦይዳን ኪታንቾይ ባ ፁአን ደኤይሳ አዋ ቦላ ጉስን፥ አዋይ ባ ሴላን አሳ ፁጋና መላ አዋስ ዎልቅ እመትስ። 9 አሳይ ዎልቃማ ሴላን ፁገትድ፥ ሄ ቦሻታ ቦላ ማት ደእያ ፆሳ ሱን ባድዶሶና፤ ባንታ ናጋራፐ ስሚድ ፆሳ ቦንችቦኮና። 10 እቻሻን ኪታንቾይ ባ ፁአን ደኤይሳ ዶኣ አራታ ቦላ ጉስን፥ ሄ ዶኣ ካዎተይ ምስ። አሳይ ኡንኣ ግሾ፥ ባንታ እንፃርሳ ሳፆሶና። 11 ቃስ አሳይ ኡንኣ ግሾነ ማዱን ግሾ፥ ሳሎ ፆሳ ባድዶሶና፤ ባንታ ኦዳ ናጋራፐ ስምቦኮና። 12 ኡሱፑን ኪታንቾይ ባ ፁአን ደኤይሳ ግታ ኤፍራፂሳ ሻፋን ጉስን፥ ዶሎሀ ባጋፈ ያና ካዎታስ ኦገይ ጊጋና መላ ሃይ መልስ። 13 ሄሳፈ ጉየ፥ ሾ ዳንያ ሄ ቱና አያናት ዳውያ ዶናፐ፥ ዶኣ ዶናፐነ ዎርዶ ናብያ ዶናፐ ከይሽን በአስ። 14 ኤንቲ ማላታታ ኦያ ቱና አያናታ። ሄ ሄ ቱና አያናት ኡባፈ ዎልቃማ ፆሳ ግታ ጋላሳን ሀናናዉ ደእያ ኦላስ ሺሻናዉ አላመ ካዎታ ኡባኮ ባና። 15 “ሄኮ፥ ታ ካይሶዳ ያና! አሳ ስንን ካሎቶናዳነ ዬላቶናዳ ባርክድ፥ ባ ማኡዋ ናግያ ኡራይ አንጀትዳይሳ!” ያግስ። 16 ሄ ቱና አያናት ካዎታ እብራወ ዶናን አርማገዶነ ጌተትያ በሳን ሺሽዶሶና። 17 ላፑን ኪታንቾይ ባ ፁአን ደኤይሳ ጫርኮ ቦላ ጉስን፥ ፆሳ ኬን ደእያ አራታፐ፥ “ፖለትስ” ግያ ዎልቃማ ቃላይ ይስ። 18 ሄሳፈ ዎልአን ዎልአምስ፤ ዳዳይ ቅስ፥ ቢታይ ቃፅስ። አስ ሳአን መቶሳፐ ቢት ሄሳ መላ ቃፆ ቃፅቤና። ሄስ ኡባፈ አዳ ቃፆ። 19 ግታ ካታማይ ሄ ከይድ ሻከትስ፤ ቢታ ኡባን ደእያ ካታማት ይዶሶና። ፆሳይ ግታ ካታማ ባብሎነ ቆፕድ፥ ባ ኢታ ሀንቆ ዎይነ ኡሻይ ኩምዳ ፁኣ እዉ እሚስ። 20 ዩሾይ አባን ተቀትዳ ቢታት ይዶሶና፤ ደረትካ በንትቦኮና። 21 አሳ ቦላ ኦይታማነ እቻሹ ክሎ ግራመ መላ ዴፅያ ዎልቃማ ሻች ሳሎፐ ቡክስ። ቦሻይ ዳሮ ኢታ ግድያ ግሾ አሳይ ሻቻ ቦሻ ግሾ ፆሳ ባድዶሶና። |
The Word for the World International and The Word for the World Ethiopia