ዮሃኒሳ ቆንጬ 13 - ጌሻ ማፃፋ

ናምኡ ዶአታ

¹ ሄሳፈ ጉየ፥ እስ ዶአይ አባፈ ከይሽን በአስ። እያዉ ታሙ ካጨይነ ላፑን ሁጰይ ደኤስ። ሄ ታሙ ካጨታ ቦላ ታሙ ካላቻት ደኦሶና። ሄ ሁጰታ ቦላ ፆሳ ጫሻ ሱንት ፃፈትድ ኡትስ።

² ታ በእዳ ዶአይ ማሄ ዳኔስ፤ እያ ቶሆይ ባባን ቶሆ መላ፤ እያ ዶናይካ ጋሞ ዶና ዳኔስ። ዳወይ ባ ዎልቃ፥ ባ አራታነ ባ ግታ ማታ ሄ ዶኣስ እሚስ።

³ ሄ ዶኣ ሁጵያፐ እሱዋ ቦላ ሀይቆስ ጋያ ማዱን በአስ፥ ሽን ሄ ማዱንይ ፓፅስ። አላምያ አሳ ኡባይ ማላለትድ ሄ ዶኣ ካልስ።

⁴ ዳወይ ባ ማታ ዶኣስ እምዳ ግሾ አሳ ኡባይ ዳውያ ጎይንዶሶና። ቃስ አሳይ፥ “ዶኣ መል ኦኔ? እያራ ኦለታናዉ ዳንዳኤይ ኦኔ?” ያግድ ዶኣስ ጎይንዶሶና።

⁵ ሄ ዶኣስ ኦቶርታና መላነ ጫያና መላ ዶን እመትስ፤ ኦይታማነ ናምኡ አጌና ሃራና መላ ማት እያዉ እመትስ።

⁶ ሄ ዶአይ ፆሳ፥ እያ ሱን፥ እ ደእያ በሳነ ሳሎን ደእያ ኡባ ባደ ኦይክስ።

⁷ ሄ ዶአይ ጌሻታራ ኦለትድ፥ ኤንታና ፆናና መላ ዎልቅ እያዉ እመትስ። ያራ ኡባ፥ ደረ ኡባ፥ ዱማ ዱማ ዶና ኡባ ቦላነ ኮቸ ኡባ ቦላ ማት እያዉ እመትስ።

⁸ አላመይ መቶሳፐ ዶምድ፥ ሹከትዳ ዶርሳ ደኦ ማፃፋን ኤንታ ሱንይ ፃፈቶና ሀ ሳአን ደእያ አሳ ኡባይ ሄ ዶኣስ ጎይናና።

⁹ ስእያ ሀይ ደእያ አስ ስኦ።

¹⁰ ኦንካ ድኤታናዉ ደኤይ ድኤቴስ። ማሻን ሀይቃናዉ ደኤይ ማሻን ሹከታና። ሄሳንካ ጌሻታ ዳንዳአይነ አማኖይ ኤረታና።

¹¹ ቃስካ፥ ሀራ ዶእ ሳአፐ ከይሽን በአስ። እያዉ ዶርሳ ካጨ ዳንያ ናምኡ ካጨይ ደኤስ፤ እያ ኦዳይ ዳወ ኦዳ መላ።

¹² ሄ ዶአይ ኮይሮ ዶኣ በሳን፥ እያ ማታን ኦስ። እካ ሀይቆስ ጋያ ማዱንፈ ፓፅዳ ኮይሮ ዶኣስ፤ ቢታን ደእያ አሳ ኡባይ ጎይናና መላ ኦስ።

¹³ ሄ ናምአን ዶአይ ሀር አቶሽን፥ ታማ ሳሎፐ አሳ ኡባ ስንን ዎሳና ጋካናዉ ግታ ማላታታ ኦስ።

¹⁴ ኮይሮ ዶኣ በሳን ኦና መላ፥ እያዉ እመትዳ ማላታታን ሳአን ደእያ አሳ ኡባ እ ባለስ። ማሻን ማዱንፅድ ፓፅዳ ዶኣ ቦንቾስ ምስለ ጊግሳና መላ ኤንታና ኪትስ።

¹⁵ ናምአን ዶአይ ኮይሮ ዶኣ ምስልያስ ሸምፖ እምድ ኦደታና መላነ እያዉ ጎይኖናይሳት ሀይቃና መላ ኦያ ማት እመትስ።

¹⁶ ሄ ናምአን ዶአይ ግትነ ጉ፥ ማንቆይነ ዱረይ፥ ዎማኖይነ አይለይ ባ ኡሻቻ ኩሸን ዎይኮ ባ ሶምኦን ማላ ዎና መላ ኦስ።

¹⁷ ሄ ዶኣ ሱንይ ዎይኮ እያ ሱን ፓይዱዋ ማላይ ባይና አስ ኦንካ ባይዛናዉነ ሻማናዉ ዳንዳኤና።

¹⁸ ጭንጫተ ኮሸይ ሄሳና። ኤራተ ደእያ ኦንካ ሄ ዶኣ ፓይዱዋ ብርሸ ኤሮ፤ ሄ ፓይዶይ አሳ ሱን። ሄ ፓይዶይ ኡሱፑን ፄታነ ኡሱፑን ታማነ ኡሱፑና።