ዮሃኒሳ ቆንጬ 12 - ጌሻ ማፃፋ

ማጫስዉነ ዳውያ

¹ ሄሳፈ ጉየ፥ ሳሎን ዎልቃማ ማላት በንትስ። አዋ ማአዳ፥ አጌና ቦላ ኤቃዳ፥ ታማነ ናምኡ ፆልንቶ ካላቻ ባ ሁጰን ዎዳ ደእያ፥ እስ ማጫስያ በንታሱ።

² ሄ ማጫስያ ቃን፤ ሽን እዮ እቀ ኦይክን ኡንኤታዳ ዋሳሱ።

³ ቃስ ሀራ ማላት ሳሎን በንትስ። ላፑን ሁጰትነ ታሙ ካጨት ደእያ ግታ ዞኦ ዳወይ በንትስ። እ ባ ሁጰታ ቦላ ላፑን ካላቻ ዎስ።

⁴ ሄ ዳወይ ባ ጎይናን ፆልንቶታፐ ስኩዋ ሳሎፐ ዳፍድ ሳአን የግስ። ሄ ዳወይ ናአይ የለት ዎዳ መላ ምታናዉ ኮይድ፥ የላናዉ ኤቀትያ ማጫሰ ስንን ኤቅስ።

⁵ ሄ ማጫስያ ካዎተ ኡባ ብራታ ፃምአን ሃራናዉ ደእያ አደ ናአ የላሱ። ናአይ ፆሳኮነ እያ አራታኮ ፑደ ኤከትስ።

⁶ ማጫስያ 1,260 ጋላስ ጋካናዉ እዮ ናጋና መላ ፆሳይ እዉ ጊግስ ዎዳ በሳ መላ ቢታ ባቃታሱ።

⁷ ሳሎን ኦል መትስ። ምካኤል ባ ኪታንቾታራ ዳውያራ ኦለትስ፤ ዳወይ ባ ኪታንቾታራ ግድድ ዛር ኦለትስ።

⁸ ሽን ዳወይ ፆነትድ ሳሎን ኤንታዉ ደእያ በሲ ይዶሶና።

⁹ ግታ ዳወይ፥ በን ሾሻይ፥ ሳአን የገትስ። እካ ዳቡሎሳ ዎይኮ ፃላሄ ጌተትያ አላምያ ባለይሳ። እ ባ ኪታንቾታራ እስፈ ዱገ አላምያ የገትስ።

¹⁰ ሄሳፈ ጉየ፥ ሳሎን ሀይሳዳ ግያ ቃላ ስአስ። “ሀእ አቶተይ፥ ዎልቃይነ ካዎተይ፥ ኑ ፆሳሳ፤ ማታይ ክርስቶሳስ ግድስ። ህዛ፥ ቃማነ ጋላስ ፆሳ ስንን፥ ኑ እሻታ ሞተይስ ሳሎፐ ዱገ ሆለትስ።

¹¹ ኤንቲ ዶርሳ ሱንነ ባንታ ማርካተ ቃላን፥ እያ ኦልድ ፆንዶሶና። ኤንቲ ባንታ ሸምፑዋስ ምሸቶና ባንታና ሀይቆስ አድ እምዶሶና።

¹² ሄሳ ግሾ፥ ሳሎንነ እያ ግዶን ደኤይሳቶ ኡፋይትተ። ሽን ቢታነ አባ አየ! ህዛ፥ ፃላሄይ ባዉ ጉ ዎደይ አትዳይሳ ኤርዳ ግሾ፥ ዎልቃማ ሀንቆን ህንተኮ ዎስ” ያግስ።

¹³ ቃስ ዳወይ ባና ሳአ የግዳይሳ በእዳ ዎደ አደ ናአ የልዳ ማጫስዉ ጎድስ።

¹⁴ ማጫስዉ ሾሻይ ቆሆና መላ ሄ ላይነ ባጋ ማሸነ ኡያሸ እያ ናገትያ በሲ መላ ቢታ ፕራዳ ባና መላ ናምኡ ዎልቃማ አርጋን ቀፈይ እዉ እመትስ።

¹⁵ ያትድ፥ ማጫስዉ ድኦይ ድእድ ኤፋና መላ ዳወይ ሻፋ ሃ መላ ባ ዶናፐ ማጫሰ ጉየራ ጮይስ።

¹⁶ ሽን ቢታይ ማጫስዉ ማድስ፤ ቢታይ ባ ዶና ዶይድ ዳውያ ዶናፐ ከይዳ ሃ ምትስ።

¹⁷ ሄ ዳወይ ማጫሰ ቦላ ዳሮ ሀንቀትድ፥ እ ኮቻታ፥ ፆሳ ኪታ ናገይሳታነ የሱሲ ቆንጭስዳ ቱማስ አማነትዳይሳታ ኦላናዉ ብድ።

¹⁸ አባ ጋፃን ደእያ ሻፍያን ኤቅስ።