ዮሃኒሳ ቆንጬ 11 - ጌሻ ማፃፋ

ናምኡ ማርካታ

¹ ሄሳፈ ጉየ፥ ታዉ ዋ ፃምአ እምድ፥ “ባዳ ፆሳ ኬነ ያርሾ በሳ ዋ፤ ያን ጎይንያ አሳታካ ፓይዳ።

² ሽን ፆሳ ኬ ካረ ዳባባይ አይሁደ ግዶና አሳስ እመትዳ ግሾ ዋና አጋጋ። አይሁደ ግዶና አሳይ ጌሻ ካታማ ኦይታማነ ናምኡ አጌና ሃራና።

³ ታኒ ካዮ ማኦ ማእዳ ታ ናምኡ ማርካታ ኪታና፤ ኤንቲ 1,260 ጋላስ ትንብተ ኦዳና” ያግስ።

⁴ ሄ ናምኡ ማርካት አላምያ ጎዳ ስንን ኤቅያ ናምኡ ሻማሆ ምታነ ናምኡ ፆምፐ ዎያ ኮጫታ።

⁵ ኦንካ ኤንታ ቆሀናዉ ኮይኮ ኤንታ ዶናፐ ታም ከይድ፥ ኤንታ ሞርከታ ይሴስ። ኤንታ ቆሀናዉ ኮይያ ኦንካ ሄሳዳ ሀይቃና።

⁶ ኤንቲ ትንብተ ኦድያ ዎደ እር ቡኮና መላ ሳሉዋ ጎርዳናዉ ኤንታዉ ማት ደኤስ። ኤንታዉ ሃ ሱ ከሳናዉ፥ ቃስ ኤንቲ ኮይዳ መላ ቢታ ዱማ ዱማ ጋዶን ይሳናዉ ኤንታዉ ማት ደኤስ።

⁷ ኤንቲ ባንታ ማርካተ ኦንግዳፐ ጉየ፥ ኦላፈ ከይያ ዶአይ ኤንታና ኦላና። ሄ ዶአይ ኤንታ ፆናና፤ ዎና።

⁸ ኤንታ ጎዳይ ማስቃልያ ቦላ ካቀትዳ ግታ ካታማ ኦግያ ቦላ ኤንታ አሀይ የገታና። ሄ ካታማይ ሌምሶን ሶዶመ ዎይኮ ግብፀ ጌተትድ ፄገቴስ።

⁹ ቃስ ኮቸ ኡባፈ፥ ያራ ኡባፈ፥ ዱማ ዱማ ዶናፐነ ካዎተ ኡባፈ ይዳ አሳይ ኤንታ አሀ ሄ ጋላስነ ባጋ ጋካናዉ በአና። ኤንታ አሀይ ሞገቶና መላ አሳይ ድጋና።

¹⁰ ሀ ናምኡ ናበት ሳአን ደእያ አሳ ዋይስዳ ግሾ አሳይ ኤንታ ሀይቁዋን ኡፋይታና። ባንታ ኡፋይሳ በሳናዉ እሶይ እሱዋስ እሞታ እማና።

¹¹ ሄ ጋላስነ ባጋፈ ጉየ፥ ደኦ አያናይ ፆሳ ማታፐ ይድ ኤንታን ገልን፥ ኤንቲ ደንድ ኤቅዶሶና። ኤንታ በእዳ ኡባይ ግታ ያሽ ያይዶሶና።

¹² ሄሳፈ ጉየ፥ ሄ ናምኡ ናበት፥ “ሃ ፑደ ከይተ” ግያ ቃላ ሳሎፐ ስእዶሶና። ኤንታ ሞርከት ኤንታና በእሽን፥ ኤንቲ ሻራን ገልድ ፑደ ሳሎ ብዶሶና።

¹³ ሄ ሳትያን ቢታይ ዎልቃማ ቃፆ ቃፅን፥ ካታማፐ ታማን ኩሸይ ይስ። ቃስ ቢታ ቃፆን ላፑን ሙኩሉ አሳይ ሀይቅስ። አትዳ አሳይ ዳሮ ኮኮርድ ባብድ፤ ሳሎ ፆሳስ ቦንቾ እምዶሶና።

¹⁴ ናምአን አየይ አስ፥ ሽን ሄኮ ሄን አየይ ኤሶን ያና።

ላፑን ሞይዘ

¹⁵ ላፑን ኪታንቾይ ባ ሞይዝያ ፑንስ። ሳሎፐ፥ “ሳኣ ካዎተይ ኑ ጎዳስነ ክርስቶሳስ ግድስ፤ እ መርናፐ መርና ጋካናዉ ሃራና” ግያ ዎልቃማ ቃላይ ስኤትስ።

¹⁶ ያትን፥ ፆሳ ስንን፥ ባንታ አራታን ኡትዳ ላታማነ ኦይዱ ጭማት ጉፋንድ፥ ፆሳስ ጎይንድ፥

¹⁷ “ሀእካ ካሰካ ደኤይሶ፥ ጎዳዉ፥ ኡባፈ ዎልቃማ ፆሳዉ፥ ኔኒ ግታ ዎልቃ ኦይካዳሳ። ኔኒ ሃራናዉ ዶምዳ ግሾ፥ ኑኒ ነና ጋላቶስ።

¹⁸ አይሁደ ግዶና አሳይ ሀንቀትዶሶና፥ ሽን ነ ሀንቆይ ይስ። ሀይቅዳይሳታ ቦላ ነ ፕርድያ ዎደይ ጋክስ፤ ኔኒ ነ አይለታ፥ ናበታስ ጌሻታስነ ነ ሱንስ ያየይሳታስ፥ ጉታስነ ግታታስ፥ ኤንታ ኦሱዋዳ እምያ ዎደይ ጋክስ። አላምያ ይሰይሳታ ይስያ ዎደይ ይስ” ያግዶሶና።

¹⁹ ሳሎን ደእያ ፆሳ ኬይ ዶየትስ፤ እያ ግዶን ፆሳ ጫቆ ታቦተይ በንትስ። ቃስ ዎልአን ዎልአምስ፥ ደሾይ ደችስ፤ ዳዳይ ቅስ፤ ቢት ቃፅስ፤ ሻች ቡክስ።