ዮሃኒሳ ቆንጬ 10 - ጌሻ ማፃፋ

ኪታንቾነ ጉ ማፃፋ

¹ ሄሳፈ ጉየ፥ ታ ሀራ ዎልቃማ ኪታንቾይ ሳሎፐ ሳአ ዎሽን በአስ። እ ሻራ ማእስ፤ እያ ሁጵያ ቦላ ዙል ደኤስ። እያ ሶምኦይ አዋ መላ፤ እያ ቶሆይ ታማ ቱሳ መላ።

² ሄ ኪታንቾይ ዶያ ደእያ እስ ጉ ፃ ማፃፋ ባ ኩሸን ኦይክድ፥ ባ ኡሻቻ ቶሁዋ አባ ቦላ፥ ባ ሀድርሳ ቶሁዋ ቢታ ቦላ ኤስስ።

³ ጉድያ ጋሞዳ ባ ቃላ ቁ ኦድ ዋስስ። እ ዋስዳ ዎደ ላፑን ዳዳት ባንታ ጉን ስስዶሶና።

⁴ ላፑን ዳዳት ኦደትዳ ዎደ ታ ፃፋናዉ ጊገታስ። ሽን ሳሎፐ፥ “ላፑን ዳዳት ኦድዳይሳ ማታመን ጎርዳፈ አትሽን፥ ፃፎፓ” ግያ ግርሳ ስአስ።

⁵ ያትድ፥ አባ ቦላነ ቢታ ቦላ ኤቅዳ፥ ታ በእዳ ኪታንቾይ፥ ባ ኡሻቻ ኩሽያ ሳሎ ፑደ ምጭስ።

⁶ እ ምጭድ ሳሎንነ እያ ግዶን ደእያ ኡባ፥ ሳአንነ እያ ግዶን ደእያ ኡባ፥ አባነ እያ ግዶን ደእያ ኡባ መዳ፥ መርናዉ ደእያ ፆሳ ሱንን ጫቅድ፥ “ህዛፐ ጉየ፥ ፆሳይ ጋምኤና።

⁷ ሽን ላፑን ኪታንቾይ ባ ሞይዝያ ፑንያ ዎደ ፆሳይ ባ አይለ ግድዳ ናበታ ባጋራ ቆንጭስዳ ፁራ ቆፋይ ፖለታና” ያግስ።

⁸ ሄሳፈ ጉየ፥ አባ ቦላነ ቢታ ቦላ ኤቅድ፥ “እያ ኩሸን ዶየትድ ደእያ ፃ ማፃፋ ኪታንቹዋ ኩሸፐ ኤካ” ያግድ ናምአን ታዉ ኦድሽን ስአስ።

⁹ ታኒ ሄ ኪታንቹዋኮ ባዳ፥ ጉ ፃ ማፃፋ እማ ጋዳ ኦይቻስ። እ ታኮ፥ “ኤካዳ ማ፤ እ ነ ኡሎን ጫማና፥ ሽን ነ ዶናን ኤሳዳ ማልአና” ያግስ።

¹⁰ ታኒ ኪታንቹዋ ኩሸፐ ሄ ጉ ፃ ማፃፋ ኤካዳ ማስ፤ ታ ዶናን ኤሳዳ ማልእስ፥ ሽን ታ ኡሎን ጫምስ።

¹¹ ሄሳፈ ጉየ፥ ታኮ፥ “ኔኒ ያራ ኡባስ፥ ደረ ኡባስ፥ ዱማ ዱማ ዶናን ኦደተይሳታስነ ካዎታስ ትንብተ ዛራ ኦዳናዉ በሴስ” ያግስ።