ዮሃኒሳ ቆንጬ 1 - ጌሻ ማፃፋ

¹ ኤሶን ሀናናዉ ደእያባ ባ አይለታ በሳና መላ ፆሳይ እያዉ እምዳ የሱስ ክርስቶሳ ቆንጨይ ሀይሳ። የሱሲ ባ ኪታንቹዋ ኪትድ፥ ባ አይልያ ዮሃንሳስ ቆንጭስስ።

² ዮሃንስ ፆሳ ኪታ፥ የሱስ ክርስቶሲ ኦዳባነ ኦድዳባ ኡባ ማርካትስ።

³ ሀ ኡባይ ሀናናዉ ዎደይ ማትዳ ግሾ፥ ሀ ትንብተ ቃላ ናባብያ ኦንካ አንጀትዳይሳ፤ ቃስ ሀ ቃላ ስኤይሳትነ ፃፈትዳ ኪታ ናግያ ኡባይ አንጀትዳይሳታ።

ዎሳ ኬታስ ኪተትዳ ሳሮ

^4-5 ሀ ዳብዳበይ፥ ዮሃንሳፐ፥ ኢሰ ቢታን ደእያ ላፑን ዎሳ ኬታስ ፃፈትስ። ካሰካ፥ ሀእካ ደእያ፥ ስንፈካ ያናዉ ደእያ ፆሳፈ፥ ቃስ እያ አራታ ስንን ደእያ ላፑን አያናታፐ፥ ሄሳዳካ፥ ሀይቆፐ ደንዶን ኮይሮ ግድዳይሳፈ፥ ሳኣ ካዎታ ሃርያ አማነትያ ማርካ ግድዳ የሱስ ክርስቶሳፐ፥ አ ኬሀተይነ ሳሮተይ ህንተዉ ግዶ። የሱሲ ኑና ሲቄስ፥ ቃስ ባ ሱን ናጋራ አይለተፈ ኑና ላአ ከስስ።

⁶ ኑኒ ፆሳ እያ አዋስ ኦና መላ ኑና ካዎተ ካህነ ኦስ። እያዉ መርናፐ መርና ጋካናዉ ቦንቾይነ ዎልቃይ ግዶ። አምንእ።

⁷ ሄኮ፥ የሱሲ ሻራራ ዬስ። አሳ ኡባይ ሀር አቶሽን፥ እያ ጫድዳ አሳይካ እያ በአና። ሳአን ደእያ አሳ ኡባይ እያ ግሾ ዬካና። ሄስ ቱማ ሀናና! አምንእ።

⁸ “ካሰካ፥ ሀእካ ደኤይስ፥ ስንፈካ ያና ጎዳይ፥ ኡባፈ ዎልቃማ ፆሳይ፥ አልፋነ ኦመግ ታና” ያጌስ ጎዳ ፆሳይ።

ጎዳ ቆንጨ

⁹ ታኒ፥ ዮሃንስ፥ ህንተ እሻይ፥ ህንተራ እስፈ የሱሳን ዋይያ፥ እያ ካዎተነ እያ ዳንዳኣ በአስ። ታኒ ፆሳ ቃላ ግሾነ የሱሳባ ማርካትዳ ግሾ፥ ዩሾይ አባን ተቀትዳ ቢታን፥ ፓፅሞን ደአይስ።

¹⁰ ጎዳ ጋላሳን ታ ጌሻ አያናን ሃረታዳ ደአይስ፤ ታፐ ጉየራ ሞይዘ ፑኖ መላ ግታ ግርስ ስአስ።

¹¹ ሄ ግርሳይ ታና፥ “ነ በኤይሳ ማፃፋን ፃፋዳ፥ ኢሰን ደእያ ላፑን ዎሳ ኬታስ:- ኤፈሶና፥ ሳምርኔሳ፥ ጳርጋሞና፥ ትያትሮና፥ ሳርዴሳ፥ ፍላደልፍያነ ሎዶቀ የዳ” ያግስ።

¹² ታኒ ታዉ ኦድያ ግርሳ በአናዉ ጉየ ስማዳ ፆምፐ ዎያ ላፑን ዎርቃ ኮጫታ በአስ።

¹³ ሄ ኮጫታ ግዶን አሳ ናአ ዳነይሳ በአስ። እ አዱሳ አፍላ ባ ቶሁዋ ጋ ማእስ፥ ዎርቃ ዳንጮን ባ ትራ ዳንጭስ።

¹⁴ እያ ሁጰይነ እያ ብናናይ ቦ ዶርሳ እክሰ መላ ዎይኮ ሻቻ መላ ቦ፤ እያ አይፈይ ታማ ላጮ ዳኔስ።

¹⁵ እያ ቶሆይ ታማን ሴርድ ዞእዳ ናሰ ብራታ ዳኔስ፤ እያ ግርሳይካ ግታ ሻፋ ኮሽንቻ መላ።

¹⁶ እ ባ ኡሻቻ ኩሸን ላፑን ፆልንቶታ ኦይክስ። እያ ዶናፐ ናምኡ ባጋራ ቃራትዳ ማሻይ ከዬስ። እያ ሶምኦይ ሴታ ጋላሳ አዋ አይፈ ዳኔስ።

¹⁷ ታኒ እያ በእዳ ዎደ ሀይቅዳ አሳዳ ሀናዳ እያ ቶሁዋ ማታን ኩንዳስ። እ ባ ኡሻቻ ኩሽያ ታ ቦላ ዎድ፥ “ያዮፋ፤ ኮይሮይነ ዉርሰይ ታና።

¹⁸ ታኒ ደኦን ደአይስ፤ ታኒ ሀይቃስ፥ ሽን ሄኮ መር መርናዉካ ደኦን ደአይስ። ሀይቆነ ስኦለ ቁልፐይ ታ ኩሸና።

¹⁹ ህዛ፥ ሀእ ሀንያባነ ስንፈ ሀናናባ ነ በእዳባ ፃፋ።

²⁰ ኔኒ ታ ኡሻቻ ኩሸን በእዳ ላፑን ፆልንቶታነ ላፑን ዎርቃ ኮጫታ ብርሸይ ሀይሳ፦ ላፑን ፆልንቶት ላፑን ዎሳ ኬታ ኪታንቾታ፤ ላፑን ዎርቃ ኮጫት ላፑን ዎሳ ኬታ።”