Nahime 5 - ጌሻ ማፃፋ

ናህመይ ማንቆታ ማድስ

¹ እስ ዎደ አደትነ ኤንታ ማቸት ባንታ ኮቸ ግድዳ አይሁደታ ቦላ ዋስዶሶና።

² ኤንታፈ እሶት እሶት፥ “ኑስ፥ ዳሮ አደ ናይትነ ማጫ ናይት ደእያ ግሾ ኑ ሸምፑዋ አሻናዉ ኑስ ካ ኮሼስ” ያግዶሶና።

³ ሀራት ቃስ፥ “ኑና ጋክዳ ኢታ ኮሻፐ ደንዶይሳን ካ ደማና ግድ፥ ኑ ጎሻ ጋድያ፥ ኑ ዎይነ ጋድያነ ኑ ኬ ኦይዳ” ያግዶሶና።

⁴ ቃስ አትዳይሳት፥ “ካዎ ጊራ ጊራናዉ ሚሸ ይድ ኑ ጎሻ ጋድያነ ኑ ዎይነ በሳ ኦይድ ሚሸ ታልእዳ።

⁵ አይሁደ ኮቻታራ ኑኒ እስ አሾነ እስ ሱ፤ ኑ ናይት ኤንታ ናይታ መላ። ሽን ኑኒ ኑ የልዳ ናይታ አይለተስ አድ እማናዉ ኡንኤትዳ፤ ኑ ማጫ ናይታፐ እሶት እሶት አይለተስ ባይዘትዶሶና። ኑ ጎሻነ ኑ ዎይነ ጋድያ ኑፐ ኤከትዳ ግሾ ኑ ዎልቃ ይዳ” ያግዶሶና።

⁶ ታኒ ኤንታ ዋሱዋነ ኦይሻ ስእዳ ዎደ ዳሮ ይሎታስ።

⁷ ታ ዎዛናን ኦናባ ቆፕዳፐ ጉየ፥ ካለይሳታነ ሀላቃታ ፄጋዳ፥ “ህንተ፥ ህንተ እሻታስ የሎራ ታልእሸ ኡንኤታ” ያጋዳ ኤንታ ካጫስ። ሄ መቱዋባ ኤንታራ ኦደታናዉ ደርያ ሺሻዳ፥

⁸ “አይሁደ ግዶናይሳታስ ባይዘትዳ አይሁደ ኮቸ ግድዳ ኑ እሻታ ዎዛናዉ ኑስ ዳንዳኤትዳባ ኡባ ኦዳ። ሽን ህንተ እሻ ግድዳ አይሁደት ባንታ ኮቸ ግድዳ ህንተዉ፥ ባንታና ባይዛና መላ ኦታ፤ ኑ ኤንታ ዛር ዎዛናዉ ኮሼስ” ያጋስ። ካለይሳት ዛራናባ ይድ ስእ ግዶሶና።

⁹ ታኒ ካላዳ፥ “ህንተ ኦያባይ ዎጋ ግደና፤ አይሁደ ግዶና ኑ ሞርከት ኑና ቀልቅሶና መላ ህንተ ኑ ፆሳስ ያያናዉነ ሱረባ ኦናዉ በሰኔ?

¹⁰ ታኒ፥ ታ እሻትነ ታ ኦሳንቾት አሳስ ሚሸነ ካ ታልእዳ፤ ግዶሽን፥ ኤንታፈ የሎ ኤከይስ አቶ።

¹¹ ኤንታ ጎሻ፥ ዎይነነ ሻማሆ ዛይተ ጋድያነ ኬ ኡባ ኤንታዉ ዛርተ። ቃስ ሚሸፐ፥ ካፈ፥ ዎይነፐነ ዛይተፐ ህንተ ኤንታፈ ኤክዳ ፄታፐ እስ ኩሸ የሎ ኤክዳይሳ ኤለ ዛርተ” ያጋስ።

¹² ኤንቲ ዛሪድ፥ “ኑኒ ኤክዳባ ኡባ ኤንታዉ ጉየ ዛራና፤ ኤንቲ ኑፐ ታልእዳይሳ ዛሮ ግድ አቾኮ፤ ነ ኑና ኪትዳይሳዳ ኦና” ያግዶሶና። ታኒ ካህነታ ታኮ ፄጋዳ ካለይሳት ባንታ ግዳ ቃላ ፖላና መላ ጫቅሳናዳ ኦስ።

¹³ ታኒ ታ ማኡዋ ቃራዳ ቆቆፋሸ፥ “ህንተፈ ኦንካ ባ ግዳ ቃላ ፖሎና እፅኮ፥ ፆሳይ እያ፥ እያ ኬፈነ እያ አቁዋፐ ሀይሳዳ ቆቆፍድ መላ ኩሸ አሾ” ያጋስ። ሺቅዳ አሳ ኡባይ እስ ቃላን፥ “አምንእ” ያግድ ጎዳ ጋላትዶሶና። አሳ ኡባይ ጫቅዳይሳዳ ኦዶሶና።

¹⁴ አርፀክስስ ካዎትዳ ላታማን ላይፈ ዶምድ ሀስታማነ ናምአን ላይ ጋካናዉ ታኒ ይሁዳ ቢታ ሃራስ። ሄ ታማነ ናምኡ ላይ ግዶን ታና ግድን ዎይኮ ታ እሻት ሹማስ በሲያ ካ ዳሞዘ ኤክቦኮ።

¹⁵ ሽን ታፐ ካሰ ሹመትዳይሳት አሳስ ዴፆ ቶሆ ግድድ፥ ጋላስ ጋላስ ካስነ ዎይነ ኡሻስ ኦይታሙ ብራ ቃንፅስዶሶና። ሀር አቶሽን ሹማታ አይለት አሳ ቦላ ጎዳ ግድድ ኡንኤድ ጋምእዶሶና። ሽን ታኒ ፆሳስ ያይዳ ግሾ፥ ሄሳዳ ኦብከ።

¹⁶ ታዉ ደእያ ዎልቃ ኡባ የሩሳላመ ግምበ ኦሱዋስ እማስ፤ ታ ኦሳንቾትካ ታራ እስፈ ሄ ኦሱዋ ቦላ ጋምእዶሶና፤ ኑ አይብ ቢታካ ሻምቦኮ።

¹⁷ ኑ ሄራን ደእያ ካዎተታፐ ይዳ አሳይ አትሽን፥ ጋላስ ጋላስ ታራ ምያ አይሁደትነ ካለይሳት ፄታነ እሻታማ።

¹⁸ ጋላስ ጋላስ እስ ቦር፥ ኡሱፑን ሞ ዶርሳታነ ዳሮ ኩቶታ ሹክድ አሳስ ሺሾሶና፤ ቃስ ታሙ ጋላሳፐ እስ ቶሆ ዳሮ ባ ዎይነ ኡሻ አጎሶና። ሽን አሳ ቦላ ደእያ ዴፆ ቶሁዋ ታ ኤርያ ግሾ ቢታ ሹማስ በሲያ ካ ዳሞዘ ኦይቻብከ።

¹⁹ ታ ፆሳዉ፥ ታ ሀ አሳስ ኦዳ ኬሀተ ኡባ ቆፓዳ ታዉ ኬሀ።