Nahime 2 - ጌሻ ማፃፋ

ናህመይ የሩሳላመ ቡሳ

¹ አርፀክስስ ካዎትዳ ላታማን ላይን፥ ንሳነ ጌተትያ አጌናን፥ እስ ጋላስ ካዋ ስንን ዎይነ ኡሻ ሺሻስ። ሄ ጋላሰፐ አትሽን፥ ካሰ ካዋ ስንን አዛና ኤርከ።

² ሄሳ ግሾ፥ ካዎይ፥ “ነና ሳክያባይ ባዋ፥ ሽን ሀይሳ መላ አይስ አዛናዲ? ሄስ ነ ዎዛናይ እስባን አዛንዳይሳ በሴስ” ያግስ። ያግን፥ ታኒ ዳሮ ያያዳ፥ ካዋኮ፥

³ “ካዎይ መርናዉ ካዎቶ! ታ ማይዛት ሞገትዳ ካታማይ ላለትድ ይን፥ ቃስ ሄ ካታማ ድርሳ ፐንገት ታማን ፁገትን አይስ አዛንክና?” ያጋስ።

⁴ ካዎይ ዛሪድ፥ “ያትን፥ ሀእ ታ ነዉ አይ ኦና መላ ኮያይ?” ያግስ። ታኒ ሳሎ ፆሳ ዎሳ ስማዳ፥

⁵ ካዋኮ፥ “ካዋዉ፥ ታ ነ ስንን ሳባ ደምዳባ ግድኮነ ታ ኦይሻይ ኡፋይስያባ ግድኮ፥ ይሁዳ ቢታ፥ ታ ማይዛት ሞገትዳ ካታማ ባዳ ዛራ ኬፃና መላ ታና የዳርክ” ያጋስ።

⁶ ሄ ዎደ ካውያ፥ ካዋ አርፀክስሳ ማታን ኡትዳ ደእሽን፥ ካዎይ ዛሪድ፥ “ነ ኦገይ አይ መላ ዎደ ኤካኔ? ነ አዉደ ስማኔ?” ያግድ ታና ኦይችስ። ታኒ ታ ስማና ዎድያ እያዉ ኦድን፥ ካዎይ ኡፋይትድ ታና የድስ።

⁷ ቃስ፥ “ካዋ፥ ነና ኡፋይስያባ ግድኮ፥ ታ ይሁዳ ጋካናዉ ሄ ቢታራ ካንዳ አና መላ ኤፍራፂሳ ሻፋፐ ዉሎሀ ባጋራ ደእያ ቢታ ሃረይሳታስ ዳብዳበይ ፃፈቶ” ያጋዳ ካዋ ዎሳስ።

⁸ ሄሳዳካ፥ “ፆሳ ኬ ፐንግያ ጊግሳናዉ፥ ካታማ ግምበ ድርሳ ድራናዉነ ታ ዳና ኬ ኬፃናዉ ታዉ ም እማና መላ ካዎ ዎራ ናግያ አሳፋስ ዳብዳበይ ፃፈቶ” ያጋዳ ኦይቻስ። ፆሳ ሎኦ ኩሸይ ታራ ደእያ ግሾ ካዎይ ታኒ ኦይችዳባ ኡባ እሚስ።

⁹ ካዎይ ታራ ጉ ቶራ ሞጮናታነ ፓራ ቶገይሳታ የድስ። ታኒ ኤንታራ እስፈ ኤፍራፂሳ ሻፋፐ ዉሎሀ ባጋ ቢታ ጋካዳ ካዎይ የድዳ ዳብዳብያ ሄ ቢታ ሃረይሳታስ እማስ።

¹⁰ ሽን ሆሮና ካታማ አስ ግድዳ ሳንባላፅነ አሞነ ቢታ ሀላቃ ግድዳ ፆበይ፥ “እስራኤለ አሳስ ሎኦባ ኦያ አስ ይስ” ጌተትዳይሳ ስእዳ ዎደ ዳሮ ይሎትዶሶና።

ናህመይ የሩሳላመ ግምበ ድርሳ በእስ

¹¹ ታኒ የሩሳላመ ጋካዳ ሄ ጋላስ ያን ጋምአስ።

¹² የሩሳላመስ ታኒ ኦና መላ ፆሳይ ታ ዎዛናን ዎዳ ቆፋ ኦደስካ ኦዳብከ። ሄሳፈ ጉየ፥ ታራ ደእያ አሳፐ ጉታ ኤካዳ ቃማ ደንዳዳ ባስ። ሄ ዎደ ታኒ ቶግዳ መህያፐ ሀራ ቶጋ መሄይ ኑስ ባዋ።

¹³ ታኒ ብላሄ ደንዳዳ ዛንጋራ ፐንግያራ ካንዳ፥ ዳወ ፑልቶ ጌተትያ በሳራ አዳ፥ ፕቶ ፐንገ ጌተትያ በሳ ጋካናዉ ባስ። ያራ አሸ ላለትዳ የሩሳላመ ግምብያነ ታማን ፁገትዳ ግምበ ፐንገታ በአስ።

¹⁴ ሄሳፈ ስማዳ ፑልቶ ፐንግያኮነ ካዋ ተቀ ሃይ ደእያ በሳ ባስ። ግዶሽን፥ ታ ቶግዳ መሄይ አያ ኦገ ደማብከ።

¹⁵ ሄሳ ግሾ፥ ቃማ ቀድሮና ዛንጋራ ግዶራ አዳ ግምብያ በአስ። ዉርሰን፥ ጉየ ስማዳ ዛንጋራ ፐንግያራ ካታማ ገላስ።

¹⁶ ያን ደእያ ሀላቃታፐ ኦንካ ታኒ አዉ ብዳኮ፥ ዎይኮ አይ ኦዳኮ ኤርቤና። አይስ ጊኮ፥ ታኒ አይሁደታስ፥ ካህነታስ፥ ቦንቸትዳ አሳታስ፥ ሀላቃታስነ ኦሱዋ ኦናዉ ደእያ አሳፐ ኦደስካ ታ ቆፋ ኦዳብከ።

¹⁷ ሄሰፈ ጉየ፥ ኤንታኮ፥ “ኑኒ አይ መላ መቶን ደእያኮ በኤታ፤ የሩሳላመ ካታማይ ላለትስ፤ ግምበ ፐንገት ታማን ፁገትዶሶና። ሀ ዪተ፥ የሩሳላመ ግምብያ ዛሪድ ግምቦስ፤ ኑና ጋክዳ ዬላ አነ ድጎስ” ያጋስ።

¹⁸ ቃስ ፆሳ ሎኦ ኩሸይ ታራ ደኤይሳነ ካዎይ ታዉ ኦድዳባ ኡባ ኤንታዉ ኦዳስ። ኤንቲ ዛሪድ፥ “አነ ደንዶስ፤ ዛሪድ ግምቦስ” ያግድ ባንታ ኩሽያ ሎኦ ኦሶስ ምንዶሶና።

¹⁹ ሽን ሆሮና ካታማ አስ ግድዳ ሳንባላፅ፥ አሞነ ቢታ አስ ግድዳ ፆበይነ አራባ ቢታ አስ ግድዳ ጌሳመይ ሄሳ ስእዳ ዎደ፥ ኑ ቦላ ቀልቅስድ ሚጭዶሶና። “ሀይስ ህንተ ኦያባይ አይቤ? ዎይኮ ካዋ ቦላ ማካላናዉ ኮዬቲ?” ያግድ ኦይችዶሶና።

²⁰ ታኒ ዛራዳ፥ “ሳሎ ፆሳይ ኑና ፖልሳና፤ ኑኒ እያ አይለት ደንድድ ኦና። ሽን የሩሳላመን ህንተዉ ግሾይ ዎይኮ ህንተና ጋያባይ ዎይኮ ህንተና ቆፍስያባይ ባዋ” ያጋስ።