Nahime 1 - ጌሻ ማፃፋ

ናህመ ዎሳ

¹ ሀካልያ ናኣ ናህመ ቃላይ ሀይሳ። አርፀክስስ ፋርሰ ቢታን ካዎትን ላታማን ላይን፥ ክስለ ጌተትያ አጌናን፥ ታኒ ናህመይ ዋና ካታማ ግድያ ሱሳን ደአይስ።

² ታ እሻታፐ እሶይ፥ ሀናን፥ ሀራ አሳታራ እስፈ ይሁዳፐ ታኮ ይን፥ ታኒ የሩሳላመባነ ባብሎነ ድኤቶና አትዳ አይሁደታባ ኤንታ ኦይቻስ።

³ ኤንቲ ዛሪድ፥ “ባብሎነ ድኤቶና አትዳ አሳይነ ድኤትድ ስምዳ አይሁደት ግታ መቶንነ ካዉሻን ደኦሶና። የሩሳላመ ግምበ ድርሳይ ላለትስ ቃስ ግምብያ ፐንገት ታማን ፁገትዶሶና” ያግዶሶና።

⁴ ታ ሀይሳ ኡባ ስእዳ ዎደ ኡታዳ ዬካስ። ዳሮ ጋላስ አዛኖንነ ፆማን ሳሎ ፆሳ ሀይሳዳ ያጋዳ ዎሳስ።

⁵ “አቤት ጎዳዉ፥ ሳሎ ፆሳዉ፥ ግታዉ፥ ቦንቸትዳይሶ፥ ነና ዶሰይሳታስነ ነ ኪታ ናገይሳታስ ነ መርና ሲቆ ጫቁዋ ናጋሳ።

⁶ ታኒ ነ አይለይ፥ ነ አይለ ግድዳ እስራኤለ አሳ ግሾ ቃማነ ጋላስ ዎስያ ዎሳ ስአናዉ ነ ሀይይ ሀይዞ፤ ነ አይፈይ ታና ፄሎ። ኑ እስራኤለ አሳይ ኦዳ ናጋራ ኡባ ነዉ ፓፃይስ፤ ቱማ ታንነ ታ ማይዛት ነና ናቅዳ።

⁷ ኑኒ ነ ቦላ ዳሮ ኢታ ናጋራ ኦዳ፤ ኔኒ ነ አይልያ ሙሰ ባጋራ ኑስ እምዳ ኪታ፥ ዎጋነ ህግያ ናግቦኮ።

⁸ ነ አይልያ ሙሰስ ነ ኦድዳ ቃላ ሀያና ቆፓ፤ ኔኒ፥ ‘ህንተ ታዉ አማነቶና እፅኮ፥ ታኒ ህንተና አይሁደ ግዶና ቢታታን ላላና።

⁹ ሽን ህንተ ታኮ ስሚድ፥ ታ ኪታ ናግኮ፥ ህንተ ሀር አቶሽን ሳኣ ጋፃ ጋካናዉ ላለትኮካ፥ ታ ሱንይ ፄገታና መላ ዶርዳ በሳ ዛራዳ ኤሀና’ ግዳይሳ ቆፓ።

¹⁰ “ኔኒ ነ ግታ ዎልቃንነ ነ ምኖ ቀስያን ዎዛ ኤክዳ ነ አይለታነ ነ አሳታ።

¹¹ አቤት ጎዳዉ፥ ታኒ ነ አይለይ ዎስያ ዎሳነ ነና ቦንቻናዉ ዶስያ፥ ነ አይለታ ዎሳ ነ ሀይይ ስኦ። ታ ነ አይለይ ሀች ኦናዉ ኮይዳባይ ታዉ ኡሻጫናዳ፥ ካዋ ስንን ታዉ ሳባ እማ” ያጋስ። ታኒ ሄ ዎደ ካዋስ ዎይነ ኡሻ ትግያ አስ።