Milalsa 1 - ጌሻ ማፃፋ

የሩሳላመ ዋየ

¹ ካሰ አስ ኩምዳ ካታምያ ሀእ ዋናዳ አስ ባይና በሲ ግዳዴ? ካሰ ካዎተታ ግዶን ግታ ግድዳራ ሀእ ዋናዳ አምኦ ግዳዴ? ካታማታ ግዶን ካዎ ግድዳራ ሀእ ዋናዳ አይለ ግዳዴ?

² ቃማ ይባታ ዬሆ ዬካሸ አቃዉሱ፤ አፉ እ አይፈ ካረራ ዱገ ዎስ። ካሰ እዮ ዶሰይሳታፐ ሀእ እዮ ምንያ እሶይካ ባዋ። እ ላገት እዮ አድ እምዶሶና፤ እዉ ሞርከ ግድዶሶና።

³ ይሁድ ናቀታዳ፤ አይለታዳ ድኤታሱ፤ ሀእ ካዎተታ ግዶን ደአዉሱ፤ ሽን ሸምፖ በሲ ደማቡኩ። እያ መቶታዳ ደእሽን፥ የደይሳት እዮ ደምዶሶና።

⁴ ላይ ባኣለ ቦንቻናዉ ያ አስ ባይና ግሾ፥ ፅዮነ ኦገት ዬኮሶና። እ ድርሳ ፐንገት ባይሳትዶሶና፤ እ ካህነት ኦሎሶና። ያን ደእያ ጌላኦ ናይት ኡንኤትዶሶና፤ እያካ ኡንኤታዳ ዬካዉሱ።

⁵ እ ሞርከት እዉ ጎዳ ግድዶሶና፤ ኤንታዉ እንጀትን ደእዶሶና። እ፥ ናጋራ ጋሶን ጎዳይ እዮ ኡንኤስ፤ እ ናይት ሞርከታን ድኤትድ ብዶሶና።

⁶ ፅዮን ቦንቾይ ኢፐ ቃረትስ፤ እ፥ ሀላቃትካ ምያ በሲ ይዳ ጋራዳ ሀንዶሶና፤ ኤንቲ ዎልቃ ይድ ባንታና የደይሳታ ስንፈ ባቃትዶሶና።

⁷ የሩሳላመይ ባ መቱዋነ ባ ኡንአ ጋላሳን፥ በን ባ ቦንቾ ሻሉዋ ሀሳያዉሱ። እ፥ አሳይ ሞርከታ ኩሸን አድ እመትዳ ዎደ፥ እዮ ማድያ እሶይካ በንትቤና። እ ሞርከት እዮ ፄልድ፥ እ ዩዋን ሚጭዶሶና።

⁸ የሩሳላመይ ግታ ናጋራ ኦዳ ግሾ ቱናሱ፤ እዮ ቦንችዳ ኡባይ እ ካሉዋ በእዳ ግሾ ካስ፤ እያ ኦላሸ ጉየ ስማሱ።

⁹ ቱናተ እ አፍላ ቦላ በንትስ፤ ስንፈ ባ ቦላ ያናባ ቆፓቡኩ። እ ኩንደይ ዳጋንያባ ግድስ፤ እዮ ምንያ ኦንካ ባዋ። እያ፥ “አቤት ጎዳዉ፥ ታ ኡንኤተ በአ! ታ ሞርከት ታና ፆንዶሶና” ያጋሱ።

¹⁰ ሞርከት እ ቦንቾ ሻሉዋ ቦንቅዶሶና፤ ካሰ ነ ማባራ ግዶ ገሎና መላ፥ ኔኒ ድግዳ አሳት፥ እ ኬ ገልሽን በአሱ።

¹¹ እ አሳት ኮሻትድ ካ ደማናዉ ኦሎሶና፤ ኤንቲ ደኦን ዳናዉ ባንታ ሻሉዋ ካን ላሞሶና። የሩሳላመይ ሀይሳዳ ያጋሱ፤ አቤት ጎዳዉ፥ ታና ፄላ፤ ታ ካዉሻተ በአ!

¹² ህንተኖ፥ ሀይሳራ አይሳቶ፥ ሀይስ ህንተዉ አይኮካ ዳነኔ? አነ በእተ፤ አኬክተ፤ ባ ኤፅያ ሀንቆ ጋላሳን፥ ፆሳይ ታ ቦላ ኤህዳ መቱዋ መላ መቶይ ደኢ?

¹³ ቦላፈ ታማ ዱገ የድስ፤ ሄ ታማይ ታ መቀ ግዶ ገልስ። ታ ቶሆይ ፅሄን ኦይከትስ፤ ታና ጉየ ዛርስ፤ ታና ጋላስ ኡባ ላባንድ የግ አግስ።

¹⁴ ታ ኦዳ ናጋራ ኡባ ሺሽ ቃችድ፥ ቃምባራዳ ታ ጋናን ዎስ፤ ያትድ ታ ዎልቃ ዉርስስ። ታ ኤቀታናዉ ዳንዳኦና አሳስ፥ ታና አድ እሚስ።

¹⁵ ጎዳይ ታ ግዶን ደእያ ዎልቃማ ኦላንቾታ ኡባ ድግስ። ታ ያላጋታ ይሳናዉ ዎደ ቃችስ፤ ዎይነ የይሳዳ፥ ጎዳይ ይሁዳ ጌላኦታ የስ።

¹⁶ ታኒ ዬካሸ ታ አፉ ጉሰይ ሄሳሳ፤ ታና ምንይነ ካትስያ ኦንካ ባዋ፤ ሞርከይ ጎብን፥ ታ ናይት ኡንኤትዶሶና።

¹⁷ ፅዮነይ ባ ኩሽያ ምጫሱ፤ ሽን እዮ ምንያ ኦንካ ባዋ። እ ዩሹዋን ደኤይሳት እዮ ሞርካናዳ ጎዳይ ኦስ። የሩሳላመይ ኤንታ ግዶን ቱና ግዳሱ።

¹⁸ እያ ሀይሳዳ ያጋሱ፤ “ጎዳይ ፅሎ፤ እያ ኪተቶና እፅዳይ ታና። ህንተኖ፥ አሳቶ ኡባይ ስእተ፤ ታ መቱዋካ በእተ፤ ታ ፓንትነ ታ ጌላኦት ድኤትዶሶና።

¹⁹ ታ ላገታ ፄጋስ፤ ሽን ኤንቲ ታና ጭምዶሶና፤ ካህነትነ ጭማት ባንታ ሸምፑዋ አሻናዉ፥ ካ ኮይሸ ካታማ ግዶን ሀይቅዶሶና።

²⁰ አቤት ጎዳዉ፥ ታ ዋይያ በአ! ታ ጋርሳይ ዳጋምስ። ታኒ ዳሮ ማካልዳ ግሾ፥ ታ ዎዛናይ መቅስ፤ ካረን ማሽ ዉርሴስ፤ ሶን ሀይቆይ ደኤስ።

²¹ አሳይ ታ ዘለልሳ ስእዶሶና፤ ሽን ታና ምንያ እስ አስካ ባዋ። ታ ሞርከት ታ መቱዋ ስእዶሶና፤ ነ ታ ቦላ ኦዳባን ኡፋይትዶሶና። ኤንቲ ታዳ ሀናና መላ፥ ኤንታ ቦላ ነ አዋጅዳ ጋላሳ ኤሀ!

²² ኤንታ ኢታተ ኡባይ ነ ስን ጋኮ፤ ታ ናጋራ ግሾ ታና ሴርዳይሳዳ ኤንታካ ሴራ፤ ታ ዘለልሳይ ዳርስ፤ ታ ዎዛናይካ መቅስ።”