Mikiyaasa 4 - ጌሻ ማፃፋ

ፆሳ ዙማ

¹ ዉርሰ ጋላሳን ጎዳ ፆሳ ኬይ ኬፀትዳ ዙማይ፥ ዙማታ ኡባፈ ቁ ግድ በንታና። ደረ ኡባፈ ቁ ቁ ጋና። ካዎተት ኡባይ እያኮ ዎዳና።

² ህገይ ፅዮነፐ፥ ጎዳ ቃላይ የሩሳላመፐ ከይያ ግሾ፥ ዳሮ ካዎተት ይድ፥ “አነ ሃይተ፤ ጎዳ ዙማኮ፥ ያይቆባ ፆሳ ኬኮ ከዮስ። ኑ እያ ሸንያ ኦና መላ እ ኑና ባ ኦግያ ታማርሳና” ያጋና።

³ እ ዳሮ አሳታ ግዶን ፕርዳና፤ ሃሆን ደእያ ምኖ ካዎተታ ፓላማ ድጋና። ኤንቲ ባንታ ማሻ ማራሻ፥ ባንታ ቶራ ባጫ ከሳናዉ ቆፃና። ካዎተይ ካዎተ ቦላ ኦላ ደንና፤ ህዛፐ ጉየ፥ ኤንቲ ኦላ ትምርተ ታማሮኮና።

⁴ ሽን አስ ኡባይ ባ ዎይነ ኩያንነ ባላሰ ኩያ ጋርሳን ዎፑ ግድ ኡታና፤ ህርግስያባይ አይብካ ባዋ። ኡባፈ ዎልቃማ ጎዳይ ሄሳ ኦድስ።

⁵ አሳ ኡባይ ባ ፆሳ ፆሳ ጎይናና። ሽን ኑኒ ጎዳ፥ ኑ ፆሳ ሱንን መርናዉ ሄመታና።

ፆሳ ሀልቹዋ

⁶ ጎዳይ፥ “ሄ ጋላስ ታኒ ዎበታነ ታኒ ዋዬስ አ እምን፥ ድኤትድ ሃሆ በሲ ብዳይሳታ ሺሻና።

⁷ ዎበት አትድ ዳና መላ ኦና፤ ድኤትድ ሃሆ በሲ ብዳይሳታ ምኖ ካዎተ ከሳና። ሄ ዎደፐ ዶማዳ መርናዉ ታኒ ጎዳይ፥ ፅዮነ ደርያን ኤንታ ቦላ ካዎታና” ያጌስ።

⁸ ነኖ፥ ጎዳ አሳ ዎችያ የሩሳላመ ቃ ግምብያዉ፥ ካሰ ነ ሃርያ ማታይነ የሩሳላመ ካዎተ ዛዋይ ኡባይ ነዉ ስማና።

⁹ ሀእ ኔኒ ነ ቃላ ቁ ኦዳ ዋሰይነ እቀ ኦይክዳ ማጫሳዳ ኡንኤተይ አይብሴ? ነዉ ካዎይ ባይና ግሾዬ? ዎይኮ ነና ዞርያ ይዳ ግሾሴ?

¹⁰ ፅዮነ አሳዉ፥ እቀ ኦይክዳ ማጫሳዳ ኦልሸ ዞከትተ። ህንተ ካታማፐ ከይድ ቃኤን ዳና፤ ያፐ ባብሎነ ባና። ግዶሽን፥ ያን ህንተ አታና፤ ጎዳይ ህንተና ህንተ ሞርከታ ኩሸፐ ዎዛና።

¹¹ ሽን ሀእ ዳሮ ካዎተት ነ ቦላ ሺቅድ፥ “የሩሳላመይ ቱኖ፤ ኑ አይፈይ ፅዮነ በኦ” ያጎሶና።

¹² ሽን ኤንቲ ጎዳ ቆፋ ኤሮኮና፤ እያ ሀልቹዋ አኬክቦኮና። ካ የታናዉ ዉዱማን ሺቀይሳዳ፥ ጎዳይ ኤንታ ሴራናዉ ሺሽስ።

¹³ ጎዳይ፥ “የሩሳላመ አሳዉ፥ ደንድድ፥ ህንተ ሞርከታ የተ። ታኒ ህንተዉ ብራታ ካጨ እማና፤ ታኒ ህንተዉ ናሰ ብራታ ቶሆ እማና። ህንተ ዳሮ ካዎተታ ትንቸረና፤ ኤንቲ ገነን ሺሽዳ ኡባ ህንተ ጎዳስ ዱማያና፤ ኤንታ ሻሉዋ ህንተ ሳአ ኡባ ጎዳስ እማና” ያጌስ።