Mikiyaasa 3 - ጌሻ ማፃፋ

ካለይሳትነ ናበት ቦረትዶሶና

¹ ታኒ፥ “ያይቆባ ኮቻታ ሀላቃቶነ እስራኤለ አሳ ካለይሳቶ፥ ስእተ! ህንተ ሱረ ፕርዳ ኤራናዉ በሰነዬ?

² ህንተ ሎኦ እፅድ፥ ኢታ ዶሴታ። ታ አሳ ጋልባ ቃረታ፤ ኤንታ አሹዋ ኤንታ መቀፈ ሻከታ።

³ ህንተ ታ አሳ አሹዋ ሜታ፤ ኤንታ ጋልባ ቃርድ፤ ኤንታ መቀ ቃንፀረታ፤ አሾ ድስተን የጋናዉ ሙፀይሳዳ ኤንታ አሹዋ ሙፀረታ።

⁴ ኤንቲ ኢታ ኦሶ ኦዳ ግሾ፥ ሄ ዎደ ኤንቲ ጎዳኮ ዋሳና፥ ሽን እ ኤንታዉ ዛረና፤ እ ባ ሶምኡዋ ሄ ዎደ ኤንታፈ ቆታና” ያጋስ።

⁵ ጎዳይ ዎርዶ ናበታኮ፥ “ህንተ ምያባ እምያ ዎደ፥ ‘ነዉ ሳእ ሳሮ’ ያጌታ፤ ሽን ህንተና ሙዞና እፅኮ እያ ቦላ ኦላ አዋጀታ።

⁶ ሄሳ ግሾ፥ ህንተዉ ጋላስ ቃማ ግዳና፤ ቆንጨ በኤከታ። ሳእ ህንተዉ ማና፤ ዛሪድ ሙሩነከታ፤ ናበታስ አዊ ዉላና፤ ጋላስ ማና።

⁷ ቆንጨ በኤይሳት ዬላታና፤ ሙሩነይሳት ካዉያና። ጎዳ ማታፐ ኤንታዉ ዛሮይ ባይና ግሾ፥ ኤንቲ ዬላትድ፥ ኡባይ ባንታ ዶና ኦይካና” ያጌስ።

⁸ ሽን ታኒ ያይቆባ ዘረስ ኤንታ ናጋራ፥ እስራኤለ አሳስ ኤንታ ናጋራ ኦዳና መላ ዎልቃን፥ ጎዳ አያናን፥ ሱረ ፕርዳንነ ምኖተን ኩማስ።

⁹ ህንተ ሱረ ፕርዳ እፀይሳትነ ሎኦባ ጌላይያ ያይቆባ ኮቻታ ሀላቃትነ እስራኤለ አሳ ካለይሳት ሀይሳ ስእተ።

¹⁰ ህንተ ፅዮነ ካታማ ሱ ጉስድ ኬፀታ፤ የሩሳላመ ካታማ ጌላተን ግምበታ።

¹¹ እያ ሀላቃት ዎፈን ፕርዶሶና፤ ካህነት ሚሸን ታማርሶሶና፤ ናበት ሚሸይ ባይና ሙሩኖኮና። ሽን ሄ ኡባ ኦድ፥ “ጎዳይ ኑ ግዶን ደእያ ግሾ፥ ኑ ቦላ ኢታባይ ዬና” ያግድ እያ አማነቶሶና።

¹² ሄሳ ግሾ፥ ህንተ ጋሶን ፅዮነ ካታማይ ጋደዳ ጎየታና፤ የሩሳላመ ካታማይ ላለ ዶረ ግዳና። ፆሳ ኬይ ኬፀትዳ ደረይ ዎራ ግዳና።