Mikiyaasa 2 - ጌሻ ማፃፋ

አሳ ቆፋነ ፆሳ ሀልቹዋ

¹ ኢታባ ሀልቸይሳታ፥ ቃስ ባንታ ሂፃን ደእሸ፥ ገነ ዋት ኦነኮ ቆፐይሳታ አየ! ዎልቃይ ኤንታ ኩሸን ደእያ ግሾ፥ ሳእ ዎንትያ ዎደ ባንታ ቆፋ ፖሎሶና።

² ኤንቲ ጎሻ ጋደ ኮይኮ፥ ዎልቃን ኤኮሶና፤ ኬ ኮይኮ ዎልቃን ኦይኮሶና። አሳ ማታ የድ፥ እያ ላታ ጮ ቦንቆሶና።

³ ሄሳ ግሾ፥ “ሄኮ፥ ታኒ ህንተ ቦላ ኢታባ ኤሀናዉ ቆፓስ፤ ህንተ ከስ ኤካናዉ ዳንዳኤከታ። እ ኢታ ዎደ ግድያ ግሾ፥ ህንተ ኦቶሮን ስመረታናዉ ዳንዳኤከታ።

⁴ “ሄ ዎደ ኤንቲ ህንተ ቦላ ሌምሶን ቀልቅሳና፤ ቃስ ሀይሳዳ ያግድ ዘሌልሸ ህንተና ኦዳ ጫዳና። ‘ኑኒ ኡባይ ቱማ ይዳ፤ ጎዳይ ኑ ቢታ ኤክድ፥ ኑና ድእዳይሳታስ ሻክድ እሚስ’ ” ያጌስ ጎዳይ።

⁵ ሄሳ ግሾ፥ ጋደይ ሳማን ሻከትያ ዎደ ጎዳ አሳ ግዶን ነ ሳማ ከስያ አስ ያና።

ዎርዶ ናበታ

⁶ አሳይ ታኮ፥ “ኑ ቦላ ትንብተ ኦዶፓ፤ ህንተ ቦላ ሀይሳ መላባይ ጋካና ጋዳ ኑ ቦላ ትንብተ ኦዶፓ። ሄሳ መላ ካዉሻባይ ኑና ጋከና” ያጎሶና።

⁷ ታኒ ኤንታኮ፥ “ያይቆባ ኮቻቶ፥ ጎዳ ዳንዳአይ ዉርደዬ? እ ሄሳ ማላባ ኦዬ? ሱረ ኦገን በይሳታስ ታ ቃላይ ሎኦባ ኦኔ? ያግድ ህንተ ኦይቻናዉ በሲ? ያጋስ።

⁸ ሽን ማታ ዎደፐ ዶምድ፥ ታ አሳይ ታ ቦላ ሞርከዳ ደንድስ። ህርግ ባይና ህንተ ግዶራ አያ ሳሮ አሳ ኦላፐ ቃረትድ ስምያ አሳዳ ኦደታ።

⁹ ታ አሳ ግዶን ደእያ ማጫሳታ ኤንታ ሎኦ ኬፈ ላግድ ከሴታ፤ ታ አንጁዋ ኤንታ ናይታፐ መርናዉ ኤክደታ።

¹⁰ ሀ በሳይ ቱናተ ጋሶን ኢትዳ ግሾ፥ ደንድድ ቢተ። ሀይስ ህንተዉ ሸምፖ በሲ ግደና።

¹¹ እስ ጭምያ ዎርዳንቾይ ይድ፥ ‘ህንተ ስንፈ ዎይነ ኡሻንነ ማይያ ኡሻን ኡፋይታና’ ያግድ ዎርዶ ትንብተ ኦድኮ፥ እ ህንተዉ ናበ ግዳና።

¹² “ያይቆባ ኮቻቶ፥ ታኒ ህንተና ኡባ ሺሻና፤ ታኒ እስራኤለ አሳፐ አትዳይሳታ ቱማ እስፈ ሺሻና። ዶርስ ግርበን ሺቀይሳዳነ ዉደይ ሄን በሳን ሺቀይሳዳ፥ ታኒ ኤንታ እስፈ ሺሻና። ሄ በሳይ ዳሮ አሳን ኩማና።

¹³ ኤንታዉ ኦገ ዶይድ ካለይስ ኤንታፈ ስንትድ ከያና፤ ኤንትካ ፐንግያ መንድ፥ ከያና። ጎዳይ፥ ኤንታ ካዎይ ባ ሁጰን ኤንታዉ ኤንታ ስን አድ ኤንታ ካለና” ያጌስ።