Medhetethi 41 - ጌሻ ማፃፋ

ግብፀ ካዋ አሙሆ

¹ ናምኡ ላይፈ ጉየ፥ ግብፀ ካዎይ አሙሆ አሙህስ። ሄ አሙሁዋን እ ናይለ ሻፋ ጋፃን ኤቅስ።

² ላፑን ኦርደነ ሞ ሚዛት ናይለ ሻፋፐ ከይድ፥ ማታ ምሽን በእስ።

³ ኤንታፈ ካልድ፥ ሀራ ላፑን ግልቃ ሚዛት ናይለ ሻፋፐ ከይድ፥ ሻፋ ጋፃን ደእያ ሀራ ሚዛታ ማታን ኤቅዶሶና።

⁴ ሄ ግልቃ ሚዛት ላፑን ኦርደነ ሞ ሚዛታ ምትዶሶና። ሄሳፈ ጉየ፥ ካዎይ ባርክስ።

⁵ እ ዛር ስክድ፥ ሀራ አሙሆካ አሙህስ። ላፑን ሎኦነ ሙሩታ ሞርኤት እስ ማቃ ቦላ ከይዶሶና።

⁶ ኤንታፈ ካልድ፥ ሌኦነ ዶሎሀ ባጋ ጫርኮን ሹልዳ ሀራ ላፑን ሞርኤት ከይዶሶና።

⁷ ሄ ሌእዳ ሞርኤት ሎኦነ ሙሩታ ሞርኤታ ምትዶሶና። ሄሳፈ ጉየ፥ ካዎይ ባርክድ አሙሆ ግደይሳ ኤርስ።

⁸ ሳአይ ዎንትን ስኮፈ እ ደንድያ ዎደ እያ ዎዛናይ ያርክስ። ሄሳ ግሾ፥ ግብፀን ደእያ ብታንቾታነ ኤራንቾታ ኡባ ካዎይ ፄግስድ ኤንታዉ ባ አሙሁዋ ኦድስ። ሽን እያዉ ሄ አሙሁዋ ብርሽያ አስ ይስ።

⁹ ኡሻ ካፖይ ሄ ዎደ ግብፀ ካዋኮ፥ “ታኒ ታ ናቁዋ ሀች ሀሳያይስ።

¹⁰ እስ ዎደ ካዎይ ባ አይለታ ሀንቀትድ፥ ታናነ ካ ካፑዋ ቃሾ ኬን የግስ።

¹¹ ያን ደእሸ ኑ ናምአት አሙሆ አሙህዳ። ሄ አሙሆታስ ዱማ ዱማ ብርሸይ ደኤስ።

¹² ሄ ዎደ ናገይሳታ ካፑዋ አይለይ፥ እብራወ ፓንይ፥ ኑራ ቃሾን ደኤስ። ኑኒ ኑ አሙሁዋ እያዉ ኦድን፥ እ ኑስ ሁጰን ሁጰን አሙሁዋ ብልስ።

¹³ ያንን፥ ሄ ሀኖት እ ኑስ ብልዳይሳዳ ሀንዶሶና። ሄስ አይበ ጊኮ፥ ታኒ ታ ሹማተኮ ስማስ፥ ሀንኮይ ካቀትስ” ያግስ።

¹⁴ ያትን፥ ግብፀ ካዎይ ዮሰፋ ፄግስስ። ኤንቲ እያ ቃሾ ኬፈ ኤለስድ ኤህዶሶና። እ ሜደትድ ባ ማኡዋ ላምድ፥ ካዋኮ ገልስ።

¹⁵ ካዎይ ዮሰፋ፥ “ታኒ አሙሆ አሙሀስ፥ ሽን ታዉ እስ አስካ ብላናዉ ዳንዳእቤና። ታኒ፥ ነ አሙሆ ብላናዉ ዳንዳኤይሳ ስአስ” ያግስ።

¹⁶ ዮሰፍ፥ “ታኒ ሄሳ ዳንዳእከ፥ ሽን ፆሳይ ካዋስ ሎኦነ ልከ ብርሸ እማና” ያግስ።

¹⁷ ካዎይ፥ “ታኒ ታ አሙሆራ ናይለ ሻፋ ጋፃን ኤቅዳሽን፥

¹⁸ ላፑን ኦርደነ ሞ ሚዛት ናይለ ሻፋፐ ከይድ፥ ማታ ሞሶና።

¹⁹ ኤንታፈ ካልድ፥ ሀራ ላፑን ግልቃነ ላፍዳ ሚዛት ከይዶሶና። ታኒ ሄሳ መላ ግልቃ ሚዝ ግብፀ ቢታን ኡባካ በአ ኤርከ።

²⁰ ሄ ግልቃነ ላፍዳ ሚዛት ኮይሮ ከይዳ ላፑን ሞ ሚዛታ ምትዶሶና።

²¹ ሽን ኤንታ ምትዳፐ ጉየ ካሰይሳዳ ግልቅ ኡትዳ ግሾ፥ ኤንቲ ምትዳባ ኦንካ ኤራናዉ ዳንዳእቤና። ሄሳፈ ጉየ ታኒ ባርካስ።

²² “ታኒ ታ አሙሁዋን ቃስ ላፑን ሎኦነ ሙሩታ ሞርኤት እስ ማቃ ቦላ ከይዳይሳታ በአስ።

²³ ኤንታፈ ካልድ፥ ሌኦነ ዶሎሀ ባጋ ጫርኩዋን ሹልዳ ሀራ ላፑን ሞርኤት ከይዶሶና።

²⁴ ሄ ሌእዳ ሞርኤት ላፑን ሎኦ ሞርኤታ ምዶሶና። ታኒ ሀ አሙሁዋ ብታንቾታስ ኦዳስ፥ ሽን ታዉ አሙሁዋ ብርሽያ አስ በንትቤና” ያግስ።

²⁵ ሄሳፈ ጉየ ዮሰፍ ግብፀ ካዋኮ፥ “ካዋ አሙሆታ ብርሸይ እስኖ። ፆሳይ ባ ኦና ሀንያባ ካዋስ ቆንጭስስ።

²⁶ ሄ ላፑን ሎኦ ሚዛት ላፑን ላይታ፥ ቃስ ላፑን ሎኦ ሞርኤት ላፑን ላይታ፥ ሀ አሙሆታ ብርሸይ እስኖ።

²⁷ ሄ ላፑን ግልቃነ ላፍዳ ሚዛት ላፑን ላይታ፥ ቃስ ዶሎሀ ባጋ ጫርኩዋን ሹልዳ፥ ሌኦ ላፑን ሞርኤት ላፑን ኮሻ ላይታ።

²⁸ “ታኒ ካዋስ ኦድዳይሳዳካ፥ ፆሳይ ባ ኦና ሀንያባ ካዋ በስስ።

²⁹ ላፑን ዳሮ ካሎ ላይት ግብፀ ቢታ ኡባን ያና።

³⁰ ሽን ሄሳፈ ጉየ፥ ላፑን ኮሻ ላይት ካልድ ያና። ሄ ዎደ ግብፀ ካሎይ ኡባይ ዶገታና፥ ኮሽ ቢታ ጫጫና።

³¹ ኮሻይ ዳሮ ኢታ ግድያ ግሾ ሄ ቢታ ካሎይ ዶገትድ አታና።

³² ናምኡ ኦግያን ካዋስ ሄ አሙሆይ በንትዳይ ፆሳይ ባ ቆፕዳባ ኦናዉ ቃንፅዳ ግሾሳ። ሄሳ ፆሳይ ማታ ዎደን ኦና።

³³ “ሀእ ህዛ፥ ኔኒ ኤራንቾነ ጭንጫ አስ ኮያዳ ግብፀ ቢታን ሹማ።

³⁴ ላፑን ካሎ ላይን ካፅያ ካፈ እቻሹ ኩሽያፐ እሱዋ ሺሻና አሳታ ሹማ።

³⁵ ኤንቲ ያ ካሎ ላይን ካ ሺሽድ፥ ባንታ አዋተን ካታማን ካታማን ምንጅድ ዎና መላ ኪታ።

³⁶ ቢታይ ኮሻን ዮና መላ ሀ ካይ ግብፀ ቢታን ላፑን ላይን ደንዳና ኮሻስ ምንጀትድ ደኦ” ያግስ።

ዮሰፍ ግብፀ ቢታን ሹመተ

³⁷ ያትን ሄ ኦዳይ ግብፀ ካዋስነ እያ ሞርናታስ ሎኦ ግድድ በንትስ።

³⁸ ሄሳ ግሾ፥ ካዎይ ኤንታኮ፥ “ዮሰፋፐ አያ ሀራ ፆሳ አያናራ ደእያ አስ ደማናዉ ዳንዳኦኮ” ያግስ።

³⁹ ሄሳፈ ጉየ፥ ካዎይ ዮሰፋ፥ “ፆሳይ ሀይሳ ኡባ ነና ኤርስዳ ግሾ፥ ነ መላ ኤራንቾይነ ጭንጫ አስ ኦንካ ባዋ።

⁴⁰ ታኒ ነና ታ ቢታን ሹማስ። ታ አሳ ኡባይ ነዉ ኪተታና። ታፐ ሀር ኔፐ አያ ኦንካ ባዋ።

⁴¹ ሄኮ፥ ታኒ ነና ግብፀ ቢታ ኡባ ቦላ ሹማስ” ያግስ።

⁴² ሄሳፈ ጉየ፥ ካዎይ ባ ፓራምያ ምግዱዋ ባ ብራያፈ ከስድ፥ ዮሰፋ ብራን አስ። ቦንቾ ማኦነ ቆ ዎርቃ እያ ማይዝስ።

⁴³ ካዎይ ባ ናምአን ፓራ ጋርያ ዮሰፋ ቶግስስ። ቦንቾ ዎታዳረይ፥ “ዝግተ! ዝግተ!” ያግሸ እያፐ ስንራ ሄመቴስ። ሄሳዳ ኦድ፥ ካዎይ እያ ግብፀ ቢታ ኡባ ቦላ ሹምስ።

⁴⁴ ሄሳፈ ጉየ፥ ካዎይ ዮሰፋ፥ “ታኒ ካዎ ግድኮካ ነ ኪቶና ኦንካ ግብፀ ቢታ ኡባን ባ ኩሽያ ዎይኮ ባ ቶሁዋ ቃፆፎ” ያግስ።

⁴⁵ ካዎይ ዮሰፋ፥ “ፃፍናት-ፓእና” ግድ ሱንስ። እ እያዉ ኦና ካታማ ካህንያ ጶፅፋራ ናእዉ አስናቶ ማቾ እሚስ። ያንን፥ ዮሰፍ ግብፀ ቢታ ኡባ ቦላ ማታ ኤክስ።

⁴⁶ ዮሰፍ ግብፀ ካዋስ ኦሶ ኦይክያ ዎደ፥ እያዉ ላይ ሀስታማ። ዮሰፍ ካዋ ስንፈ ከይድ፥ ግብፀ ቢታ ኡባ ግዶን ሄመትስ።

⁴⁷ ሄ ላፑን ካሎ ላይን ቢታን ዳሮ ካ ካፅስ።

⁴⁸ ዮሰፍ ግብፀ ቢታን ሄ ላፑን ካሎ ላይ ካ ኡባ ሺሽድ፥ ካታማታን ምንጅስ። እስ እስ ካታማ ዩሹዋን ደእያ ጋድያፐ ካ ኡባ ሄ ካታማታን ሺሽስ።

⁴⁹ ዮሰፍ አባ ሻፍያ መላ ዳሮ ካ ሺሽስ። ካ ዳሮተፈ ደንዶይሳን ማካናዉ ዳንዳኤትቦና ግሾ፥ ማክ ማክ ቆለይሳ አጋግስ።

⁵⁰ ኮሻ ላይ ያናፐ ስን፥ ኦና ካታማ ካህነ ጶፅፋራ ናኤ አስናትፐ ዮሰፍ ናምኡ አደ ናይታ የልስ።

⁵¹ ዮሰፍ ባ ባይራ ናኣ ሱን፥ “ፆሳይ ታና ታ መቱዋነ ታ አዋ ሶ አሳ ኡባ ዶግስስ” ግድ ምናሰ ግድ ሱንስ።

⁵² ናምአን ናኣ ሱንካ፥ “ፆሳይ ታ መቶትዳ ቢታን ታዉ ናአ እሚስ” ግድ ኤፍሬማ ግድ ሱንስ።

⁵³ ግብፀ ቢታን ደእያ ሄ ላፑን ካሎ ላይት አዶሶና።

⁵⁴ ዮሰፍ ኦድዳይሳዳ ላፑን ኮሻ ላይት ካል ይዶሶና። ሀራ ቢታ ኡባን ኮሽ ከይስ፥ ሽን ግብፀ ቢታ ኡባን ካይ ደኤስ።

⁵⁵ ግብፀ ቢታይ ኡባይ ኮሻትዳ ዎደ፥ አሳይ ካስ ካዋኮ ዋስዶሶና። ካዎይ ግብፀ አሳ ኡባ፥ “ዮሰፋኮ ብድ፥ እ ኦደይሳ ኦተ” ያግድ ኪትስ።

⁵⁶ ኮሻይ ግብፀ ቢታ ኡባ ጋክዳ ዎደ፥ ዮሰፍ ካ ምንጅዳ ሻለታ ኡባ ዶይድ፥ ካ ግብፀ አሳስ ባይዝስ።

⁵⁷ ቢታ ኡባን ኮሽ ሱልዳ ግሾ፥ ሳአን ደእያ አሳ ኡባይ ካ ዮሰፋፐ ሻማናዉ ግብፀ ይዶሶና።