Medhetethi 3 - ጌሻ ማፃፋአሳ ኪተተ እፆ 1 ሾሽ ጎዳ ፆሳይ መዳ ዶአ ኡባፈ አዳ ገናንቾ። እስ ጋላስ ሾሽ ማጫስዉ፥ “ፆሳይ ቱማ ህንተና፥ ‘ጋናትያን ደእያ ም አይፈ ኡባፈ ሞፕተ’ ግዴ?” ያግድ ኦይችስ። 2 ማጫስያ ሾሻኮ፥ “አካይ፥ ፆሳይ ሄሳዳ ግቤና፤ ኑኒ ጋናተ ግዶን ደእያ ምታ አይፈ ማናዉ ዳንዳኦስ። 3 ሽን ፆሳይ ኑና፥ ‘ጋናተ ግዶን ደእያ ም አይፈ ሞፕተ፥ ቦቾፍተ፤ እፅኮ ህንተ ሀይቃና’ ግስ” ያጋሱ። 4 ሾሻይ ማጫስዉ፥ “ህንተ አይኮካ ሀይቀከታ። 5 ፆሳይ ሄሳ ግዳይ፥ ሄ ም አይፍያ ህንተ ሚኮ አኬካ ደምድ ሎኦነ ኢታ ፆሳዳ ህንተ ኤራናይሳ እ ኤርያ ግሾሳ” ያግስ። 6 ማጫስያ ም አይፈይ ማናዉ ማልኤይሳ፥ በአናዉ ሎኤይሳነ፥ ጭንጫተ ደማናዉ አሞያባ ግደይሳ በአሱ። ሄ ም አይፍያፐ ኤካዳ ማሱ። ቃስ ባ አዝናስካ እምን እካ ምስ። 7 ኤንቲ ም ስሚድ፥ ናምአይካ አኬካ ደምዶሶና። ኤንቲ ፅረ ካሎ ደኤይሳ ኤርዶሶና። ሄሳ ግሾ ባላሰ ም ሀይ ስክድ ዳንጭዶሶና። 8 ሳእ ኦማርስዳ ዎደ ጋናተ ግዶን ጎዳ ፆሳይ ሄመትሽን እያ ግርሳ አዳመይነ እያ ማችያ ስእዶሶና። ኤንቲ ጋናተ ም ግዶን ጎዳ ፆሳፈ ቆሰትዶሶና። 9 ሽን ጎዳ ፆሳይ አዳመ ፄግድ፥ “አዳመ፥ አዉን ደአይ?” ያግስ። 10 አዳመይ፥ “ጋናተ ግዶን ነ ግርሳ ስአዳ ታኒ ካሎ ደእያ ግሾ ያያዳ ቆሰታስ” ያግስ። 11 ጎዳ ፆሳይ፥ “ኔኒ ካሎ ደኤይሳ ነዉ ኦድዳይ ኦኔ? ታኒ ነና ሞፓ ግዳ ም አይፈፐ ማድዬ?” ያግድ ኦይችስ። 12 አዳመይ፥ “ታራ ዳና መላ ኔኒ እምዳ ማጫስያ ሄ ም አይፍያፐ ታዉ እምን ማስ” ያግስ። 13 ጎዳ ፆሳይ፥ ማጫስዉ፥ “ኔኒ ሄሳ አይስ ኦዲ?” ያግድ ኦይችስ። ማጫስያ፥ “ታና ሾሻይ ጭምን ማስ” ያጋሱ። 14 ጎዳ ፆሳይ ሾሻ፥ “ኔኒ ሀይሳ ኦዳ ግሾ፥ መሄፐነ ዶአ ኡባፈ አዳ ባደትዳባ ግዳ። ኔኒ ነ ኡሎን ቢታራ ጎሸታና፤ ነ ደኦ ላይ ኡባን ባና ላጫና። 15 ታኒ፥ ነ ግዶንነ ማጫሰ ግዶን፥ ነ ሼሻ ግዶንነ እ ሼሻ ግዶን ሞርከተ ዎና። እ ነ ሁጵያ ቆፃና፥ ነካ እያ ግንድያ ዱካና” ያግስ። 16 ማጫስዉ ጎዳ ፆሳይ፥ “ነ ቃንትዳ አጌናን ዳሮ ኡንኤታና። ኔኒ ዎልቃማ ዋየን ናአ የላና። ግዶሽን፥ ኔኒ ነ አዝናራ ዳናዉ አሞታና፤ እ ነና ሃራና” ያግስ። 17 ጎዳ ፆሳይ አዳመኮ፥ “ኔኒ ነ ማቸ ኦዳ ስእዳ ግሾነ ታኒ ነና ሞፓ ግዳ ም አይፍያፐ ኔኒ ምዳ ግሾ፥ ቢታይ ነ ጋሶን ባደትዳይሳ ግዶ። ኔኒ ነ ደኦ ላይ ኡባን ግታ ዳቡርሳን ቢታ ኦዳ ማና። 18 ቢታይ ነዉ አጉንነ ሀርመ ዶልሳና፤ ኔኒ ቢታፈ ዶልድ ካፅያባ ማና። 19 ኔኒ ነ መትዳ ቢታ ስማና ጋካናዉ ዳቡራን ጫዋታዳ ኦዳ ነ ካ ማና። ኔኒ ቢታፈ መትዳ ግሾ ቢታ ስማና” ያግስ። 20 አዳመይ ባ ማችዉ ደኦይ ደእያ አሳ ኡባስ አዮ ግድያ ግሾ ሄዋኖ ግድ ሱንስ። 21 ጎዳ ፆሳይ አዳመነ እያ ማችዉ እተ ጊግስድ ማይዝስ። 22 ጎዳ ፆሳይ፥ “ህዛ አስ ሎኦነ ኢታ ኤሮን ኑፐ እሱዋዳ ግድስ። ኤንቲ ባንታ ኩሽያ የድድ፥ ደኦ እምያ ም አይፍያፐ ኤክድ ሞና መላነ መርናዉ ደኦን ዶና መላ ተቀታናዉ ኮሼስ” ያግስ። 23 ሄሳ ግሾ፥ ኤንቲ ባንታ መትዳ ቢታ ኦና መላ ጎዳ ፆሳይ ኤደነ ጋናተፐ ኤንታ ከስስ። 24 ያትድ፥ ደኦ እምያ ምኮ ኤፍያ ኦግያ ናጋና መላ ክሩቤላ ጌተትያ ደኦ መተታነ ሽረት ሽረት ዎያ ታማ ላጮ ማሸ ኤደነ ጋናተፐ ዶሎሀ ባጋራ ዎስ። |
The Word for the World International and The Word for the World Ethiopia