Medhetethi 29 - ጌሻ ማፃፋ

ያይቆብ ላባ ሶ ጋከ

¹ ሄሳፈ ጉየ፥ ያይቆብ ደንድድ፥ ብድ ዶሎሀ ባጋ አሳ ቢታ ጋክስ።

² ያንካ ደምባ በሳን ሃ ኦላ ደምስ። ሄ ዶርሳ ዉደት ሄ ሃ ኦላ ማታን ደኦሶና። ዉደ ኡባይ ሃ ኡየይ ሄ ኦላፈ። ሄ ሃ ኦላ ዶና ጎርድያ ሹቻይ ግታ።

³ ዶርሳ ዉደ ኡባይ ያ ሺቅኮ፥ ዉድያ ሄመይሳት ሃ ኦላ ዶናፐ ሄ ሹቻ ጎንዶርስድ ዉድያ ሃ ኡሾሶና። ኡሽ ስሚድ ሄ ሹቻ ኦላ ዶናን ዛር ዎሶና።

⁴ ያይቆብ ኤንታኮ፥ “ህንተ አዉፐ ይደቲ?” ያግድ ኦይችስ። ኤንትካ፥ “ኑኒ ካራነፐ ይዳ” ያግዶሶና።

⁵ እ፥ “ናኮራ ናአ ናኣ ላባ ኤሬቲ?” ያግድ ኦይችስ። “ኤ፥ እያ ኤሮስ” ያግዶሶና።

⁶ ያይቆብ ኤንታ፥ “እ ሎኦ ደኢ?” ያግድ ኦይችስ። “ኤ፥ ሎኦ፥ እያ ናእዉ ራሄሎ ዶርሳታ ላጋዳ ያሮ ህን በአ” ያግዶሶና።

⁷ ያይቆብ ኤንታኮ፥ “ሄኮ፥ ሀእ አው ቃን ደኤስ። ዉደ መሄይ ሶ ስምያ ዎደይ ቡሮ ጋክቤና፥ ዶርሳ ኡሽ ኤፍድ ሄምተ” ያግስ።

⁸ ሽን ኤንቲ፥ “ዉደ ኡባይ ሺቅን ሹቻ ሃ ኦላ ዶናፐ ጎንዶርሳና ጋካናስ ኑ ኡሻናዉ ዳንዳኦኮ። ሄሳፈ ጉየ፥ ሹቻ ጎንዶርስድ ዶርሳታ ኡሻና” ያግዶሶና።

⁹ እ ቡሮ ኦድሽን፥ ላባ ናእያ ራሄላ ዶርሳታ ሄምያ ግሾ፥ ባ አዋ ዶርሳታ ላጋ ኤካዳ ጋካሱ።

¹⁰ ያይቆብ ባ አየ እሻ ላባ ናእዉ ራሄሎ ላባ ዶርሳታ ላጋዳ ያሮ በእዳ ዎደ ብድ ኦላ ዶናፐ ሹቻ ጎንዶርስድ ዶርሳታ ሃ ኡሽስ።

¹¹ ያይቆብ ራሄሎ ዬርድ፥ ኡፋይሳን ባ ቃላ ቁ ኦድ ዬክስ።

¹² ያይቆብ፥ “ታኒ ነ አዋ ምቸ እርብቃ ናአ” ያግድ እዉ ኦድስ። ሄሳ ግሾ፥ እያ ዎፃ ባዳ ባ አዋስ ኦዳሱ።

¹³ ላቢ ባ ምቸ ናአ ያይቆባ ዩሳ ስእዳ መላ ሞካናዉ ዎፅድ ብስ። እያ እድም ዬርድ ባ ሶ ኤፍስ። ያን ያይቆብ ሀንዳባ ኡባ ላባስ ኦድስ።

ያይቆብ ላባ ናይታ ማችስ

¹⁴ ላቢ እያ፥ “ኔኒ ቱማ ታ አሾነ ታ ሱ” ያግስ። ያይቆብ እያራ እስ አጌና ኩመ ኡትስ።

¹⁵ ሄሳፈ ጉየ፥ ላቢ ያይቆባ፥ “ኔኒ ታዉ ዳቦ ግድዳ ግሾ፥ ታዉ መላ ጮ ኦነዬ? አነ ታ ነዉ አይ ቃንፃናዉ ኮሽያኮ ታዉ ኦዳ” ያግስ።

¹⁶ ላባስ ናምኡ ማጫ ናይት ደኦሶና። ባይረ ሱንይ ልያ፥ ካልያ ቃስ ራሄሎ ጌተታዉሱ።

¹⁷ ልያ አይፈራ ጩጫ፥ ሽን ራሄላ የገልስነ ማላ ሎኦ።

¹⁸ ያይቆብ ራሄሎ ዶስድ፥ “ታኒ ነ ካሎ ናኤ ራሄል ግሾ ነዉ ላፑን ላይ ኦና” ያግስ።

¹⁹ ላቢ፥ “እዮ ሀራ አሳስ እማናፐ ነዉ እሞይ ሎኦ፥ ነ ታራ ሀይሳን ደአ” ያግስ።

²⁰ ሄሳ ግሾ፥ ያይቆብ ራሄሎ ኤካናዉ ላፑን ላይ ኦስ። ሽን እ እዮ ዳሮ ዶስያ ግሾ፥ እያዉ ጉ ጋላስ ዳንስ።

²¹ ሄሳፈ ጉየ፥ ያይቆብ፥ “ታ ማችዉ ታዉ እማ፥ ታ ላይይ ዉርስ ታኒ እዮ ኤካናዉ ኮያይስ” ያግስ።

²² ሄሳ ግሾ፥ ላቢ አሳ ኡባ ፄግድ ያጋኖ ከስስ።

²³ ሽን ሳእ ቃምን ላቢ ባ ናእዉ ልያ ኤፍድ ያይቆባስ እሚስ። ያይቆብ እዮ ኤክስ።

²⁴ ቃስ ላቢ ባ አይልዉ ዛላፋ ባ ናኤ ልያስ አይለ ኦድ እሚስ።

²⁵ ሳእ ዎንትን እ ፄልያ ዎደ ሄኮ ልያ። ያይቆብ፥ “ሀይስ ኔኒ ታ ቦላ ኦዳይስ አይቤ? ታኒ ነዉ ኦዳይ ራሄል ግሾሳ ግደነዬ? ታና አይስ ጭማድ” ያግስ።

²⁶ ላቢ እያኮ፥ “ኑ ቢታን ባይሪያ ደእሽን ካልዉ አዝናስ እመይስ ዎጋ ግደና።

²⁷ ምሽራተን ኢራ ሳምንታ ኦንግኮ፥ ቃስ ካልውካ ታኒ ነዉ እማና። ሄሳፈ ጉየ፥ ሀራ ላፑን ላይ ታዉ ኦሳ” ያግስ።

²⁸ ያይቆብ ኦዳ ማእድ ሳምንታ ኢራ ኦንግስ። ሄሳፈ ጉየ፥ ላቢ ባ ናእዉ ራሄሎ እያዉ እሚስ።

²⁹ ቃስ ላቢ ባ አይልዉ ባሎ ባ ናኤ ራሄልስ አይለ ኦድ እሚስ።

³⁰ ያይቆብ ራሄሎካ ኤክስ። ራሄሎ ልያፐ አድ ዶስስ። ሀራ ላፑን ላይ ላባስ ኦስ።

ያይቆባነ እያ ናይታ

³¹ ጎዳይ ልያ ራሄል ዶሰታቦናሮ በእድ፥ እዉ የሎ ኡሉዋ ዶይስ። ሽን ራሄላ ናአ የሎና ጋምአሱ።

³² ልያ ቃንታዳ አደ ናአ የላሱ። እያ፥ “ጎዳይ ታ መቱዋ በእስ፥ ሀእ ታና ታ አዝናይ ዶሳና” ጋዳ ሄ ናአ ሮቤላ ጋዳ ሱንሱ።

³³ እያ ናምአን ቃንታዳ አደ ናአ የላሱ። እያ፥ “ጎዳይ ታኒ ዶሰታቦናይሳ በእዳ ግሾ፥ ታዉ ሀይሳካ ጉጅስ” ጋዳ ስሞና ጋዳ ሱንሱ።

³⁴ እያ ሄን ቃንታዳ አደ ናአ የላሱ። እያ፥ “ታኒ እያዉ ሄ አደ ናይታ የልዳ ግሾ፥ ታ አዝናይ ሀእ ታራ ሲቆን ዋፀታና” ጋዳ እያ ሌወ ጋዳ ሱንሱ።

³⁵ እያ ሀራ ቃንታዳ አደ ናአ የላሱ። እያ፥ “ሀእ ታኒ ጎዳ ጋላታና” ጋዳ እያ ሱን ይሁዳ ጋዳ ሱንሱ። ሄሳፈ ጉየ፥ የሎ ኤቃሱ።