Medhetethi 21 - ጌሻ ማፃፋ

ይሳቃ የለተ

¹ ጎዳይ ባ ኦድዳይሳዳ ሳሮ አንጅስ፤ ባ ገልዳ ቃላካ ፖልስ።

² ሳራ ቃንታዳ ፆሳይ ግዳ ዎደይ ጋክን ጭምዳ አብራሃመስ አደ ናአ የላሱ።

³ አብራሃመይ ሳራ የልዳ ናአ ሱን ይሳቃ ግድ ሱንስ።

⁴ አብራሃመይ ባ ናአ ይሳቃ ፆሳይ ኪትዳይሳዳ የለትዳ ሆስፑን ጋላሳን ቃፃርስ።

⁵ እያ ናአ ይሳቅ የለትያ ዎደ፥ አብራሃመስ ላይ ፄታ።

⁶ ሳራ፥ “ፆሳይ ታዉ ሚቸ እሚስ፤ ቃስ ሀይሳ ስእያ ኡባይ ታራ ሚጫና” ያጋሱ።

⁷ ቃስካ ሳራ፥ “ሳራ አብራሃመስ ናአ የላዳ ንና ግዳይ ኦኔ? ግድኮካ ታኒ ሀእ እያዉ እ ጭምዳ ዎደ ናአ የላስ” ያጋሱ።

እስማኤላነ አጋር ጎደተ

⁸ ጉ ናአይ ድጭድ፤ ን ዱስ፤ አብራሃመይ ይሳቅ ን ዱዳ ጋላስ ዎልቃማ ግብራ ጊግስስ።

⁹ ሽን ግብፀፈ ይዳ አጋራ አብራሃመስ የልዳ ናአይ ይሳቃ ቶችሽን ሳራ በአሱ።

¹⁰ ሳራ አብራሃመኮ፥ “ሀ አይለ ናአይ ታ ናአ ይሳቃራ ኡባካ ላቶና ግሾ፥ ጋንድዉነ እ ናኣ ከሳዳ ጎዳ” ያጋሱ።

¹¹ ሄ ኦዳይ ባ ናአ ቦችያ ግሾ፥ አብራሃመይ ዳሮ መቶትስ።

¹² ሽን ፆሳይ አብራሃመ፥ “ነ ኮቻይ ይሳቃ ባጋራ ፄገታና ግሾ ነ ናኣስነ ነ አይሌስ ዳሮ መቶቶፓ፤ ሳራ ነዉ ኦድያባ ኡባ ስአ።

¹³ ቃስ እካ ነ ኮቸ ግድያ ግሾ አይለ ናአ ታኒ ግታ ደረ ኦና” ያግስ።

¹⁴ ዎንታ ጉራ አብራሃመይ ደንድድ ጉ ካነ ኮዳን ሃ ኩንድ፥ አጋሮ ቶስድ፥ እ ናአ እዮ እድንድ ከስ ጎድስ። እያ ባዳ፥ በርሳበ መላ ቢታን ዳቡራሱ።

^15-16 ሃይ ኮዳፈ ዉርዳ ዎደ እያ፥ “ናአይ ሀይቅሽን፥ ኡታዳ በእከ” ጋዳ፥ ናአ እስ ቡረ ጋርሳን የጋዳ፥ ናምኡ ፄቱ ዋ ግደይሳ መላ ባዳ ኡታ አጋሱ። ያን ኡታዳ፥ ባ ቃላ ቁ ኦዳ ዬካሱ።

¹⁷ ፆሳይ ናአ ዋሱዋ ስእስ። ፆሳ ኪታንቾይ አጋሮ ሳሎፐ ፄግድ፥ “አጋረ፥ ዋናዲ? ፆሳይ ናአ ዬሁዋ ስእዳ ግሾ ባቦፋ፤

¹⁸ ዳንዳ ኤቃዳ፥ ናአ ደንዳ ነ ኩሽያን ኦይካ፤ ታኒ እያ ግታ ደረ ኦና” ያግስ።

¹⁹ ፆሳይ እዮ ሃ ኦላ በስን፥ ባዳ ኮዳን ሃ ኩንዳ ናኣ ኡሻሱ።

²⁰ ናአይ ድጭያ ዎደ ኡባን ፆሳይ እያራ ግድስ። እ መላ ቢታን ደእድ፥ ዶንገን ዱክያ አሰ ግድስ።

²¹ እ ፓራና መላ ቢታን ደእሽን፥ እያ አይያ ግብፀፈ እያዉ ማቾ እማሱ።

ሳሮተ ጫቆ

²² ሄ ዎደ፥ አብመለከይ፥ ባ ቶራ ሞጮና ፍኮላራ አብራሃመኮ ብድ፥ “ኔኒ ኦያባ ኡባን ፆሳይ ኔራ ደኤስ።

²³ ኔኒ ታ ቦላ ዎይኮ ታ ናይታ ቦላ ዎይኮ ታ ዘረ ቦላ ጭማዳ ገነ ኦና መላ፥ ሀእ ሀይሳን፥ ፆሳ ስንን ታዉ ጫቃ። ታኒ ነዉ ኬህዳይሳዳ፥ ኔንካ ታስነ ኔኒ በተተን ደእዳ ሀ ቢቴስ ኬሀ” ያግስ።

²⁴ አብራሃመይ፥ “ታኒ ጫቃይስ” ያግስ።

²⁵ ሄ ዎደ፥ አብራሃመይ፥ አብመለከ አይለት ኤክዳ ሃ ኦላባ አብመለከስ ማጋንስ።

²⁶ ሽን አብመለከይ፥ “ሄሳ ኦን ኦዳኮ ታኒ ኤርከ። ኔንካ ቃስ ታዉ ኦዳባካ፤ ታኒ ሀች ጋካናዉ ሄሳ ስአብከ” ያግስ።

²⁷ ሄሳፈ ጉየ፥ አብራሃመይ ዶርሳታነ ሚዛታ ኤህድ፥ አብመለከስ እምን፥ ኤንቲ ናምአይ ጫቅዶሶና።

²⁸ አብራሃመይ ላፑን ኡዞ ዶርሳታ ዉድያፐ ሻክስ፤

²⁹ አብመለከይ አብራሃመ፥ “ሀ ኔኒ ዱማ ሻካ ዎዳ ላፑን ኡዞ ዶርሳታ አይስ ሻካዲ?” ያግድ ኦይችስ።

³⁰ አብራሃመይ፥ “ታኒ ሀ ሃ ኦላ ቦክዳይሳስ ማርካ ግዳና መላ፥ ሀ ላፑን ኡዞ ዶርሳታ ታፐ ኤካ” ያግስ።

³¹ ሄሳን ሄ ናምኡ አሳት ጫቅዳ ግሾ፥ ሄ በሳይ ባርሳበ (ጫቆ ሃ ኦላ ዎይኮ ላፑን ሃ ኦላ)።

³² በርሳበን ጫቁዋ ጫቅዳፐ ጉየ፥ አብመለከይነ እያ ቶራ ሞጮናይ ፍኮል ደንድድ፥ ፍልስፄመ ቢታ ስምዶሶና።

³³ አብራሃመይ ባርሳበን ታማርሲክ ጌተትያ ም ቶክስ። ሄሳን ጎዳ፥ መርና ፆሳ ፄግድ እያዉ ጎይንስ።

³⁴ አብራሃመይ ፍልስፄመ ቢታን ዳሮ ዎደ ደእስ።