Medhetethi 20 - ጌሻ ማፃፋ

አብራሃመነ አብመለከ

¹ አብራሃመይ ማምረፐ ደንድድ ነገበ መላ ቢታ ሄራ ብድ ቃደሳፐነ ሹራ ቢታታስ ግዱዋን ደእስ። ገራራንካ ጉ ዎደ ጋምእስ።

² ያን ደእሸ አብራሃመይ ባ ማችዉ ሳሮ፥ “እያ ታ ምችዉ” ያግዳ ግሾ፥ ገራራ ካዎይ አብመለከይ ኪትድ ሳሮ ባኮ ኤፍስ።

³ ሽን ፆሳይ እስ ቃማ አሙሆን አብመለከኮ ይድ፥ “ኔኒ ኤህዳ ማጫሰ ጋሶን ሀይቃሳ፥ እያ አዝናራ ደአዉሱ” ያግስ።

⁴ ሀኖሽን፥ አብመለከይ እዮ ቦችቤና። እ፥ “ጎዳዉ፥ ኔኒ ታናነ ታ ደረይ ቆሆና ደእሽን ጮ ይሳነዬ?

⁵ እ፥ ‘እያ፥ ታ ምቾ’ ግቤኔ? ቃስ እያካ፥ ‘እ፥ ታ እሻ’ ጋብኬ? ታኒ ታ ዎዛና ፅሎተንነ ታ ኩሸ ጌሻተን ሀይሳ ኦስ” ያግስ።

⁶ ፆሳይ አሙሆን እያኮ፥ “ኤ፥ ኔኒ ነ ዎዛና ፅሎተን ኦዳይሳ ታ ኤራይስ። ሄሳ ግሾ፥ ኔኒ እዮ ቦቾናዳነ ታ ስንን ናጋራ ኦናዳ ነና ታኒ ተቃስ።

⁷ ሀእ ሀ አድያ ማችዉ ዛራ። እ ናበ ግድያ ግሾ፥ ነዉ ፆሳ ዎስኮ ነ አታና። ሽን እዮ ዛሮና እፅኮ፥ ኔንነ ነዉ ደእያባ ኡባይ ሀይቃናይሳ ኤራ” ያግስ።

⁸ አብመለከይ ዎንተ ጋላስ ዳሮ ጉራ ባ ሞርናታ ባኮ ፄግስ። ሄ ሀንዳባ ኡባ ኤንታዉ ኦድን ኤንቲ ዳሮ ባብዶሶና።

⁹ ያትን አብመለከይ አብራሃመ ፄግድ፥ “ኔኒ አይብባ ኑ ቦላ ኦዲ? ነ ታ ቦላነ ታ ካዎተ ቦላ ሀይሳ መላ ቆሆ ኤሀናዉ ታ ነዉ አይ ኢታባ ኦድና? ኔኒ ታ ቦላ ኦሰታናዉ በሶናባ ኦዳሳ” ያግስ።

¹⁰ ቃስ አብመለከይ አብራሃመ፥ “ኔኒ ሀይሳ አይስ ኦዲ?” ያግድ ኦይችስ።

¹¹ አብራሃመይ ዛሪድ፥ “ ‘ሀ በሳን ፆሳስ ያሸትያ አስ ባይና ግሾነ ቃስ ታ ማቸ ጋሶን ኤንቲ ታና ዎና’ ጋዳ ቆፕዳ ግሾሳ።

¹² ሄሳ ቦላ እያ ቱማካ ታ ምቾ፤ እያ ታ አዋ ናአፐ አትሽን ታ አየ ናአ ግዱኩ፥ ያንያ ግሾ፥ እያ ታ ማቾ ግዳሱ።

¹³ ፆሳይ ታና ታ አዋ ኬፈ ከስዳ ዎደ ታኒ ኢኮ፥ ‘ኔኒ ብዳ ቢታ ኡባን ነ ታዉ ኦና ኬሀተይ ሀይሳ፤ “እ ታ እሻ” ጋዳ’ ኦዳ ያጋስ” ያግስ።

¹⁴ ሄሳፈ ጉየ፥ አብመለከይ ዶርሰ፥ መሄ፥ ማጫ አይለታነ አደ አይለታ ከስድ አብራሃመስ እሚስ፤ እያ ማችዉ ሳሮ እያዉ ዛርስ።

¹⁵ አብመለከይ አብራሃመኮ፥ “ሄኮ፥ ታ ቢታይ ሀይስሽ ነና ሎኦሶን ደአ” ያግስ።

¹⁶ ሳርኮ፥ “ታኒ ነ እሻስ እስ ሙኩሉ ብራ ሳንትመ እማይስ። ሄስ ኔራ ደእያ ኡባ ስንን ኔኒ ፅሎ ግደይሳነ አይብ ኢታባካ ኦናይሳ ኤርሰይሳ ግዶ” ያግስ።

^17-18 ጎዳይ አብራሃመ ማቸ ሳር ጋሶን አብመለከ ኬ ኡባ ማይንስዳ ግሾ አብራሃመይ ፆሳ ዎስን፥ አብመለከይ፥ እያ ማችያነ እያ ማጫ አይለት ናአ የላና መላ ፆሳይ ኤንታ ፓስ።