Medhetethi 14 - ጌሻ ማፃፋ

አብራመይ ሎፀ ዎስሰ

¹ ሳናኦራ ካዎይ አምራፌል፥ ኤልሳረ ካዎይ አርዮክ፥ ኤላማ ካዎይ ኮሎዶጎሞርነ ጎይማ ካዎይ ትዳለይ ኦይዱ ካዎተት ዎላ፥

² እቻሹ ካዎተታራ፥ ሶዶመ ካዋ በራራ፥ ጋሞራ ካዋ በርሳራ፥ አዳማ ካዋ ሰንአበራ፥ ፅቦይማ ካዋ ሳምባራነ ዞኣራ ጌተትያ ቤላ ካዉዋራ ኦለታናዉ ደንድዶሶና።

³ ሀ እቻሹ ካዎተት እስፈ ሺቅድ ማፅነ አባ ጌተትያ ስድማ ዛንጋራን ባንታ ቶራ ሺሽዶሶና።

⁴ ሀ ካዎተት ታማነ ናምኡ ላይ ኮሎዶጎሞራስ ሃረትዶሶና ሽን ታማነ ሄን ላይን እያዉ ኪተቶና እፅዶሶና።

⁵ ታማነ ኦይዳን ላይን ኮሎዶጎሞርነ እያራ ቶቢዳ ካዎተት ባንታ ኦላንቾታ ኤክ ብድ ራፋይመታ አስታሮተን ደእያ ቃርናይማን፥ ዙዛይተታ ሃማን፥ ኤምመታ ሳወን ደእያ ቅራታይማን፤

⁶ ቃስ ሆራ ቢታ አሳታካ ደረይ ዳርያ ሳይረ ቢታን ኦል ፆንድ፥ መላ ቢታ ማታን ደእያ ኤልፋራና ጌተትያ በሳ ጋካናዉ ጎድዶሶና።

⁷ ያፐ ስሚድ፥ ቃደሳ ጌተትያ አይን ምስፓታ ይዶሶና። አማለቃታ ቢታ ኡባነ ሀዛዞን ታማረን ደእያ አሞረታ ቢታ ኦል ፆንድ ኦይክዶሶና።

⁸ ሄሳፈ ጉየ፥ ሶዶመ ካዎይ፥ ጋሞራ ካዎይ፥ አዳማ ካዎይ፥ ዘቦይማ ካዎይ፥ ዞኣረ ጌተትያ ቤላ ካዎይ ደንድድ ስድማ ዛንጋራን ኦላስ ጊግዶሶና።

⁹ ሀ እቻሹ ካዎተት፥ ኤላማ ካዋራ፥ ጎይማ ካዋራ፥ ሳናኦራ ካዋራነ ኤልሳረ ካዋራ ሀ ኦይዱ ካዎተታራ ኦለትዶሶና።

¹⁰ ሄ ዎደ ስድማ ዛንጋራን ማደዳ ኦይክያባት ደእያ ኦላት ደኦሶና። ሶዶመ ካዎይነ ጋሞራ ካዎት ኦላፐ አታናዉ ባቃትሸ ሄ ኦላን ዉልዶሶና። ሽን ሀንኮ ሄ ካዎተት ዙማኮ ባቃትድ አትዶሶና።

¹¹ ኦይዱ ካዎተት ሶዶመንነ ጋሞራን ደእያባ ኡባ ሀር አቶሽን፥ ኤንታ ካካ ቦንቅድ ኤፍዶሶና።

¹² አብራመ እሻ ናአይ ሎፀይ ሶዶመን ደእያ አስ ግድያ ግሾ እካ ባዉ ደእያባ ኡባራ ድኤትስ።

¹³ ሄሳፈ ጉየ፥ ድኤት ብዳ አሳፐ ከስ ኤክዳ እስ አስ ይድ ሀንዳባ ኡባ እብራወ አድያ አብራሃመስ ኦድስ። ሄ ዎደ አብራመይ አሞረ አድያ ማምረ ግታ ምታ ማታን ደኤስ። ማምረይነ እያ እሻት አስኮልነ አኔር ኦላ ዛራናዉ አብራመራ ጫቅድ ኡትዶሶና።

¹⁴ አብራመይ ባ እሻ ናአይ ድኤትዳይሳ ስእዳ ዎደ ባ ሶን የለት ድጭድ ሎህዳ 318 ቶራንቾታ ኤክድ ኤንታ ገዶ ካልድ ዳነ ካታማ ጋካናዉ ብስ።

¹⁵ እ ባራ ኤክ ብዳ ቶራንቾታ ቃማ ጩጋን ጩጋን ሻክድ ሞርከታ ኦልድ ፆንስ። ዳማስቆፈ ፑደሀ ባጋራ ደእያ ሆበ ጌተትያ በሲ ጋካናዉ ጎድስ።

¹⁶ ያትድ ደኤትዳባ ኡባ፥ ባ እሻ ናአ ሎፀነ እያዉ ደእያባ ኡባ፥ ማጫሳነ ሀራ አሳታ ዎስስ ኤክስ።

ማልከፃደቃነ አብራመ

¹⁷ አብራመይ ኮሎዶጎሞርነ እያራ ቶቢዳ ካዎታ ፆንድ ስምያ ዎደ ሶዶመ ካዎይ፥ ካዎታ ዛንጋራ ጌተትያ ሳወ ዛንጋራን እያ ሞካናዉ ከይስ።

¹⁸ ኡባፈ ቃ ፆሳ ካህነይ፥ ሳሌማ ካዎይ ማልከፃደቅ ኡይነ ዎይነ ኤክድ ይስ።

¹⁹ እ ሀይሳዳ አብራመ አንጅስ፤ “ሳሎነ ሳአ መዳ፥ ኡባፈ ቃ ፆሳይ ነና አንጆ።

²⁰ ነ ሞርከታ ነ ኩሸን አድ እምዳ፥ ኡባፈ ቃ ፆሳይ ጋላተቶ” ያግድ አንጅስ። አብራመይ ባ ደምዳባ ኡባፈ አስራታ ከስድ ማልከፃደቃስ እሚስ።

²¹ ሶዶመ ካዎይ አብራመኮ፥ “ሻሉዋ ነ ኤካዳ፥ አሳ ታዉ እማ” ያግስ።

²² ሽን አብራመይ ሶዶመ ካዋኮ፥ “ታኒ ጎዳስ፥ ሳሉዋነ ሳአ መዳ ኡባፈ ቃ ፆሳስ ታ ኩሽያ ደንስ።

²³ ኔኒ፥ ‘አብራመ ዱረ ኦዳይ ታና ጎናዳ’ ሀር አቶሽን ክረ ዎይኮ ጫማ ዎዶሮካ ኤክከ።

²⁴ ታ አሳት ምዳይሳፈ አትሽን ታ አይብባካ ኤክከ። ቃስ ታራ ብዳ አኔር፥ አስኮልነ ማምረይ ባንታና ጋክያባ ኤኮ” ያግስ።