Mazmure 94 - ጌሻ ማፃፋ

ፆሳይ ባ አሳ አገና

¹ ጎዳዉ፥ ኔኒ ሀሎ ከይያ ፆሲ፤ ኩሸ ዛርያ ፆሳዉ፥ ነ ቦንቹዋ በሳ።

² አቤት ሳኣ ፕርድያ ፆሳዉ ደንዳ፤ ኦቶራንቾታስ በሲያ ሴራ እማ።

³ ጎዳዉ፥ አዉደ ጋካናዉ ጋምአይ? ኢታት አዉደ ጋካናዉ ኡፋይታኔ?

⁴ ኢታ ኦይሳት ኦቶሮ ቃላ ሃሳዮሶና፤ ኤንቲ ጮ ጬቀቶሶና።

⁵ ጎዳዉ፥ ኤንቲ ነ አሳ ሊቅሶሶና፤ ኤንቲ ነ ላታ ናቆሶና።

⁶ አምኤታነ በታንቾታ ዎኦሶና፤ አው ባይና ናይታ ሙጮሶና።

⁷ ኤንቲ፥ “ጎዳይ ኑና በኤና፤ ያይቆባ ፆሳይ አኬከና” ያጎሶና።

⁸ ህንተኖ፥ አሳ ግዶፈ ኤያቶ፥ አኬክተ! ህንተኖ፥ ኤያቶ ህንተ ጭንጫ ግዳናይ አዉዴ?

⁹ ሀይ ኦዳ ፆሳይ ስኤኔ? አይፈ መዳ ጎዳይ በኤኔ?

¹⁰ ካዎተታ ሴርያ ፆሳይ ሴረኔ? አሰ ኤራተ ታማርስያ እ፥ ኤረኔ?

¹¹ ጎዳይ አሳ ቆፍ ፓናባነ ሀዳ ግደይሳ ኤሬስ።

¹² አቤት ጎዳዉ፥ ኔኒ ሴርያ አስነ ነ ህግያ ታማርስያ አስ አንጀትዳይሳ።

¹³ ኢታት ኩንድያ ኦላይ ቦከታና ጋካናዉ፥ መቶ ጋላስ ኔኒ እያ ሸምፕሳሳ።

¹⁴ ፆሳይ ባ አሳ የገና፤ እ ባ ላታ አገና።

¹⁵ ፕርድ ስሚድ ፅሎተ ቦላ ኤቃና፤ ዎዛና ሱረት ኡባይ ፅሎ ፕርዳ ካላና።

¹⁶ ማካላንቾታ ቦላ ታ ግሾ ደንደይ ኦኔ? ኢታ ኦይሳታራ ታ ግሾ ኤቀተይ ኦኔ?

¹⁷ ጎዳይ ታና ማዶናኮ፥ ታኒ ኤሶን ዱፎ ገላዳ አታናሽን።

¹⁸ ታኒ፥ “ታ ቶሆይ ሀልፅስ” ግዳ ዎደ፥ ነ ሲቆይ ታና ካትስስ።

¹⁹ ታ ዎዛናን ኡንኤተ ኩምዳ ዎደ፥ ኔኒ ታና ዎፑ ኦዳ ኡፋይሳሳ።

²⁰ ህገ ሻርያ ጌላ ዳይናታራ ጌላ አሳራ ኔኒ ሃሼታይ?

²¹ ፅሎታ ዎናዉ ኤንቲ ቶቦሶና፤ ሱረታ ቦላ ሀይቆ ፕርዶሶና።

²² ግዶሽን ጎዳይ ታ ሚፃ፤ ታ ፆሳይ ታኒ ቆሰታዳ አትያ ዛላ።

²³ ኤንታ ኢታተ ግሾ እ ኤንታ ሴራና፤ ኤንታ ናጋራ ግሾ እ ኤንታ ይሳና፤ ጎዳይ ኑ ፆሳይ ኤንታ ይሳና።