Mazmure 91 - ጌሻ ማፃፋ

ፆሳ ናጎ

¹ ኡባፈ ቃ ፆሳን ናገትድ ደኤይ፥ ኡባፈ ዎልቃማ ፆሳ ኩያን አቄስ።

² እ ጎዳ፥ “ኔኒ ታዉ ሚፃነ ቆሰታ አትያ በሲ፥ ኔኒ ታና አማንያ ታ ፆሳ” ያጋና።

³ እ ነና ሻንካንቾታ ፅሄፐ፥ ዎድ ኦንግያ ጋዶፐ አሻና።

⁴ እ ባ ባለታን ነና ካማና፤ እያ ቀፍያ ጋርሳን ኔኒ ቆሰታዳ አታና፤ እያ አማነተይ ነዉ ጎንዳለነ ካተ።

⁵ ኔኒ ቃማ ዳጋንያባስ፥ ዎይኮ ጋላስ ፆንገትያ ቶራስ ያያካ።

⁶ ኔኒ ማን ኦይክያ ሀርገ፥ ዎይኮ ጋላሳ ሴታን ኦንግያ ጋዶ ህርጋካ።

⁷ ሙኩላይ ነ ምየን፥ ታሙ ሙኩላይ ነ ኡሻቻን ኩንዳና፤ ሽን ነና አይብካ ቦቸና።

⁸ ኢታት ሴረትሽን፥ ኔኒ ነ አይፈ ፃላላን በአና።

⁹ ኔኒ ጎዳ ነዉ ቆሰታዳ አትያ በሲ ኦዳ ግሾነ፥ ኡባፈ ቃ ፆሳ ነ ደእያ በሲ ኦዳ ግሾ፥

¹⁰ ኢታባይ ነና ቦቸና፤ ጋዶይ ነ ኬኮ ሺቀና።

¹¹ ነ ኦገ ኡባን ነና ናጋና መላ፥ ፆሳይ ባ ኪታንቾታ ኪታና።

¹² ነ ቶሆይ ሹቻን በቶና መላ፥ ኪታንቾት ባንታ ኩሸን ነና ደንና።

¹³ ኔኒ ጋሞነ ሾሻ ቦላ ሄመታና፤ ዎዳላ ጋሞነ ኢታ ሾሻ የና።

¹⁴ ፆሳይ፥ “እ ታና ሲቅዳ ግሾ ታኒ እያ አሻና፤ ታ ሱን ኤርያ ግሾ ታኒ እያ ናጋና።

¹⁵ እ ታና ፄግያ ዎደ ታኒ እያዉ ኮያና፤ መቶ ዎደ ታኒ እያራ ግዳና፤ ታኒ እያ አሻናነ ቦንቻና።

¹⁶ ታኒ እያ ላይ አዱሳና፤ ታ አቶተ እያ በሳና” ያጌስ።