Mazmure 84 - ጌሻ ማፃፋ

ፆሳ ኬ ብሸ የፅያ ማዝሙረ

ዛማረታ ሀላቃስ ቆረ ናይት ፃፍዳ ሱሱልኤን የፀትያ ማዝሙረ

¹ ኡባፈ ዎልቃማ ጎዳዉ፥ ነ ደእያ በሳይ ዋን ሎእ!

² ታኒ ጎዳ ኬ ዳባባ ላሞታይስ፤ ታ ኩመ አሳተይ ደኦ ፆሳስ ኡፋይሳን የፄስ።

³ ኡባፈ ዎልቃማ ጎዳዉ፥ ታ ካዋዉ፥ ታ ፆሳዉ፥ ነ ያርሾ በሳ ማታን ቡበ ካፎይ ባዉ ደእያ በሲ ደማሱ፤ ሆለይካ ባ ናይታ ዎያ ኬ ኬፃሱ።

⁴ ነ ኬን ደኤይሳትነ መርናዉ ነና ሳበይሳት አንጀትዳይሳታ። ሳላሀ

⁵ ነና ባንታ ምኖተ ኦይሳት፥ ባንታ ዎዛና ፅዮነ ኦግያ ቦላ፥ ዎይሳት አንጀትዳይሳታ።

⁶ ኤንቲ ዬሆ ዛንጋራራ አያ ዎደ፥ ሄ በሳይ ፑልቶይ ከይያ በሲ ግድስ፤ ቶርቸ እራይ ቡክድ ኦላ ኩንስ።

⁷ ኤንቲ ዎልቃ ቦላ ዎልቃ ጉጅ ጉጅ ባና፤ እሶይ እሶይ ፆሳ ስንን ፅዮነን በንታና።

⁸ ኡባፈ ዎልቃማ ጎዳዉ ፆሳዉ፥ ታ ዎሳ ኔኒ ስአ፤ ያይቆባ ፆሳዉ ሀይዛ። ሳላሀ

⁹ ፆሳዉ፥ ኑ ጎንዳልያ በአ፤ ነ ዶርዳ ካዋ ኬሀ አይፈን ፄላ።

¹⁰ ታኒ ሀራ በሳን ሙኩሉ ጋላስ ዳናፐ፥ ነ ዳባባን እስ ጋላስ ደኤይስ ታዉ ሎኦ። ኢታታ ዱንካንያን ዳናፐ፥ ፆሳ ኬ ፐንገ ናጎይ ታዉ ሎኦ።

¹¹ ጎዳ ፆሳይ ኑስ ጎንዳለነ ፖኦ፤ ኑስ ቦንቾነ ኬሀተ እሜስ፤ ሱረተን ሄመተይሳታ ሎኦባ ድገና።

¹² ኡባፈ ዎልቃማ ጎዳዉ፥ ነናን አማነተይሳት አንጀትዳይሳታ።