Mazmure 73 - ጌሻ ማፃፋ

ሄን ማፃፋ ( ማዝ 73—89 ) ፆሳይ ታዉ ምኖተነ ግሾ

አሳፋ ማዝሙረ

¹ ቱማ ፆሳይ እስራኤለስ ሎኦ፤ ዎዛና ጌሻታስ እ ኬሀ።

² ሽን ታ ቶሆይ በታናዉ ጉ አትስ፤ ታ ታንጎይ ሀልፃናዉ ማትስ።

³ ሄስ ሀንዳይ ኢታ አሳትነ ኦቶራንቾት፥ ዱረትሽን ታኒ በአዳ ቃናትዳ ግሾሳ።

⁴ ኤንታ ዋየይ ጋኮና ግሾ፥ ኤንታ አሳተይ ፓያነ ምኖ።

⁵ ኤንቲ ሀራ አሳዳ ዋየቶኮና፤ ሀራ አሳዳ መቶን ሾጨቶኮና።

⁶ ሄሳ ግሾ፥ ኦቶሮይ ኤንታዉ ቆ አሌቆ መላ፤ ቡቀ አፍላዳ ማእዶሶና።

⁷ ኤንታ ዎዛናይ ኢታባ ፑልቴስ፤ ኤንታ ቆፋይ ኢታ ሀልቾን ኩምስ።

⁸ ኤንቲ ቀልቅሶሶና፤ ኢታባ ሃሳዮሶና፤ ባንታ ኦቶሩዋን ሀራታ ኡንኤሶና።

⁹ ባንታ ዶና ፆሳ ቦላ ዶዮሶና፤ ባንታ እንፃርሳ አሳ ቦላ አዱሶሶና።

¹⁰ ሀር አቶሽን፥ ፆሳ አሳይ ኤንታኮ ስማና፤ ኤንቲ ኦድያባ ኤሶን አማናና።

¹¹ ኤንቲ፥ “ፆሲ አይኮ ኤሪ? ኡባፈ ቃ ፆሳስ ኤራተ ደኢ?” ያጎሶና።

¹² ህዛ ኢታት ሀይሳ መላ፤ ኡባ ዎደ እንጀትን ደኦሶና፤ ኤንቲ ጉጅ ጉጅ ዱረቶሶና።

¹³ ህዛ ታኒ ታ ዎዛና ጌሻተን ናግዳይ፥ ፅሎተ በሳናዉ ታ ኩሽያ ሜጨትዳይ መላ።

¹⁴ ጋላሳ ኩመ ታኒ መቶን ሾጨታስ፤ ዎንታ ዎንታ ሴረታስ።

¹⁵ ታኒ ኢታ አሳታዳ ኦደትዳኮ፥ ነ አሳስ አማነቶና አታናሽን።

¹⁶ ታኒ ሀ ኡባ ኤራናዉ ቆፕያ ዎደ፥ ታዉ ዴፆ ግድስ።

¹⁷ ሄስካ ታኒ ፆሳ ኬ ገላና ጋካናዉነ ኢታ አሳታ ዉርሰ ቃዳ አኬካና ጋካናሳ።

¹⁸ ቱማ ኔኒ ኤንታ ሀልፅያ በሳን ኡትሳዳሳ፤ ኤንቲ ኩንድድ ያና መላ ኦሳ።

¹⁹ ኤንቲ ኤለስድ ይዶሶና፤ ዳጋማን እሶይ አቶና ዉርዶሶና።

²⁰ አሙሆይ ባርክያ ዎደ ባለተይሳዳ፥ አቤት ጎዳዉ፥ ኔኒ ደንድያ ዎደ፥ ኤንቲ ዶገታና።

²¹ ታኒ ይሎትዳ ዎደነ ታ ዎዛናን ጫመትዳ ዎደ፥

²² አኬኮና ኤያ አስ ግዳስ፤ ነ ስንን መሄ ግዳስ።

²³ ሽን ታኒ ኡባ ዎደ ኔራ ደአይስ፤ ታ ኡሻቻ ኩሽያ ኔኒ ኦይካዳሳ።

²⁴ ነ ዞርያን ታና ካለሳ፤ ዉርሰን ታና ቦንቾን ኤካሳ።

²⁵ ታዉ ሳሎን ኔፐ አትሽን፥ ሀር ኦን ደኢ? ታኒ ኔፐ አትሽን፥ ሳአን ሀራ አሞትከ።

²⁶ ታ ዎልቃይነ ታ ዎዛናይ ዳቡራናዉ ዳንዳኤስ፤ ሽን ፆሳይ ታ ዎዛና ምኖተነ መርናዉ ታና ጋክዳ ሳማ።

²⁷ ኔፐ ሃከይሳት ያና፤ ነና ካደይሳታ ኡባ ነ ዉርሳና።

²⁸ ሽን ታዉ ፆሳኮ ሺቆይ ሎኦ፤ እያ ኦሶ ኡባ ታኒ ኦዳና መላ፥ ኡባ ሃርያ ጎዳ ቆሰትድ አትያ በሰ ኦስ።